¹ Motakhaliya nyuwo munkhala vorera oSiyoni, ni nyuwo nnitjona okhala owopowa omwako wa oSamariya, nyuwo makhulupale a nloko nna nulupalexa, n'atthu a Israyeli nwe! ² Nwe mwawehe nttetthe w'oKaline, ni mwawehe-tho; nttetthe mulupale w'oHamathi; mwarweeke mpakha oKathi nttetthe w'aFilisti; khino mittetthette n'yo ti tjorera ovikana omwene wa Israyeli, ni omwene w'oYuda, ilapo n'yo ti tjulupale ovikana elapo'innyu? ³ Nyuwo mumphavela orakamiha nihuku na ehatsara, ni mwinnakuviha nihuku nno notakhaliya; ⁴ Nyuwo munnirupathela olili wa meno etthepo, munnirupathi vakhittanttani venyu, nkjhuraka ipwittipwitthi tja nikoto n'axinyompe, othanliya mwintsitsini; ⁵ Nyuwo munnitjiveliya opanka itjipo ntoko Davidi, mwipaka itjipo n'yo, nwopaka aviyel'inyu; ⁶ Nyuwo mwinniwurya evinyu nkhalini, mwinnotta makhura orikarika ni onukhela; nto khamwithokorerya opwetexiya wa nloko ninyu. ⁷ Tivo ti nyuwo mwinrwa opatjerya orwaaniya wepotthani mwavelelaka alipa otthukeliya, tjitjo ninumalihiya nloko n'alipa onyonyiya. ⁸ Apwiya MULUKU alaphela mwaha wa ntjina naya, APWIYA Muluku owerya tjotene anihimya wira: Miyo konyonyiya ni wintjona w'atthu a Yakobe, ni kinniphweliya n'inupa tjaya tjoreraxa; tivo kinuvahererya nttetthe aya mulupale ni mihakhu tjaya tjotene mmatatani mw'awanani aya. ⁹ Yahala vale atthu muloko a etthoko emotja wao-tho anamokhwa. ¹⁰ Mmutji onrwaa okusa mirutthu akumiheryaka ota w'enupa wira apahe, wira akumihe makhuva mumpani onrwaa onkoha ole ori mumpani iraka: Akala ahalale? Owo onamwakhula wira: hoye. Nave owo onahimya wira: Mmale! Khavo-tho onromola ntjina n'APWIYA. ¹¹ Tthiri vorumiya n'APWIYA, inupa tjikhani ni tjulupale, tjinukhwanyuliya tjunukhala milepe. ¹² Ikhavalo tjinniwerya thyawa vamwala? Wala nnawerya olima mphareya? Nto nyuwo morukunusa exariya khukhaliha nrette wowinva, morukunusa ehakhi khukhaliha wamwe owaawa. ¹³ Nyuwo mwinnittottopa mahala, mwinnitjona mwiraka: Khahiyo n'ekuru tjihu tjikusalihu nttetthe w'oKamayimi? ¹⁴ APWIYA owerya tjotene anihimya wira: Nyuwo atthu a Israyeli, miyo kinrwaa owihana anakhotto, amalapo wira yonyakeleni okhuma oLebo-hamathi mpakha ekhato y'Araba.