¹ Atthu a mahimo otene a Israyeli yahurwaa okumana ni Davidi oHebroni, ni khun'himerya, wira: Hiyo niwale va na makhuva'inyu ni erutthu'inyu. ² Khalayi, okathi wa Sawuli waryawe mwene, ti nyuwo mwahola atthu a Israyeli okhottoni. Ohiya vo, APWIYA yahuhimeryani wira: Ti nyuwo mwinrwaa owettihaka atthu aka a Israyeli, ni nyuwo mwinrwaa okhala mwene aya. ³ Vano, Davidi ahatana ni makhulupale otene a Israyeli, yawale okumana ni yowo oHebroni, va methoni v'APWIYA; ni yahumottiha makhura owo khukhala mwene a Israyeli. ⁴ Attikhiyaka omwene Davidi arina iyakha miloko miraru, khuwettiherya atthu awe iyakha miloko mitjese. ⁵ Ahuwettiherya atthu oYuda oHebroni iyakha thanu na pinli ni miyeri mithanu namotja: ni oYerusalemu iyakha miloko miraru ni miraru. ⁶ Nave Davidi ahuvenya n'anakhotto awe arwaaka otuphela nttetthe woyerusalemu awanaka naGebusi yakhala elapo yeyo; AGebusi awo yahun'himerya Davidi, wira: Nyuwo khamwinkela mu, atthu ale ahinona nale orakala anuphiyerya owomolani; ni yupuwela wira Davidi kharoo okela. ⁷ Masi Davidi ahikusa nipuro nolipihiya vamwako Siyoni, vavo wihaniyaya nttetthe wa Davidi. ⁸ Nihuku nenno Davidi ahulaleya wira: Mwatthunaka watuphela AGebusi ni wapwetexa, nvireke munikhukuni mwaviraya matji oomuro, ni alipa ohona ni orakala, Davidi onuphweliya n'awo? Tivo vanihimiyaya wira: Ntthu ohona ni orakala ahikele mumpani mw'APWIYA. ⁹ Ni Davidi ahukhala nipuro nne nolipihiya khwihana nipuro nne nttetthe wa Davidi: Ni ahuteka manupa arukurerihaka, okhuma oMilo mpakha n'hina. ¹⁰ Davidi ahutepa olipihiya n'uvuwa, ni APWIYA Muluku owera tjotene yari ni yowo. ¹¹ Ni Hirami mwene oTiro aharumihela wa Davidi anamitthaka, ni miri tjorika ni tjorera, ni makalapintero, ni mapeterero, awo yahuntekela Davidi enupa awe. ¹² Ni Davidi owo ahikupalela wira APWIYA yahun'khaliha mwene a Israyeli, ni wira yahunnuwiha omwene awe mwaha wa Israyeli atthu aya. ¹³ Wakhumalyawe oHebroni attamelaka oyerusalemu Davidi ahathela axarawe akina ahakusa ahawala akina-tho, khuyareliya asana axilopwana ni axithiyana. ¹⁴ Matjina aya asanawe ayareliyawe oYerusalemu t'ala: Xammuwa, ni Xobabi, ni Natani, ni Salomoni, ¹⁵ Ni Yibihari, ni Elixuwa, ni Nefegi, ¹⁶ Ni Yafiya, ni Elixama, ni Eliyada, ni Elifelethi. ¹⁷ Afilisti watjuwelalyaya wira Davidi ahukhalihiya mwene aatthu otene a Israyeli, aFilisti otene yahuthukumana khuvenya arwaaka ontuphela: watjuwelalyawe Davidi, ahutthyawela nipuro nolipihiya. ¹⁸ Ni aFilisti yahuntthamakela wonwo, khumaka okhatoni w'oRefayimi. ¹⁹ Nave Davidi ahakoha APWIYA, wira: Katupheleke aFilisti? Nnakivaha mmatatani mwaka? Ni APWIYA yahumwakhula wira: Mwatupheleke, miyo kinamuvahereryani aFilisti mmatatani mwinyu. ²⁰ Ni Davidi ahatuphela aFilisti oBayali-Perasimi, ni wonwo ahaxintta, khuhimya wira: APWIYA ahamwarexa awanani aka, ntoko tjimmwaraxeliy'aya matji mmatta. Tivo-nto nipuro nno nihaniy'aya Bayali- Perasimi. ²¹ Ni aFilisti yahuhiya vavale ilatarato tj'amuluku aya, Davidi n'atthu awe yahuttotta khukusa. ²² Emara ekina aFilisti yahurwaa watuphela atthu a Israyeli, khumaka okhatoni w'oRefayimi. ²³ Ni Davidi ahakoha APWIYA, awo khumwakhula wira: N'hatuphele oholo; nto mwarukurerye nviraka ottuli waya, mwathate atthu'inyu vavale elikaneke watuphela vakhiviru ni miri tjonukhela: ²⁴ Mwinwa ntoko mukhitto wa inawu watjulu wa miri in'ye, nave mwatuphele awananinnyu; okhala wira APWIYA anamuholelani orwaa wapwetexa anakhotto aFilisti. ²⁵ Davidi ahupanka ntoko tjarumiyawe n'APWIYA; khwapwetexa aFilisti awomolaka okhuma oGeba mpakha oGezeri.