¹ Okathi, mwene Davidi waryawe vapuwani vawe, avahiyene nrrettele n'APWIYA yamwakihale w'awanani awe otene, ² Ahun'himwrya profeta Natani wira: Vano mone, miyo kinkhala enupa yorera etekiye ni miri tjorika, ni nivuku nowatana na Muluku nipwehiye muhemani. ³ Ni Natani ahumwakhula mwene wira: Nrweeke, mwireke ntoko tjintthun'inyu, okhala wira APWIYA ari ni nyuwo. ⁴ Ni ohiyu yole, APWIYA yahunlavuliha profeta Natani, yiraka: ⁵ Nrwee mwn'himerye nrumeyi aka Davidi wira: Enihimyaya APWIYA tila: Khahiyo nyuwo mwinraa okitekela enupa wira kikhalekemo? ⁶ Okhuma nihuku nakumihalyaka n atthu a Israyeli wEjitu mpakha olelo va, nkinakhale mumpani kimakale vathi v'ehema omaxaxani. ⁷ Kahetta mahuku otene wamotja n'atthu otene a Israyeli, kahakhaliha makhulupale entji wira ewettiherye atthu aka aana a Israyeli, nkinan'himerye mmotja a yawo wira: Exeni ehikitekelalinyu enupa yorera? ⁸ Vano-nto, nrwee, mwan'himerye nrumeyi aka Davidi wira: APWIYA owerya tjotene tanihimya wira: Ti miyo kokumihaleni mmatatani mwalyihanyu-mo ipwittipwitthi n'ipuri, wira kokhaliheni mwene a nloko naka, na Israyeli; ⁹ Miyo kari ni nyuwo mapuro otene yettalinyu, ni kihapwetexa vamethoni vinyu awananinyu otene, ni kihinnuwiha ntjina ninyu, kilikanyihaka n'uvuwa wa makhulupale a vathi. ¹⁰ Ohiya vo, Miyo kinamwathanlela atthu aka anaIsrayeli; elapo yokhalamo, wira ekhaleke elapo yeyo, ni khanvelavelihiya-tho n'awanani aya, atthu otakhala khan'hokolela-tho wahaxa, ntoko tjiralyaya khalayi, ¹¹ Okhuma okathi wakhalihalyaka makhulupale wira ewettiherye atthu a nloko naka Israyeli; ni miyo kinamwavaha atthu aka okumi worera kiwopolaka w'awanani aya otene. Nave-tho APWIYA annulaleryani wira anrwaa wuvahani etthoko. ¹² Vanrwaaya omalela mahuku'inyu, vanrw'inyu ovira nrwaaka okumana n'axitithinyu, miyo kinrwaa onkhaliha mwene mwaninyu, yowo onrwiinyu oyareliwa, miyo kinulipiha omwene awe. ¹³ Ti yowo onrwaa okitekela enupa, ni miyo kinulipiha omwene awe wa mahuku otene. ¹⁴ Miyo kinukhala tithi awe, ni owo onukhala mwanaka. Ni owo attheka vale, miyo kinamwiputtha ntoko tithi, oninttarux'awe mwanawe; ¹⁵ Tivo ororomeleya waka khunrwaa onnyanyala, ntoko tjinkhottalyaka Sawuli, amomolalyaka wira aratteliye ni nyuwo. ¹⁶ Etthoko ni omwen'inyu khunrwaa-tho omala vamethoni vaka; ni ehitje'inyu enulipa mahuku otene ohimala-tho. ¹⁷ Vano Natani ahulavula ni Davidi, khun'himerya mulumo ala otene, ntoko tjanrumalyaya APWIYA. ¹⁸ Ni mwene Davidi ahurwaa oholo w'APWIYA, khwira: Apwiya MULUKU, miyo ki pani, ni etthoko aka ephiyaleni, wira nyuwo nkinnuwiha tjitja? ¹⁹ Vano-nto nyuwo Apwiya Muluku, n'hona wira tjitthu n'ya tjari vakhani, ntthunale wunnuwiha etthoko aka miyo murumey'inyu. Mpakha oholo nkihimeryaka ehinatthi okhumelela, Apwiya MULUKU? ²⁰ Ni miyo exeni-tho entthunaka wohimeryani? Vano, Nyuwo, Apwiya MULUKU, mokitjuwela miyo murumey'inyu. ²¹ Nyuwo nlakelale wira tjitthu n'ya tjulupale votthuna winyu, wira nkilakiherye miyo nrumey'inyu. ²² APWIYA Muluku, vekhweli nyuwo mwalupalexa: khavo onikananinyu, khavo-tho muluku mukina nwihikhalale nyuwo, ti tjitjo tjinwalihu ni maru'ihu okhuma khalayi. ²³ Khino nokhala nloko nikina vathiva, ninlikana ni nloko na Israyeli, niri nloko ninyu? Atthu xeni Muluku awakihalyawe opotthani wira akhalihe atthu awe avahaka ntjina nloko naya, awirelaka tjitthu tjotikinisa, awomolaka awanani aya, nokhala noko nikina ninlikana ni nloko ninyu, nyuwo Muluku, atthu a wEgitu n'amuluku aya? ²⁴ Okhala wira nyuwo n'hathanla atthu'inyu a Israyeli wira mwakhalihe atthu'inyu wa mahuku otene: ni nyuwo, APWIYA, mokhala Muluku aya. ²⁵ Vano, APWIYA Muluku, mmaliherye watana wakilaphelalinyu miyo murumeyinyu ni etthoko aka, mmwirihe mahuku otene, ntoko tjihimalinyu. ²⁶ Ntjina ninyu ninnuwihiye wa mahuku otene, atthu ehimyeke wira: APWIYA owerya tjotene ti Muluku a Israyeli; ni etthoko ya Davidi murumey'inyu elipihiyeke oholo winyu vohimala-tho. ²⁷ Tthiri nyuwo APWIYA oweryaxa, Muluku a Israyeli, nkihimerye etthu ela miyo murumey'inyu, nyuwo mmantjinyu , nkihimeryaka wira: Miyo kinamutekelani enupa. Tivo miyo murumey'inyu kolipiha nrimaka kulapelakani tjitjo. ²⁸ Vano-tho, nyuwo APWIYA Muluku, ntyuwo ti Muluku, mulumo'inyu t'ekhweli, nyuwo mokileherya tjorera tjulupale miyo murumeyinyu. Vano, nrerele nrima etthoko ya murumeyinyu ola, wira okati t'ukathi yetteke vamethoni vinyu: ²⁹ Vano tthiri ti nyuwo, APWIYA Muluku, nlavulale, mwareriha etthoko ya murumeyinyu etthoko yeyo enutepa oreriya mahuku otene.