¹ Numala wiraneya tjitthu n'ya, Davidi ahatuphela-tho aFilisti, ahaxintta: khwamaliha owerya waya nlaponi mwemmo. ² ahaxintta-tho atthu oMowabi, aharuma orupathi vathi, khaphima ni mukhoyi; miphimo tjene tja mikhoyi minli yahana winviya, mphimo mmotja ehinviyeke; tjitjammo atthu awo oMowabi yahuweriya khukhanyererihiya onliva mposito Davidi. ³ Davidi ahunxintta-tho Hadadezeri mwana a Rehobi mwene oSaba, owo ahuvenyerya ekhotto aphavelaka wuntjererya omwene awe mpakha muro Eufrate. ⁴ Davidi ahavara anakhavalo awe ekonto emotja ni miloko miloko mithanu na minli, ahavara-tho anakhotto awe ikonto miloko minli; ahuthanla ikhavalo tjaphiyerya wettiha ikaro miloko muloko, tjikina ahupipitta metto. ⁵ Atthu a wArami yahuvenya oDamasiko arwaaka onkhaliherya Hadadezeri mwene oZaba; ni Davidi ahatuphela khuwinva anakhotto ikonto miloko minli ni pinli. ⁶ Numala ahakhaliha nlaponi mwa w'Awarami makhulupale anakhotto wira yettiherye elapo, atthu awo a w'Arami yahuweriya khukhanyererihiya onliva mposito Davidi. APWIYA yahunxinttiha Davidi mapuro otene awanawe ekhotto. ⁷ Davidi ahikuxa makula a wero yaisakihanaya anakhotto a Hadadezeri, khurwaana oYerusalemu. ⁸ Ahikusa-tho tjitthu tjintji, tja yuma tjaphwanyalyawe mmittettheni tja Hadadezeri, oBeta n'oBerotayi. ⁹ Nave Toyi mwene oHamathi, watjuwelalyawe, wira Davidi ahaxintta anakhotto a Hadadezeri, ¹⁰ Ahunruma Yorami ari mwananwe orwaa wa Davidi, wira ankhomatje anxukhurelaka, antuphelalyawe ni anweryalaya Hadadezeri: ari-tho nwanani a Toyi owo. Yorami ahurwaanela Davidi tjitthu tja prata, tja wero, ni tja yuma; ¹¹ Davidi ahakhelela tjitthu n'ye tjotene khwarerihela APWIYA, ntoko tjarerihelalyawe eprata ni ewero yakusalyawe okhottoni awakhaka atthu a maloko yaxinttalyawe: ¹² Atthu a wArami, ni oMowabi, n'Amoni, n'aFilisti, n'Maleki, wamotja n'itthu tjakusalyawe tja Hada ¹³ Ni Davidi ahutepa wunnuwihiya okathi, wahokolowawe okhottoni khwawerya anakhotto a'siriya, ikonto miloko mithanu na ttharu okhatoni wa makha. ¹⁴ Okathi owo ahakhaliha makhulupale anakhotto nlaponi motene mwa w'Edomi, wira yettiherye elapo; ni atthu otene a w'Edomi yaninrumela Davidi. Ni APWIYA yahunxinttiha Davidi mapuro otene yawanawe ekhotto. ¹⁵ Ni Davidi ahettiherya elapo yotene ya w'Israyeli; ni aphukelaka atthu milattu tjaya orattene. ¹⁶ Ni Yowabi mwana a Zerwiya ari mulupale anakhotto; Yehoxafathi mwana a Ahiludi, ari nlipa otjuka ilivuru; ¹⁷ Ni Zadoki mwana Ahitubi, ni Ahimeleki mwana Abiyatari, yari alipa a nkuttho; ni Seraya ari nlipa olepa; ¹⁸ Ni Benayahu mwana a Yehoyada, anuwettiherya akereti ni apeleti; yari alipa omwakiha mwene vano aana a Davidi yari alipa a nkuttho.