¹ Ni ahihimeriya Yowabi wira: Mwene onamunla, onimunlela Abasalomi. ² Ni nihuku nne wahirukunuwa khukhala oripiya nrima w'atthu otene; okhala wira wahihimiya nihuku nne wira ampewe yanunla ventji amunlelaka mwan'aya. ³ Nihuku nenno anakhotto yahihokolela onttettheni omaleene, yalikana n'anakhotto yatthyawale okhottoni, yahihokolela owani yulihiyeene muru. ⁴ Vano mpewe, ahikhunela muru, antepa okhuwela wira: Mwan'aka Abasalomi, mwan'aka Abasalomi, mwan'aka, mwan'aka! ⁵ Yowabi ahirowa okumana ni mpewe, ahikela mpani khun'himerya wira: Nyuwano elelo nnamwalihiha muru anakhotto anyu otene, awo awo awopolani elelo, nyiuwano n'axanennyu axilopwana n'axanennyu axithiyana, n'axarinyu, n'asetinnyu, ⁶ Nyuwano munnaphenta ale anunyokhani, munnanyokha ale anuphentani: Nyuwano elelo motonyiheriya wira khannanela vatthu makhulupale anakhootho'inyu; nnakhala anakhotto awo; kotjuwela tthiri wira elelo Abasalomi ari nkumi, nakhwatja hiyano otene, nyuwano mwantteliya nrima elelo. ⁷ Vano, mmuwe, nkhumele ota, mwalavulihe anakhotto mwarereihe nrima: Kinalaphela ni ntjina n'APWIIYA, wira ohala ni nyuwano, melo ohihiyu; ahatjarela yanrowa okhala yulupalesa ovikana etakhali yotene tjaphwanyani okhuma enamwenennyu mpaka va. ⁸ Mpewe ahivuwa khurowa, wokoma vankhora; n'anakhotto otene yahinwa wira: Davidi ahokoma vankhora. Ni yahiwa anakhotto otene oholo wa mpewe; vano anakhotto a Israyeli yahitthyawatja, khurowatja khula ntthu owannyawe. ⁹ Atthu otene yanivanyihana a maloko otene a Israyeli, yiraka: Mpewe onopola mmatatani mw'awananihu, owo onopola mmatatani mw'afilisti; vano okhanyererihiwa otthyawa, nlaponi mu mwaha wa Abasalomi. ¹⁰ Abasalomi, owo onthanlalehu okhala mpew'ehu, okhwa okhottoni. mumpitjeryani, on'hokoloxerya mpewe Davidi? ¹¹ Malumo ala yalavul'aya atthu a Israyeli yahimphwanya mpewe Davidi, Owo aharuma atthu orowa wahimerya alipa a mukuttho Zadoki ni Abiyatari wira: Mwahimerye makhulupale aYuda wira: Exeni emphavelennyu okhala okhitjerya onhokoloxerya mpewe owannyawe? ¹² Nyuwanotje mwaxinnaka; nyuwanotje mwa makhuv'aka ni erutthu aka; nyuwanotje khamunrowa okhalatja okhitjerya on'hokoloxerya mpewe munttetthe? ¹³ Vano mwan'himerye-tho Amasa wira: Nyuwo khan'hiyo makhuv'aka ni erutthu aka? Muluku akitakhalihe, miyano kahuvaheni okhulupale, nipuro na Yowabi. ¹⁴ Malumo a Davidi yahikupaliya n'atthu otene aYuda, awo n'inrima mmotjaru, yaharuma atthu orowa on'himerya mpewe wira: N'hokoleye,

nyuwano n'arumey'innyu otene. Vano, mpewe, ahivuwa khuhokol;ela owannyawe, vaphiyalyawe omuru oYordani.

¹⁵ Ahaphwanya atthu aYuda yawale oGiligali, okumana ni mpewe wira anlapuxe muro. ¹⁶ Ximeyi oBahurimi mwana a Gera, a nihimo Beniyamini, t'akuvale orowa n'atthu aYuda okumaana ni mpewe Davidi; ¹⁷ Ximeyi owo ahawana alopwana ekonto emotja a nihimo na Beniyamini; vano-tho Ziba nrumeyi a etthoko ya Sawuli, ahirowa ni yowo vamotja n'asanaawe nloko nathanu n'arumeyi awe miloko mili, atthu ala otene yahipatjerya ophiya oYordani. ¹⁸ Khulikaniha tjotene wira anlapuxe mpewe n'atthu a etthoko awe, amwiiwelelaka tjotene tjaphavelawe. Vano okathi mpewe valapuw'awe muro Ximeyi owo mwana a Gera ahoroma oholo wa mpewe. ¹⁹ Ni ahin'himerya mpewe wira: Mwisuke mmirimani mwinyu tjotakhala tjiralyaaka, ni muhupuwele tjotakhala tjutthekelalyakani miyano kinrumey'inyu nihiku pwiy'aka mpewe akhum'awe oYerusalemu, muhiyathi-tho varohoni vinyu; ²⁰ Kotjuwela tthiri wira kohuvehani, tivo elelo koowa va kikumane ni nyuwano pwiy'aka mpewe mw'atthu otene a maloko a Israyeli, ti miyano kipatjerale ophiya okumana ni m pwiy'aka mpewe. ²¹ Vano Abixayi mwana a Zerwiya ahihimya wira: Ximeyi ola, khamphwane winviya okhala wira onveha