¹ Ahitofeli ahin'himerya Abasalomi wira: Nkihiye kathanle anakhotto ikonto muloko napili, ni kivenye kanlupatthe Davidi ohiyu yola; ² Kinantuphela analuttuwale ni otjeyale; kintutuxe, ni atthu awe otene anatthyawa, ni kinamwinva mwene ahalalene mekhawe. ³ Kinamurwaanelani atthu otene: Awo yahokolowa vale, (vano onimphel'inyu omwinva ti ntthu mmotja pahi) atthu akina otene anamopowa. ⁴ Miruku n'ya tjahintjivela Abasalomi ni makhulupale otene a Israyeli. ⁵ Ni Abasalomi khwira: Mmwihane-tho Huxayi a wAriki, nimwinwe yowo-tho tjirinawe onihimerya. ⁶ Huxayi ahiwa, Abasalomi ahinkoha, wira: Ahitofeli onivaha miruku n'ya; hiyo nintthareke, wala nihintthareke? Nnihimerye miruku tjinyu. ⁷ Huxayi ahumwakhula Abasalomi wira: Emara ene yela miru tja Ahitofeli ti tjohiloka. ⁸ Huxayi ahihimya-tho wira: Nyuwo mwinnatjuwela atith'inyu ni atthu aya awo atthu a ekuru, okathi ola aviruwa, ntoko havara akhiye axan'awe ntakhwani. Ohiya vo, atithinyu annitjuwela orattene ekhotto, ni khanviriha ohiyu ni atthu aya. ⁹ Okathiola anuwipitha munikhukuni, wala nipuro nikina: Ni akina awihu yapacera winviya okhottoni, etthu ela enatjuweliya, ni enalaleiya wira: Atthu entji Abasalomi ahinvakatjiya. ¹⁰ Tjitjammo hata anakhotto a ekuru, ni ororomeleyexa, anapacera wotjeya: okhala wira atthu otene a Israyeli annitjuwela atithinyu ta ekuru, ni wira atthu aya tolipa. ¹¹ Tivo, miyo, katthuna wuvahani miruku n'ya, mwathukumanye atthu otene a Israyeli, okhuma oDani mpakha oBerixeba, yetteke ntoko mihava tj'ophareya, ni nyu nnamwhola okhottoni. ¹² Nave hiyo nintthuna omphwanya Davidi nipuro ti nipuro nintthun'awe okhala, nintrthuna ontuphela owo ahitjuwelaka ntoko okame tjimmorelaya vathi, ni khano onrwaa ohala, nnakhala mwene nnakhala atthu awe. ¹³ Owo atthyawela mwinttettheni, atthu otene a Israyeli anawana mikhoyi nttetthe yole, ni hiyo ninapurulela nttetthe owo mpakha omuro, tjitjammo khaninrwaa ohalanluku vamwako nnakhala nimotja. ¹⁴ Abasalomi n'anakhotto otene a Israyeli yahihimya wira: Miruku tja Huxayi a wAraki ti tjoloka ovikana miruku tja Ahitofeli. Okhala wira APWIYA tawirihale tjitjammo ehononaka miruku tja SAhitofeli tjari tjoloka, wira APWIYA antakhalihe Abasalomi. ¹⁵ Huxayi ahirwaa wahimerya alipa a nkuttho Zadoki ni Abiyatari wira: Ahitofeli ahinvaha miruku Abasalomi ni makhulupale makina a Israyeli: Nto miyo konvaha miruku ntoko n'ya. ¹⁶ Vekhweli mwinrume nannano va namitthaka, orwaa onlopola Davidi, wira: Ohiy'ula n'hikhale mmathalani ephantto ya wothakoni, n'hana olapuwela ephantti ekina ya muro Yordani, wira mwene ahinviye, wamotja ni atthu awe otene. ¹⁷ Yponathani ni Ahimaasi yanilipelela okherekhere wa ehime ya wEni- Rogeli, okhala wira khiyawerya okela mwinttettheni ehitjuweliyaka; ni nrumeyi nthiyana, aharweela, wahimerya, ntoko tjinwananalyaya: wira anrwaanele ihali mwene Davidi. ¹⁸ Vano mmiravo mmotja ahaweha, khurwaa on'himerya Abasalomi wira: vano awo ahuvenya ni wakuva khutthyawela vapiuwani va nlopwana mmotja oBahurimi, arina ehime vapuwani vawe, Yonathani ni Ahimaasin yahipitha mwehimeni mwemmo. ¹⁹ Ni mwarawe nlopwana ole ahikusa manta, nkhwatalela vehimeni, akhunelaka nipuro nno khwaneya etiriku awe watjulu; ni khavo awerya wanyiherya etthu. ²⁰ Arumeyi Abasalomi yahuphiya vapuwani va nthiyana ole, khunkoha wira: Ahimaasi ni Yonathani ori vayi? Ni nthiyana owo ahiwakhula wira: Avira va arewaaka oYordani. Atthu ale yahaphavela khuhaphwanya khuhokolela oYerusalemu. ²¹ Numala atthu awo orwaa, Ahimaasi ni Yonathani yahikhuma mwehimeni mmwe, khurwaa, onlopola mwene Davidi; an'himeryaka wira: Mwakuveke nvenye nannano va nlapuwe muro Yordani, okhala wira Ahitofeli ovaha miruku tj'owoweelani. ²² Nave Davidi ahuvenya, ni atthun otene yarinawe, ni khulapuwa muro ohinaxe; khavo ahalapuwale muro Yordani nnakhala mmotja. ²³ Ni Ahitofeli, vawehalyaawe wira miruku tjawe khitjattharihiye, ahinwela buru awe, khuvenya, arwaaka owannyawe nlaponi mwawe; numala ahilokiha tjitthu tja etthoko awe, ni ahihopha ni khukhwa, khuvithiya mmahiye mw'atithi awe. ²⁴ Davidi ahiphiya oMahanayimi, ni Abasalomi ahilapuwa muro Yordani n'atthu otene a Israyeli. ²⁵ Abasalomi ahinkhaliha Amasa, mulupale anakhotto nipuro na Yowabi, Amasi owo ari mwana a Yitira a nloko na Israyeli, amayawe yari Abigayili mwana a Nahaxi, munnawe Zerwiya, ari mamawe Yowabi. ²⁶ Abasalomi ni atthu a Israyeli yahimaka nlaponi m'oGalaadi. ²⁷ Davidi aphiyakaru oMahanayimi, atthu ayhiwa okumana ari Xobi mwana a Nahaxi oRaba a nloko n'Amoni, ni Makiri mwana Ammiyeli oLo- Debari, ni Barizilayi oRogelimi nlaponi m'o Galaadi, ²⁸ Atthu awo yahinwanela Davidi ilili, ni manta, n'iparatho, ni miyapu, yahinwanela-tho tjolya Davidi n'atthu awe, etiriku, ni otthu, ni makkotto, n'ipwiri, ²⁹ Ni enuyi, ni makhura , ni eketjo, n'inama, ni tjolya tjikina, wira alyeke; okhala wira yahupuwela wira: Atthu ala ahawa ni etala, ni ntthona, khukhulummwa mothakoni.