¹ Nyuwo atthu a Israyeli nwiriyane mutthaka ola anuveleliheryayani APWIYA, nyuwo n'atthu otene yakumihalyaya wEjitu: ² Eriyari ya maloko otene a nlaponi miyo kihuthanlani kihukhapelelani nyuwo pahi, tivo tjotakhala tjinyu ti tjulupale tivo miyo kinamuhukhumuni. ³ Khino alopwana eli anametta ekwah'aya, ehileehanne? ⁴ Khino kharamu onamwipa ntakhwani ahiphwanyale yokhura? Wala mwakharamu onninla munikhukuni mwawe, ahivarale enama? ⁵ Khino mwanuni onnivarihiya vataphani, ahiheleliye mele? Wala ntapha ninnivara etthu ,nihikwannyiye? ⁶ Khino nnamopiya nlope mwinttettheni, atthu khuhituthuwa? Wala ehatsara enumorela mwinttettheni anene APWIYA ehirumale? ⁷ Vekhweli Apwiya MULUKU khanira etthu ehipatjeryale owupululela etsiri aya maporofeta arumeyi aya. ⁸ Kharamu iipaka, tani ohinova? Apwiya MULUKU yalavula, tani ani ehilaleya mutthaka aya? ⁹ Mwalalerye makhulupale a wAxidodi ni makhulupale a wEjitu, mwahimerye wira: Nrwee mwathukumane omnwako w'okherekhere w'oSamariya, mwaweheke tjotakhala tjulupale tjiri eriyari aya, ni miteko tjopuherya tjinvaraya atthu aya. ¹⁰ APWIYA anihimya wira; atthu ala annitjariha inupa tjaya tjitthu tjowin'yiya ni tjakhiye n'uwali, awo khantjuwela eri yoloka ni yaxariya. ¹¹ Vano Apwiya MULUKU anihimya wira: Awanan'inyu! anurukurerya elapo'innyu, anupwexakatsa owerya winyu anukusa mihakhu tjinyu tjotene, n'inupa tjinyu tjolipa tjinapwetjakasiya. ¹² APWIYA anihimya wira: Ntoko makamputsi tjinimwakhawe kharamu metto wala niyaru n'epuri evaralyawe, tjitjo ari vakhanixa atthu oSamariya anrwaa wopowa, anirupatela olili worera, n'itjumatsu yowolowa. ¹³ Nwiriyane tjinihimyaya APWIYA Muluku owerya tjotene, yalopolaka atthu a etthoko ya Yakobe; ¹⁴ Nihuku ninrwaaka wahukhumu atthu a Israyeli mwaha wa tjottheka tjaya, kinamwakwanyula altari oBeteli; inyaka tj'altari awo tjanupwexakasiya, tjinuriheliya vathi. ¹⁵ Kinukwanyula enupa enikhalaya elimwe ni enupa enikhalaya eyta, inupa tjirerihiye ni meno a etthepo tjinukwanyuliya-tho; inupa tjulupale tjinumorihiya, anihimya t'APWIYA.