mpewe othanliye n'APWIYA? ²² Vano Davidi ahin'himerya Abixayi ni Yowabi wira: Nkuvekelaleni akhil'innyu, munkivelavelelihelani elelo awanani aka? Onakhwa elelo ntthu a w'Israyeli? Nkikhalale elelo mpewe a w'Israyeli? ²³ Vano mpewe ahin'himerya Ximeyi wira: Khamunkhwa. Vano mpewe ahinlaphela owo. ²⁴ Mefiboxethi mwana a Sawuli ahiwa okumaana ni mpewe: Owo kharapihale enyawu tjawe, ni khametthale erori awe, nnakhala khakatthale ekuwo tjawe, okhuma nihiku natthyawalyawe mpewe mpakha nihiku nahokoleyalyawe ni nrettele. ²⁵ Vano vaphiyalyawe oYertusalemu wira akumane ni mpewe, mpewe owo ahinhkoha wira: Nyuwano Mefiboxethi, mwiiwelaleni ni miyano? ²⁶ Mefiboxethi ahimwakhula wira: Pwiy'aka mpewe, nrumeyi aka t'akithepyale miyano; vano miyano kahinruma wira: Nkilokihatjerye buru, kimmwele , kintthareke mpewe; mana miyano nrumey'inyu korakala. ²⁷ Vano owo ahirowa okotherya miyano nrumey'anyu oholo wa pwiy'aka mpewe; vano nyuwano pwiy'aka mpewe munlikana ni nlaikha na Muluku: Vano, mwire vanonelennyu orera. ²⁸ Atthu otene a etthoko y'atithi aka yaniphwanela winviya ni nyu pwiy'aka mpewe, vano nyuwo mokirerela nrima miyano nrumey'inyu khukihanela eyolya vametja winyu. Vano kiphaveleke-tho exeni, kivekeleke-tho exeni mpewe? ²⁹ Mpewe ahin'himerya wira: Khamumpavela-tho olavula? Kintthuna wira nyuwano ni Ziba nkaweliye emmatta tj,apapennyu. ³⁰ Mefiboxethi ahimwakhula mpewe wira: Ziba akuseke tjotene, vano miyano vakiphiyera wira mpewe ahokolele owannyawe ni nrettele. ³¹ Barizilayi oGiliyathi ahivenya oRogelimi, ahilapuwa muro Yordani vamotja ni mpewe, wira anvelele ekhopela ekina ya muro Yordani. ³² Barizilayi owo ahuluvala vantjene, arina ei'yakha miloko mithanu na miraru, ari thatjiri ni ottittimiheya, owo t'anvahale mpewe eyolya okathi wakhalawe omahanayimi. ³³ Mpewe ahin'himerya Barizilayi wira: Nrowe ni miyano, mwakaleke vatthokoni waka oYerusalemu. ³⁴ Vano Barizilayi ahimwakhula mpewe wira: Kininttharelani mpewe oYerusalemu, miyano nkinkhala-tho nkumi ei'yakha tjintjene? ³⁵ Miyano ki nrumey'inyu kokhalana miyakha miloko mithani namiraru, nkinwerya-tho othanla etthu yorera ni yotakhala: Ei'tthu tjinlyaka ni tjimmuryaka nkinona-tho otjiva? Nkininwa-tho matju aathu aniipa? Tivo, kinwerya tjayi onvelaveliha pwiy'aka, mpewe? ³⁶ Miyano nrumey'inyu kaphavela pahi onlapuxa mpewe muro Yordani: mumphavelelani okitthuva tjitjammlo? ³⁷ Nkihiye miyano nrumey'innyu, kihokolele elapo aka kakhwele wenwo, kavithiye mmahiye wannapap'aka. Ola va mwan'aka Kimihami; ontthuna wurumelani, owo uttharekeni pwiy'aka mpewe, mmwirele nnonelinyu orera. ³⁸ Mpewe klhwira: Ayo Kimihami ola akitthareke, vano miyano kinamwirela tjotene tjinutjivelani: Kinawirelani tjotene, tjinrowennyu okilepela. ³⁹ Atthu otene yahilapuwa muro Yordani: Vano-tho mpewe ahilapuwa, vano mpewe ahinvarela Barizilayi, khunreriha; owo ahihokolela owannyawe. ⁴⁰ Vano mwene valapuwalyawe muro ahirowa oGiligali, attahariyaka n'atthu otene aYuda, vamotja n'iriyari y'atthi Israyeli. ⁴¹ Vano atthu Israyeli yahirowa wa mpewe, khwahimerya wira: Exeni amutj'ihu atthu aYuda, vekhaya pahi onlapuxa mpewe muro Yordani vamotja n'atthu a etthoko awe, hiyo oten'ihu nahikhala ni nyuwano? ⁴² Atthu otene aYuda yahiwakhula atthu Israyeli wira: Mpewe ntthu a nloko nihi. Vano munnanareliyani? Hiyo khanilyale etthu y'ampewe? wala khaniliviye nteko owo? ⁴³ Vano atthu Israyeli yahithipelela yiraka, hiyo mpewe owo tutepale okhala awihu, ovikana nawinyu: imara muloko onokhalaru wira Davidi owo okhumale mmulokoni winyu: Vano, muhininonelelani vatthu? Khanihi hiyo nipatjerale othipelela wira mpewe ahokolele wIsrayeli? Vano wakhula w'atthu oYuda wantepa winwaneya otjulu.