¹ Nyuwo atthu a Israyeli, mwinwe munlelo aka, wokhweliya kiwunlelakani nyuwo. ² Mwali Israyeli omora, ahivenye-tho; owo onrupathi vathi, khavo onwerya ovenyiha. ³ Tthiri Apwiya MULUKU anihimya wira: Nttetthe mmotja wathukumanya vale anakhotto awe ekonto emotja miloko muloko pahi; tanrwaa ohokolowa okhottoni; wathukumanya anakhotto miloko muloko, anakhotto muloko pahi tanrwaa ohokolowa okhottoni, mutthaka ola onahimya atthu a Israyeli. ⁴ APWIYA anahimerya atthu a nloko na Israyeli wira: Nkiphaveleke, wira nkhaleke akumi; ⁵ Vanon'hikiphaveleke oBetheli nnakhala n'hirwee oGiligali, n'hivire oBerixeba; tthiri atthu otene oGiligali anurwaaniya opotthani, vano oBetheli onathatuwa ohikhale etthu. ⁶ Mwaphaveleke APWIYA, wira nkhalane ekumi mwahire tjitjo kinamwapweteja atthu a Israyeli, mor'owo onamwapaha-tho atthi oBetheli, ahikhalaka ntthu onwerya ottipiha. ⁷ Motakhaliya nyuwo munrukunusa exariya khukhaliha wamwe oniva, nyuwo munninyakela vathi nrette w'atthu. ⁸ APWIYA tapakale itheneri, nivoroxa n'asisiri,APWIYA annirukunuxa epiphi khukhaliha othana, awo tanirantteliha othana n'uhiyu; APWIYA annithukumanya matji a mphareya, enamwaraxela imatta tjotene; ntjina naya t'APWIYA: ⁹ APWIYA tanikwnyula mittetthe tjolipihiya, enapwetexa attho owerya. ¹⁰ Nyuwo munniphweliya nale anapwapwela aphuki ohokololowa, mwinnanyokha ale anlavula etjariya omilattuni. ¹¹ Nyuwo munnapuherya alipa othowiya munniwakha tjolya tjaya; tivo khamunrwaa okhala mumpani ntekalinyu ni maluku orera, khamunrwaa owurya ivinyu tja ividera tjinyu mphateyalinyu. ^{12 13} Miyo kotjuwela wira tjottheka tinyu tjiri tjintji ni wira tjotakhala tjinyu ti tjulupale; nyuwo mwinnalupattha anaxariya mwinnakhanyereriha wuvahani miyavulo, mwinnanyanyala alipa ohawa omilattuni. Tivo ntthu owipatsopa vanimalawe okathi owo, okhala wira t'ukathi wotakhala. ¹⁴ Mwetteleke tjorera, ohiya tjotakhala, wira nkhalane ekumi ni wira APWIYA Muluku oweryaxa ekhale ni nyuwo, ntoko tjinihimyanyu. ¹⁵ Nnyokheke tjotakhala, mphenteke orera nrima, n'hokoloxerye exariya omilattuni; yatthuna APWIYA Muluku oweryaxa anamwamorela ikharari atthu a Israyeli ahalae. ¹⁶ Vano APWIYA Muluku oweryaxa, anihimya wira: Mmmawani motene munukhuweliya munliyaka, mwinttettheni motene monokhuweliya wira; Mayii! mayii! nave-tho alipa olima anulattuleliya wunla nno, alipa owunla anulattuleliya wuvithani nno. ¹⁷ Mmatta motene munakhumelela ikuttho, tthiri miyo kinrwaa wohukhumuni, anihimya t'APWIYA. ¹⁸ Otakhaliya t'ale aniwehererya nihuku n'APWIYA! etthu xeni yorera nintthunaya wuwanelani nihuku nno n'APWIYA? Nintthuna okhala nihuku n'epiphi, khanihiyo nihuku nowarya. ¹⁹ Vanulikana ni ntthu onintthyawa kharamu khumphwanya havara, wala ni ntthu onihokolela owani khuphiterya ntata nawe vaxirini, khlumiya n'inowa. ²⁰ Tthiri nihuku n'APWIYA nnuwana epiphi vahikalalevo okokola, ninakhala nihuku noripila vahikhalalevo warya nnakhala vakhani? ²¹ Miyo kinyokha, n'ifesta tjinyu nukokhorela winyu nkinwerya ovilila nnakhala otjiveliya ni mithukumano tjinyu. ²² Makihelela mikuttho tjopahiya ni tjovaha tjinyu, nkinakhela; nkintthuna oweha inama tjinyu tjoneneva tjinkiwanelinyu. ²³ Nthamihe vo malapa awo n'unyakula iwo, nkintthuna-tho winwa itjipo tjinyu n'aviyelinyu. ²⁴ Ohiya vo n'hiyeke exariya ephattuwaka ntoko ehime yowatta matji, n'hiyeke ehakhi ovuva ekhowaka ntoko muro wowatta matji. ²⁵ Nyuwo atthu a Israyeli, khino mwakivaha nkuttho ni tjovaha tjinyu mothakoni iyakha iyo miloko mitjese? ²⁶ Ohiya vo, nnakhanyererihiya okusa ilatarato tjinyu tj'amuluku mwipakelalinyu elatarato ya Sikuthi, mwen'inyu n'ilatarato ya kiyoni, muluku'inyu a itheneri. ²⁷ Nnakusa tthiri okathi ontthunaka wurwaanani okhalihiya ipottha, nlaponi ovikana oDamasiko, anihimya t'APWIYA, yawo anihaniya Muluku owerya tjotene.