¹ Numala winwalyawe mwana a Sawuli wira Abineri ahinviya oHebrani, matat'awe yahunttettheya, ni atthu otene a Israyeli yahuvelavela. ² Ni mwna Sawuli ahukhalana alopwana eeli, yari makhulupale anakhotto, mmotja ntjina nawe ihaniya Baana, ni nkinaku ihaniya Rakabi, awo yari aana a Rimmoni nttetthe w'oBeyerothi, a nihimo na Beniyamini: (Okhala wira nttetthe w'oBeyerothi wari wa Beniyamini; ³ Ni atthu ooBeyerothi yahutthyawela oGitayimi, khukhala wonwo ntoko atthu oowa mpakha olelo.) ⁴ Yonathani, mwana a Sawuli, ahukhalana mwanawe orakala metto tjominli arakalale anarina iyakha mithanu: okathi w'awaniyaya ehapari y'okhwa wa Sawuli ni Yonathani wIzireyeli, okathi yowo yay'awe ahunkusa wira atthyawane; ni atthyawaka tjitjale ni wakuva, mwanamwane owo ahumora ni khurakala. Mwana owo ntjina nawe ihaniya Mefiboxethi. ⁵ Vano, aana a Rimmoni oBeerothi, Rekabi ni Baana, yahuvenya khuphiya owannyawe Ixiboxethi othana eriyari okathi waluttuwaya ntjuwa, Ixiboxethi ira arupathiki amumulaka othana eriyari. ⁶ Nthiyana atsunka nkhora ekhove tjahunveliha okathi waverawe etiriku khurupa, Rekabi ni Baana yahukela mumpani ehitjuweliyaka; ⁷ Vano numala yahukela withela warupawe, Ixiboxethi volilini vawe, khumwinva, ni khumwikittha exiko, yahikusa muru awe khurwaa, yehetta ohiyu wotene ettharaka ephuro ya wAraba. ⁸ Waphiyalyaya oHebroni yahunrwaanela Davidi muru wa Ixiboxethi, khun'himerya mwene wira: Ola va muru wa Ixibixethi mwana a Sawuli nwanan'inyu, aphavela owinvani; ni olelo APWIYA anreriha mwene pwiy'ihu, emunlelaka ekuhu Sawuli ni amutji awe. ⁹ Davidi ahuwakhula Rekabi ni Baana, aana a Rimmoni oBeerothi, wira: Knulapha ntjina n'APWIYA yawo akakiheryale tjotakhala tjotene, ¹⁰ Ole akihimeryale, wira: Sawuli ohokhwa upuwelaka wira awanale mihupi tjorera, miyo kahuntthukela, oZikilagi khumwinviha tjitjo ahiliviya mwaha wa ehali yawanalyawe. ¹¹ Vanutepa-tho vano nyuwo atakhali khammwinvale ntthu ohitthekale, mumpani mwawe, ni volilini vawe? Vano, miyo kinamukohani mwaha wephome awe mmwarenxanyu, nkinuhukhumuni nlaponi mu mwa vathi? ¹² Nave Davidi aharuma alopwana awe, ni awo yahuwinvakatsa, ni yahikittha matata n'inawu tjaya, khutthukelela mirutthu tjaya vehimeni, v'oHebroni. Numala yahukusa muru wa Ixiboxethi khuvitha mmahiye mwa Abineri oHebroni.