¹ Numala tjitthu n'ya Davidi ahakoha APWIYA, iraka: Kihokoleleke nlaponi m'oYuda mwinttettheni mwaya? Ni APWIYA yahumwakhula wira: N'hokoleleke . Ni Davidi ahakoha-tho wira: Kirwee kakhale nttetthe xeni? Ni APWIYA khun'himerya wira: Mwakhale oHebroni. ² Davidi ahurwaa okhala oHebroni, wamotja n'axarawe eeli, Ahinowami a wIzireyeli ni Abigayili, ari mwarawe Nabali oKarmeli. ³ Davidi ahuwihana-tho anakhotto awe wira awe n'atthu a itthoko tjaya, awo ahuwa wa khula ntthu ni etthoko awe; awo ahuwa khukhala mittetthe tjattamale oHebroni. ⁴ Ni atthu a Yuda yahurwaa oHebroni, khunttikha Davidi omwene w'oYuda. Ni ahuhimeriya, wira: Atthu oYabexi oGalaadi ti yanvithale Sawuli. Ni Davidi aharuma anamitthaka orwaa oYabexi wonwo w'oGalaadi, wahimerya atthu awo wira: Atthu ooYabexioGalaadi ti yanvithale Sawuli. ⁵ Ni Davidi aharuma anamitthaka orwaa oYabexi wonwo w'oGalaadi, wahimerya atthu awo wira: APWIYA yurereleni nrima nyuwo, nkhalale ororomeleya mpakha onvitha Sawuli mwen'inyu. ⁶ Vano-tho, APWIYA, ewirleni tjrera n'umoriya waya ekhiriri ni ekhweli aya; ni myo-tho kinamurerelani nrima mwaha wa tjrera tjimwirelalinyu mwene. ⁷ Vano, n'hotjeye, nkhale atthu okhomala; ntjuwele wira vakhwalyawe mwen'[inyu Sawuli, atthu oYuda akittikha miyo wira kikhale mwene aya. ⁸ Nto Abineri mwana a Neri, nkhulupale anakhotto a Sawuli, ahunkusa Ixiboxethi mwana a Sawuli, anrwanaka omaxaxani: ⁹ Khunlaleya okhala mwene oGalaadi, wAsseri, wIzireyeli, wEfayimi, oBeniyamini, n'atthu otene a Israyeli. ¹⁰ Wattikhiy'awe omwene wa Israyeli Ixiboxethi arina iyakha miloko mitjese; khuwettiherya atthu awe iyakha pinli. Nihimo na Yuda pahi nahuntthara Davidi. ¹¹ Davidi owo ahuwettihera atthu a nihimo na Yuda oHebroni, mpakha iyakha thanu na pinli ni miyeri mithanu namotja. ¹² Ni Abineri mwana a Neri yahikhuma oMahanayimi arwaaka oGabawomi n'anakhotto a Ixiboxethi mwana a Sawuli. ¹³ Ni Yowabi a Zerwiya, n'anakhotto a Davidi, yahikhuma wira yavirikanye otene aya yahukumana okherekhere wa omuro wattamelale oGabawoni: atthu Abineri ekhopela ekina, ni atthu a Mowabi ekhopela ekina. ¹⁴ Ni Abineri ahun'himerya Yowabi wira: Nathanle amiravo akina, ewaneke oholo wihu. Ni Yowabi ahumwakhula wira: Ayo nathanleke. ¹⁵ Nave-tho yahuthanliya, elikanyihiyaka alopwana muloko napinli, a nihimo na Beniyamini ephantti ya Ixiboxethi mwana a Sawuli; n'alopwana akina ephantti ya Davidi. ¹⁶ Ni khula mmotja ahunvara nwanani awe vamuru, n'homaka ni ekatana mpararini mwawe, otene yahukhwa wamotjaru; tjitjammo, nipuro nne n'oGabawoni, yahihaniya ematta ya maparari. ¹⁷ Ni yahuwana nuwali othana wotene, ni Abineri n'atthu a Israyeli yahuweriya n'anakhotto a Davidi. ¹⁸ Okhottoni wonwo yahukhala asana araru a Zerwiya: Yowabi, n'Abixayi, nAsaheli. Asaheli owo ari oveya metto anitupha ntoko naha. ¹⁹ Asaheli owo ahuntthara Abineri, arwaaka otthuli w'anakhotto ahihuluwelaka mono wolopwana nnakhala mono wothiyana. ²⁰ Ni Abineri ahuweha ottuli, ni khun'himerya wira: Khamuhiyo nyuwo Asaheli? Ni owo ahumwakhula wira: Ayo ti yomi. ²¹ Nave Abineri ahun'himerya wira: N'apuwele mono wolopwana wala wothiyana, mwintuphele mmotja anakhotto akina, ni mmwakhe mavakawe nrweeke. Vanonto Asaheli khuhitthuna on'hiya Abineri arwaaka wokina. ²² Ni Abineri ahun'himerya-tho Asaheli wira: Nkihiye nrweeke, n'hikikhanyererihe owinvani, numala kawerya tjayi okumana ni munninyu Yowabi? ²³ Ni ahitthunaka owo orwaa, Abineri ahun'homa mirima, apwahihaka nivaka nawe mpakha ettuli, Asaheli ahumorela vathi, khukhwela vavo. Ni otene ale yantthamakela ottuli, vamphwanyalyaya Asaheli akhwalene, yahemelatja. ²⁴ Nto Yawabi ni Abixayi yahupwaherya oholo emomolaka Abineri; ni ntjuwa nikelaka yahuphiya omwako Amma, wattamela oGiya, ephuro enrwaa wothakoni w'oGabawoni. ²⁵ Wonwo anakhotto a nihimo na Beniyamini yahuthukumana emwakiheryaka Abineri, otene wamotja khuthatana watjulu wa mattumusa. ²⁶ Ni Abineri ahunkhuwelela Yowabi, wira: Mpakha lini ninrw'ihu winvanana? Khamwintjuwela wira tjotene tjinrwaa omalela motakhaliwani pahi? Hiyo ni amutj'innyu nnahimeryua lini atthu'inyu wira ehiye onomola? ²⁷ Ni Yowabi ahumwakhula wira: Mwaha wa Muluku nkumi mwahakuvelale olavula, atthu aka yanawulupatthani ohiyu ola wotene ²⁸ Nave Yowapi ahuruma wopiya nipetta, atthu awe otene yahemela khiyawomolale-tho atthu a Israyeli, ekhotto khumala. ²⁹ Ni Abineri n'anakhotto awe yahetta ohiyu ole wotene, eviraka elapo ya wAraba yahulapuwa muro Yordani, khuvira yettaka mpakha ophiyaoMahanayimi. ³⁰ Yowabi vahiyalyawe omomola Abineri, ahathukumanya atthu awe otene, anakhotto a Davidi yanihala alopwana muloko n'athanu n'atjese, on'hiya Asaheli. ³¹ Nto atthu a Davidi yahuwinva anakhotto miloko miloko miraru n'atthu miloko mithanu na motja a nihimo na Beniyamini yaholiya ni Abineri, murutthu w'Asaheli wahikuxiya khuvithiya oBethelehemu mmahiye mw'atithi awe. ³² Ni Yowabi n'anakhotto awe yahetta ohiyu wotene, khuphiya oHebroni mmeloni mwaya vatsitsu.