¹ APWIYA anihimya wira: Atthu oMowabi atepa ottheka, vottharelana, miyo kinamwahukhumu, tthiri awo yahipaha makhuva a mwee a wEdomi khupaka ekhinampo. ² Vano miyo kinumorihela moro elapo y'oMowabi, kinupaha inupa tjolipihi tjoKeriyoti; atthu oMowabi anamwinviya okhottoni, anakhotto ekhuwelelaka malope erumihaka. ³ Miyo kinumpwetexa mwene aya, kinuwinvakatja makhulupale aya otene, anihimya t'APWIYA. ⁴ APWIYA anihimya wira: Atthu oYuda atepa ottheka, vottharelana, kinimwahukhumu; tthiri awo anyemula ekano tjaka khiyatthunale winwelela tjoruma tj'APWIYA, awo ahapuxiya ephiro yorera n'amuluku ethiru yawo yakokhorelaya axitithi aya. ⁵ Vano miyo kinumorihela moro elapo y'oYuda, kinupaha inupa tjolipiya tjo' Yerusalemu ⁶ APWIYA anihimya wyra: Atthu a wIsrayeli atepa ottheka , vottharelana, kinamwahukhumu; tthiri awo ahatumiha anaxariya mwaha wa ntjurukhu, ahatumiha alipa ohawa mwaha wa ixapattho akophaly'aya; ⁷ Awo anninyakela miru tja masikhini ntoko ntthupi na vathi, ni annavelaveliha alipa othowiya; ohiya vo ntthu ni tithi awe annikumana ni nthiyana mmotjaru nanttompe evehqaka ntjina naka nowarya. ⁸ Mapuro ankokhoreliya atthu annirupathela ohiyu mikhumi tjemexeriye n'alipa ohawa yakophelale, mumpani mwa Muluku anniwurya evinyu ewakhalya alipa othowiya. ⁹ Miyo, ohiya vo, kahapwetexa atthu a wamori, yawo yari orakama ni otupa ntoko mitthili, yari olipa ni okhomala ntoko eviko; kahihonona mihokhorokho tjaya otjulu, kahiphela mitathari tjaya vathi. ¹⁰ Ti miyo kokumihaleni elapo ya wEjitu, kiwettiheryaleni mothakoni mpakha iyakha miloko mitjese, kovahaleni elapo ya w'Amori wira ekhale ya winyu. ¹¹ Ti miyo kathanlale atthu akinaku eriyar'inyu wira yulaleryeni mitthaka tjaka, ti miyo kathanlale aNazari. Nyuwo atthu a wIsrayeli, khahiyo tjitjo? anihimya t'APWIYA, ¹² Nto nyuwo mwinnakhanyereriha aNazari awo owurya evinyu; mwinnakhottiherya maporofeta, mwiraka: n'hilaleye mitthaka tj'APWIYA. ¹³ Vano miyo kinamunyakattelani vathi, ntoko ekaro elemeliye mihava; ¹⁴ Khavo ontthuna wopowa nnakhala alipa otthyawa, atthu okhomala ekuru tjinamwamalela, anakhotto otupa khanrwa wopola ekumi aya; ¹⁵ Alipa a mura anamotjela wemela, alipa otthyawa anamotjela otthyawa, anakhavalo khanrwaa wopowa. ¹⁶ Nihuku nenno nave-tho anakhavalo okhomala ni ohova anariha iyuma tjaya tja ekhotto, anihimya t'APWIYA