¹ Ekhotto yawaniya n'atthu a Sawuli n'atthu a Davidi khiyamalale nannanoru, nto Davidi anivira atepaka olipihiya, ni amutji awe Sawuli yanutepa ohiroromeleya. ² oHebroni Davidi ahuyareliya asan'awe: Mwana opaceriya ihaniya n Amoni, ayariye n'Ahinowami wIzireyeli; ³ otthikela ari Kileyabi, ayariye n'Abigayili yowo ari mwarawe Nabali, ookarmeli; onattharu ari Abasalomi, ayariye ni Maaka, mwana a Talimayi mwene oGexuri: ⁴ Onetjese, ari Adoniya ayariye ni Agithi; onethanu, ari Xafstiya ayariye ni Abitali; ⁵ Onethanu namotja, ari Yitireyami, ayariye ni Egla mwarawe Davidi. Asanawe ala otene Davidi ayareliye oHebroni. ⁶ Okathi wawaniyaya ekhotto ni etthoko ya Sawuli n'itthoko ya Davidi, Abineri tatepale wunnuwa eriyari y'atthu a Sawuli. ⁷ Sawuli owo ahitoko on'hawela nthiyana mmotja ntjina nawe Rispa, mwana a Aiya. Nihuku nimotja Ixiboxethi ahumpwapwela Abimeri iraka: Mwinkuselaleni hawala a'tithi aka? ⁸ Ni Abineri ahuviruwa ventji mwaha wa mulumo ala khun'himerya Ixiboxethi wira: Khino miyo ki mwalapwa karumelaka Ayuda? Okhuma khalayi kanivarelaka nteko etthoko y'atithinyu, n'axunnaya, n'apatthani aya vororomeleya, miyo nkovahaleni mmatatani mwa Davidi; vano nyuwo olelo mwinnikipwapwela mwaha wa nthiyana ola? ⁹ Muluku akitakhalihe olelo miyo kahipacereru onvarela nteko Davidi, wira tjikhumelele tjitthu tjanleheralyaya APWIYA, ¹⁰ Tthiri APWIYA yahun'himerya wira yrwaa wakha omwene etthoko ya Sawuli nunkhaliha Davidi mwene a elapo yotene ya Israyeli ni ya Yuda, okhuma oDani mpakha oBerixeba. ¹¹ Ixiboxethi khamwakhulale etthu Abineri, okhala wira anawova ¹² Abineri aharuma anamitthaka awe orwaa oHebroni on'himerya Davidi, wira: Ti pani onrwaa wettiherya elapo ela? Ni ahimeriye wira: Mwatane ni miyo, ni miyo kinamukhaliheryani wira atthu otene a Israyeli yinwanane ni nyuwo. ¹³ Davidi ahumwakhula wira: Varera; Miyo kinamwatana ni nyuwo: nto kinamotumereryani etthu emotja pahi, wira, mwawaka ono n'hikumane ni miyo n'hikiwanelaka Mikali mwaraka mwana a Sawuli, mwaawaka okiweha. ¹⁴ Dasvidi aharuma-tho anamotthaka awe orwaa on'himerya Ixiboxethi mwana a Sawuli, wira: Nkittikiherye mwaraka Mikali, yowo kanthumalyaka kiwinvaka aFilisti miloko muloko. ¹⁵ Ixiboxethi ahuruma orweeliya Mikali, akhiyaka Paltiyeli, mwana Layixi. ¹⁶ Paltiyeli owo ahuntthara mwarawe, mpakha oBahurumi unlaka. Ni Abineri ahun'himerya wira: Nrweeke, n'hokoleleke owani. Nave owo khuhokolela owani. ¹⁷ Abineri ahurwaa ovanela ni makhulupale a Israyeli, wira: Mpacerale khalayi ni ntjana omunlela Davidi wira akhale mwen'inyu; ¹⁸ Vano, okathi, wophiya; okhala wira APWIYA ahimya wa Davidi, wira: Kinunkhaliha nrumeyi aka Davidi wira kiwakiherye atthu aka a Israyeli mmatatani mw'aFilisti, ni mmatatani mw'awanani aya otene ¹⁹ Abineri ahuvanela-tho tjitjo n'atthu a nihimo na Beniyamini: ni ahurwaa oHebrani khun'himerya Davidi tjitthu tjotene tjaiwananalyaya atthu a Israyeli n'atthu a nihimo na Beniyamini. ²⁰ Vano, Abineri, ahurwaa okumana ni Davidi oHebrani, aholiyaka n'alopwana miloko minli: ni Davidi ahumpakela yolya Abineri owo natthu