¹ Nwiriyane mulumo ala, nyuwo athiyana otjuwanyeya, nyuwo nri omiyakoni w'oSamariya; nyuwo munneneva ntoko inyompe tjothiyana tja oBaxani, mwahaxaka alipa ohawa mwapuheryaka alipa othowiya, nwirelaka exariy'ennyu wira: Nwane otheka niwurye. ² Apwiya MULUKU ahalaphela atthu aya owarya: Anuphiya mahuku anrwaaya opuruliya n'ikwetjo ya yuma, wamotja n'arumey'inyu ntoko ihopa tjinvarihiya ni tjolo. ³ Mmotja mmotja nyuwo nnapuruliya va makokoroni, mapuro okwanyuliya nnakakheliya elapo y'ohitto, anihimya t'APWIYA. ⁴ Nrwee oBetheli, nkitthekele; nrwee oGiligali mwatepeke ottheka, khula vatsitsu nkihelele nkuttho'inyu, khula nihuku noneraru nkiwanele miyavulo tjinyu. ⁵ Nkihelele mikuttho tjotthapela n'phau tjoheliya miropo, nlaleye yovaha enkiwanelinyu votthuna winyu; tthiri tula mwettelo onutjivelani, nuwo atthu a Israyeli, anihimya t'APWIYA. ⁶ Ti miyo kiwanelale etala mittetthe tjinyu tjotene, n'itthoko tjinyu tjotene, nto nyuwo khan'hokolelale wa miyo, anihimya t'APWIYA. ⁷ Ohiya vo ti miyo kikhottale wurupihelani epula okathi wopavelexiya n'imatta tjinyu; kahirupihela epula nttetthe mmotja, khukhottiherya epula nttetthe nkina, epula yahunaniha ematta emotja; ematta ekina khiyarupeliya, khuma; ⁸ Atthu a mittetthe tjikinaku evoliyene ntthona yahirwaa ophavela matji, nttetthe wowattamela khuhiphwanya yaphiyerya omaliha ntthona; vakhanleru tjitjo nyuwo khan'hokolelale wa miyo, anihimya tAPWIYA. ⁹ Miyo kahuwanelani iretta tjintji tja epyo tjinyu; kahuvelelihani elimwe yumihale imatta tjinyu, kahuwanelani natjope okhurale mihokhorokho tjotene tja mmatta mwinyu; vakhanleru ntjito nyuwo khan'hokolelale wa miyo, anihimya t'APWIYA. ¹⁰ Kahuwanelani ipwaluwa tjalikana n'iye tjawanelalyaka atthu a wEjitu kahiwinva okhottoni aximiravo'inyu, kahuwakhani okhottoni ikhavalo tjinyu, kahitjariha ephula tjinyu wunkha wa mirutthu tjahavithiye mmathalani; vakhanleru tjitjo nyuwo khamwahokolelale wa miyo, anihimya t'APWIYA. ¹¹ Miyo kahupwetexani, ntoko tjapwtexalyaka atthu aSodoma ni oGomora, nyuwo n'halale mwari ntoko niwuni nikumihiye veekho; nto nyuwo khan'hokolelale wa miyo, anihimya t'APWIYA. ¹² Vano nyuwo atthu a Israyeli, mwinwe entthunaka owirihani; miyo kinrwaa wuhukhumuni, tivo nyuwo atthu a Israyeli, mwilikanyiherye okumana ni Muluku'ennyu. ¹³ Tthiri Muluku ti yowo upale miyako, yowo opattuxale ipheyo, ti yowo onintjuweliha ntthu tjowupuwela tjawe; onrantteliha othana ni epiphi, onetta vatjulu va miyako; MIYO k'APWIYA, Muluku owerya tjotene, nla ti ntjina nawe.