¹ Okathi nkina kahaweha Apwiya yemelalene vakhuviru v'altari, yiraka: Nttikinye maripu mpakha ottikinya mathipelo, nwivakatje ale anihola; miyo kinamwapwetexa ni xowa ale anrwaa okhala; khuvo onrwaa othyawa, khuvo onrwaa wopowa. ² Yakhuruwela elapo ya alipa okhwa miyo kinamwakumiha mwemmo, yawela mpakha wirimu miyo kinamwakurusa wonwo. ³ Yarwaa wimpitha watjulu wa mwako Karmelo kinamwalupattha wonwo kinamwavara; yarwaa wimpitha mowintjani mwa ephereya , ephavelaka okithyawa kinuruma enowa yulupale waluma. ⁴ Yarwaaniya okhalihiya ipottha n'awanani aya kinunruma xowa owinvakatsa, kinamwathokorerya kaphavelaka opwetexiya, ohikhalale oreriya. ⁵ Apwiya MULUKU owerya tiotene annikwannya elapo,eyo enathukumela, atthu otene anamunla ekuttho ; elapo yotene enutjareya ntoko muro, ni enawelela ntoko muro wa wEjitu. ⁶ APWIYA ateka enupa wirimu ahatala erimu vatjulu va elapo; awo athukumanya matji a mphareya khumwarexela imatta tjotene. ntjina naya t'APWIYA. ⁷ Nyuwo, atthu a Israyeli, khino nyuwo khamunlikana n'atthu a wEtiyopiya vamethoni vaka? anihimya t'APWIYA. khino miyo nkakumihali aFilisti elapo yoKaftori, n'atthu a wArami elapo yoKiri, ntoko tjakumihalyaka atthu a Israyeli elapo ya wEjitu? ⁸ Tjitjanno metho aka anniwehexexa tjottheka tja omwene wa israyeli, miyo kinamwapwetexa otene aya nlaponi mu; nto nkinapwetexa atthu otene a nloko na Yakobe, anihimya t'APWIYA. ⁹ Vano miyo kinuruma overiya atthu a wIsrayeli eriyari ya maloko othene, ntoko tjinveriwaya epyo nthokwani, khivo etthu yotakhala entthuna otthyawa. ¹⁰ Alipa ottheka otene a nloko n'atthu aka, anrwaa winviya okhottoni hata yale anihimya wira : Ehatsara khinrwaa onattamela, nnakhala onomorela. ¹¹ Anuwa-tho mahuku anrwaaka wexa-tho etthoko ya Davidi; eri ntoko nxaxa nophomowa, kinulokiherya mmwe mpwexakasiye, kinuteka-tho enupa eyo omilepe waya kinulipiha-tho ntoko tjaryaya mahuku okhalayi, ¹² Tjitjo atthu a Israyeli anukusa elapo yahalale ya wEdomi, ni malok makina yawo yari awaka khalayi, anihimya t'APWIYA, wira anrwaa omaliha tjirumalyaya. ¹³ APWIYA anihimya wira, mahuku awo alipa ohepha anamwatthara vakhuviru alipa olima ale anala epyo, anuwattamela ale anipaha makuttha, mmiyakoni enukhumelela evinyu enrwaa okhowa vamwala ntoko matji a vamwala. ¹⁴ Miyo kinuhokoloxerya nloko naka na Israyeli elapo aya; atthu anuteka-tho mittetthe tjaya tjikwanyuliye, ekhaleke mwemmo; anuphatteya mirapela tja ewuva ewuryeke evinyu aya; anulima imatta tjaya elyeke tjowimma tjaya. ¹⁵ Miyo kinamwathipeliha atthu aka nlaponi mwaya, khavo-tho onrwaa waphela elapo eyo yavahalyaka, anihimya t'APWIYA Muluku anyu.