¹ Davidi ahathukumanya-tho anakhotto othanliya a Israyeli, ikonto miloko miraru. ² Ni Davidi ahuvenya, n'atthu otene yarinawe, khurwaa oBayala w'oYudeya, wira arweeleke nivuku na Muluku, navahiye ntjina n'APWIYA oweryexa, okomale vehitjeni watjulu v'akerubi. ³ Yahukumiha nivuku na Muluku, mumpani mwa Abinadabi, yari vanttumuxani khwintjathiki vakaroni esya: Uza ni Ahiyo, asan'awe Abinadabi, yanettiha ekaro eyo. ⁴ Uza anetta vakhuviru nnivuku na Muluku, Ahiyo anuhola. ⁵ Davidi n'atthu otene a Israyeli yanatthapela APWIYA ni nrima aya wotene yipaka ni ekoma tj malapa; ni malope, ni viyela, ni pankwe, tjuntju, tthakare. ⁶ Waphiyalyaya vapuwani va Nakoni, Uza ahokolela mono nivuku na Muluku, khuvarela; okhala wira imompe tjahukwakwattula. ⁷ Ni APWIYA yahunviruwela Uza ventji, khumwinva mwaha wohittittimiha ono, Uza ahukhwela vavo vakhuviru va nivuku na Muluku. ⁸ Davidi ahuripiya nrima ventji okhala wira APWIYA yahun'hukhumu Uza n'uviruwa waya: ni nipuro nno nahihaniya ohukhummwa wa Uza, mpakha olelo. ⁹ Ni Davidi ahuwova APWIYA nihuku nenno, khwira: Nivuku n'APWIYA nikeleke tjayi mumpani mwaka? ¹⁰ Tivo, khatthunale, Davidi orwaaniya nivuku n'APWIYA mumpani mwawe mwinttettheni mwa Davidi; nto Davidi ahiruma wintjathiya mumpani m'oBadi-Edomi ari ntthu oGathi. ¹¹ Nivuku n'APWIYA nahukala mumpani m'oBedi-Edomi mpakha miyeri mraru: ni APWIYA yahunreriha oBedi-Edomi owo n'itthoko awe yotene. ¹² Mwene Davidi ahuhimeriya, wira: APWIYA anreriha oBadi-edomi ni etthoko awe, ni tjitthu tjotene tjirinawe, mwaha wa nivuku na Muluku. Nave ahurwaa, khutatiha nivuku nno na Muluku athamihaka vapuwani vawe oBedi-Edomi nttetthe wa Davidi n'uttittimiha wulupale. ¹³ Ni yettaka tjitjale ekuxalene nivuku na Muluku yahemela imara thanu na pinli, wira Davidi ahite khuta emara emompe yolopwana ni mwanyompe oneneva ahelaka mukuttho. ¹⁴ Ni Davidi anitupha ni ekuru tjawe tjotene oholo w'APWIYA; awaralene efodi yorika. ¹⁵ Tjitjammo Davidi n'atthu otene a Israyeli yahuthata nivuku n'APWIYA yopaka ilulu ni makuphi ni malope. ¹⁶ Okathi nivuku nowatana nakelaya nttetthe wa Davidi, Mikali mwana nthiyana a Sawuli ahuthurumela vatjanelani khunweha mwene Davidi inaka ni ekuru tjawe tjotene oholo w'APWIYA: ni khunthanya mmurimani mwawe. ¹⁷ Vano, nivuku n'APWIYA, nahukelihiya enupa ya mwene, khwintjathiya nipuro nolokiheriya variyari v'ehema yatekelalyawe Davidi: numala ahahelela APWIYA mikuttho tjopahiya ni mikuttho tj'opatthani. ¹⁸ Vamalihalyawe ohela mikuttho iyo, Davidi ahareriha atthu awe otene wa ntjina n'APWIYA oweryaxa. ¹⁹ Ni ahakawela atthu otene a Israyeli, alopwana n'athiyana, ephawu emotja ninama yowoxiya, ni mihokhorokho tja mmatta. Atthu otene yahulya, numala khurwaa owannyeya. ²⁰ Okathi Davidi wahokolelawe vapuwani vawe wira arerihe enupa awe: Mikali mwana a Sawuli ahikhuma khurwaa okumana ni Davidi, khun'himerya wira: Mwene a Israyeli ovuwihiya olelo, arulaka ekuwo tjawe oholo w'arumeyi awe athiyana, ni epottha tjawe tjothiyana, ntoko ari ntthu ohinoneliya vatthu! ²¹ Nave Davidi ahumwakhula Mikali wira: Miyo kinale oholo w'APWIYA, yawo akithanlale nipuro n'atithinyu ni amutj'inyu otene, wira ekikhalihe mwene a Israyeli, niri nloko naya APWIYA, oholo w'APWIYA tintthunaka winyeviha. ²² Kinutepa winyeviha oholo w'APWIYA, ni vamethoni vaka; masi vamethoni v'arumeyi anahimy'inyu, miyo kinuttittimihiya. ²³ Ni Mikali mwana a Sawuli khanayare mpakha okhwa wawe.