¹ Vano ahikhala vavale nlopwana ntjina atjimiya Xeba, mwana a Bikiri, a nihimo na Beniyamini, owo ahopa nlope, khira: Hiyano khaninira mphabntti wa Davidi, hiyano khanirina yolipelela wa mwana a Yese: Atthu Israyeli, wa khula ntthu ohokolele elapo awe! ² Vano atthu otene o wIsrayeli ahiya ontthara Davidi, khuyantthara Xeba mwana a Bikiri: Vano atthu aYuda yanatepa onvelela mpewe aya, anttharaka okhuma muro Yordani mpakha oYerusalemu. ³ Tjitjo Davidi ahikela-tho mmuttettheni mwawe oYerusalemu, vano ahakuxa axarawe nloko ni aseti awe ahiyalyawe alipelelaka etthoko awe khwakhaliha empa ekina, alipeleliyaka orattene anavaha eyolya yotene: kharupale-thyo n'awo, awo yahikhala vekhaya yahikawanihiya n'atthu mpakha okhwa alikanaka n'ankhweli. ⁴ Mpewe ahin'himerya Amasa wira: nkithukumanihere atthu otene aYuda n'hina mwa mahiku mararu, n'hokolele nno nroto. ⁵ Vano, Amasa ahivuwa arowaka wathukumaniha atthu aYuda; nihiku noneraru nlelo khahokolelale ntoko tjanrumalyawe mpewe. ⁶ Vano Davidi ahin'himerya Abixayi wira: Kinnona wira Xebi ole mwana a Bikiri onninivelaveliha wonvikana Abasalomi: vano, mwakuxe nyenyu va anakhotto aka, nvenye mwanlupatthe Xeba munvare, inatthi otthyawela nttetthe wolipihiya, ira tjitjammo khaninrowa-tho owerya omvara. ⁷ Vano Abixayi ahivenya oYerusalemu, arowaka ontthimakela Xeba mwana a Bikiri, anakhotto a Yowabi ni aKereti n'apeleti n'anakhotto akina otene yahintthara Abixayi. ⁸ Vaphiyalyaya vamwala mulupale wari okherekhere w'okabawoni , yahikumana ni Amasa. Vano Yowabi awarale thjowarya tj'oyuma, vano n'yununi awarale ntjako wanvarelela xowa aheliye munrupani mwawe, Yowabi ahinkumiha xowa awe, khummorihela vathi. ⁹ Numala ahinkhomatja Amasi, iraka: Salama, munna? Vano ni ntata nolopwana ahivara erori ya Anasa, anvarelaka. ¹⁰ Amasa khonale wira Yowabi ahinttotta xow'awe vathi ni ntata nithiyana, tjitjammo Yowabi ahimphwatela Amasa varukuluni, marupo awe yahithololowa vathi, Yowabi khahokolelale-tho onthaka Amasa ahikhwa tjitjo. Yowabi ni munnawe Abixayi yahinlupattha Xeba mwana a Bikiri. ¹¹ Vano nanteko mmotja a Yowabi ahihala alipelelaka nrutthu wa Amasa, anikhuwela iraka: Ari ni Yowabi ari ni Davidi antthareke Yowabi. ¹² Vano Amasa ahiphikirela mphironi khutjariha ephome mphironi memmo: Anakhotto otene yavira yanemela khiyaweha, tivo nlopwana owo ahimpurulela Amasi nklherekkhere m'ophiro, khunkhunela ni n'inkhumi. ¹³ Vano, vankumihalawe Amasa mphironi, atthu otene yahivira, anttharaka Yowabi, anlupatthaka Xeba mwana a Bikiri. ¹⁴ Xeba owo ahettetta mahimo otene a Israyeli mpakha ophiya nttetthe wAbeli- Bethi- Maaka atthu a nloko na Bikiri: yahithukumana, khukela nin'yowo mmuttettheni. ¹⁵ Atthu a Yowabi yahirukurerya nttetthe owo wAbeli oBethi- Maaka, ni yahukela etthaya okherekhere mpakha olikaniha ni etarato ya nttetthe , numala anakhotto otene yahipatjerya opwexakasa esiri wira emorose. ¹⁶ Vano nthiyana mmotja munttettheni mmo, arina akhili ahiwela vasirini, khukhuwela wira: Mukinwe, nkiwiriyane; nrowe mwan'himerye Yowabi wira akattamanane nno, kintthuna olavulana. ¹⁷ Yowabi ahimwattamela, vano nthiyana owo ahinkoha wira: Ti nyuwo Yowabi? Ayo ti miyo. Nthiyana owo ahin'himerya wira: Nwiriyane malumo a nru,mey'inyu. Yowabi ahimwakhula wira: Kinniwinwani. ¹⁸ Nthyiyana ahakhula-tho iraka: Khalayi atthu yanihimya, wira: Mwatthuna olavula milattu, nrowe mwakohe atthu a wAbeli: vano va vahimaleya. ¹⁹ Nttetthe ola mulupale atthu'ihu t'omala ni t'ororomeleya wavikana atthu akina a wIsrayeli: Vano mumphavelelani orimeliha nttetthe ola: Muntthunelani ohonona yohiyeriya y'APWIYA? ²⁰ Yowabi ahakhula, wira: Emo, nkintthuna orimeliha nuhonona nttetthe'nnyu, kera tjitjo kitakhaliye. ²¹ Owo nlattu nkina: Okhala nlopwana omwakoni wEfrayimi, ntjina nawe Xeba mwana a Bikiri, anrukunuwelale mpewe Davidi: nkivahe yowo pahi, mi kinahiya nttetthe'nnyu. Nthiyana ole ahin'himerya Yowabi: Mmwanttiheke muru awe onariheliya ota wa nttetthe. ²² Nthiyana ahahimerya atthu otyene akhili awe; awo yahimwikitha exiko Xeba mwana a Bikiri, muru awe ahiriheliya Yowabi. Vano Yowabi ahiruma wopiya nlope, anakhotto otene yahihiya nttetthe, yahitthyawatja khula ntthu araaka owannyawe. Ni Yowabi ahihokolela-tho okhala mpewe atthu a oYerusalemu. ²³ Yowabi ari nkhulupale anakhotto otene a wIsrayeli; Banaya mwaqna a Yehoyada ari nkhulupale aakereti n'aPeleti; ²⁴ Adorami anettiherya miteko tj'okhoma; Yehoxafathi mwana Ahiludi, ari ntthu asuka elivuru; ²⁵ Xeva, ari ntthu olepa, ni Zadoki ni Abiyatari, yari makhulupale a nkuttho; ²⁶ Vano-tho Ira Yaritha ari nkhulupale a Davidi.