awe awanalyawe. ²¹ Ni Abineri ahin'himerya Davidi wira: Miyo kinrwaa, wuthukumanyeryani atthu otene a Israyeli nyuwo mwene aka, awo anamwatana ni nyuwo, ni nyuwo mwinraa olamula elapo ela yotene ntoko tjaapelinyu. Davidi ahunlaxerya Abineri, ni owo khuhokolela elapo awe ni nrettele. ²² Abineri avenyalyawe wa Davidi oHebroni alaxeriyene ni nrettele, Yowabi ni akhulupale akina anakhotto a Davidi yahuhokolwa okhottoni, ewaanaka tjitthu tjintji tjaakhalyaya. Abineri khakhalale wamotja ni Davidi oHebroni, okhala wira ahulaxeriyan ni ahurwaa ni nrettele. ²³ Yowabi aphiyakaru, n'atthu awe otene, ahuhimeriya, wira: Abineri mwana a Neri owale okumana ni mwene, mwene ahunlaxerya, owo khurwaa ni nrettele. ²⁴ Nave Yowabi ahurwaa okumana ni mwene, ni khunkoha wira: Mwirelaleni? Abineri awale okumana ni nyuwo; mwin'hiyeraleni orwaa ni nrettele? ²⁵ Nyuwo khannintjuwela Abineri mwana a neri wira owo owale owotothani, aphavelaka ohottela makhumelo'inyu ni mavolowelo'inyu, ni ohottela tjotene tjimpak'inyu? ²⁶ Akhum akaru wa Davidi, Yowabi aharuma alopwana ontthamakela Abineri wira yan'hokoloxerye ottuli, awo yahumphwanya wehimeni w'osiro khun'hokoloxerya ottuli, Davidi ahitjuwelaka etthu. ²⁷ Abineri aphiyakaru ohebroni, Yowabi ahunrwaana okhwipi vamukhora, anlavulihaka n'upatthani, ni vavale ahunhoma niparari nonethanu, ekuhu tjomwinva n'himawe Asaheli, ni Abineri khukhwa. ²⁸ Davidi ayjuwelakaru etthu ela, ahira: Oholo w'APWIYA, miyo ni etthoko aka, khanrina mulattu mwaha w'okhwa wa Abineri mwana a Neri, mahuku ²⁹ otene. Ephome awe emwarele vamuru va Yowabi, ni vapuwani v'atithi awe; mahuku otene vapuwani va Yowabi tjikhumeleleke iretta, nutakhaliya, n'ikhotto, n'itala. ³⁰ Nave Yowabi ni Abixayi n'himawe yahumwinva Abineri, emunlelaka ekuhu vamwinvalyawe Asaheli n'himaya, okhottoni w'oGabawoni. ³¹ Nave Davidi ahun'himerya Yowabi, n'atthu otene yarinawe: Nkheratje ekuwo tjinyu, nware mattapwatta, mmunlelaka Abineri. Ni mwene Davidi ahutthara nrepa vataleliyaya murutthu. ³² Abineri ahuvithiya oHebroni: Mwene ahunla vamahiye vawe, atthu otene yahutjikula ³³ Numala mwene ahipa ntjipo nna amunlelaka Abineri, iraka: Khino Abineri anuphwanela okhwa ntoko tjinkhwaya alolo? ³⁴ Matat'inytu khiyatthukiye, nnakhala inawu tjunyu khitjavariye n'unyolo; nyuwo nkhwale ntoko tjinkhwelawe ntthu mmatatani mw'alolo. Ni atthu otene yahimunlela Abineri. ³⁵ Ni atthu otene yahuwa khunvaha yolya wira alyeke vahinatthi wila, Davidi ahulapha, iraka: Kitakhalihiye n'APWIYA, kalyaru yolya, wala etthu ekina ntjuwa nihikelale. ³⁶ Atthu otene watjuwelalyaya, yahuntthapela mwene; ni yahunkupalela wira anipanka tjitthu tjorera vamethoni v'atthu otene. ³⁷ Nihiku nenno atthu otene a Yuda ni atthu otene a Israyeli, yahutjuwelexa wira khahiyo mwene t'amwinvihale Abineri mwana a Neri. ³⁸ Ni mwene ahahimerya atthu awe wira: Khamwintjuwela wira olelo ohokhwa nkhulupale, ari nkhulupale mulipale? ³⁹ Ohiya miyo okhala mwene ottikittheliya kottettheya; atthu ale, aana a Zerwiya, totepa owali: APWIYA yalivele tjotakhala tjaya, ni tjotakhala tjolikana.