¹ Davidi wavikanalyawe vakhani etthururu ya mwako, Ziba nrumeyi awe Mefiboxethi, ahuwa okumana nuwo awale n'aburu eeli, yakusale iphau miloko miloko minli , miru miloko muloko tja ewuva yowumma, mihokhorokho tjikina tjottokottha, n'ikhali emotja ya evinyu. ² Mwene ahunkoha Ziba wira: Exen'ila? Ni Ziba ahumwakhula wira: Aburu ala kawanelale wira atthu a vapuwani vinyu, yettaneke; iphau n'ya ni mihokhorokho, wira elyeke arumey'inyu; ni evinyu, ewuryeke vankhulummw'aya mothakoni. ³ Mwene ahunkoha-tho wira: Ori vayi Mefiboxethi otjulu wa pwiya? Ziba ahumwakhula mwene wira: Owo ohalale oYerusalemu, owo onupuwela wira: Elelo atthu a Israyeli anukihokoloxerya omwene w'atithi. ⁴ Nave-thomwene ahunhimerya Ziba: Mihakhu tjotene tjari tja Mefiboxethi, ti tjawinyu. Ni Ziba ahumwakhula uramaka iraka: ,wene pwiy'aka, miyo kaphavela wutjivelihani mahuku otene. ⁵ Mwne Davidi waphiyalyawe oBahurimi: ahikhuma, nlopwana a nloko na Sawuli, owo ihaniya Ximeyi, mwana a Gera; akhumakaru anihimya mulumo otakhaliha, ⁶ Ni anunvonya ni maluku Davidi, ni arumeyi otene a mwene Davidi: n'atthu otene yarinawe, ni ni anakhotto ni makhulupale otene yetta mono wolopwana ni mono wothiyana wa mwene. ⁷ Ximeyi owo, animulumela Davidi ni mulumo ontakhaliha wira: Nkhume, nkhume, nyuwo namwinve, ni ntthu otakhala! ⁸ APWIYA annulivani mwaha w'owinvakatja atthu entji a etthoko ya Sawuli, yowo omwinyeralinyu omwene: nto APWIYA anvaha omwene Abasalomi; tjitjammo nyuwo motakhalihiya, nyuwo namwinve. ⁹ Abixayi mwana a Zerwiya, ahun'himerya mwene wira: Exeni mwalapwa ola okhwa onuntakhalihawe pwiy'aka mwene? Miyo kinnulapelani wira nkihiye kinrweele, kamwikitthe muru. ¹⁰ Ni mwene ahumwakhula wira: Nthowa xeni kirinaka miyo ni nyuwo aana a Zerwiya?

Owo ontakhaliha tjammo, okhala wira APWIYA tamwirelale wira mwintakhalihe Davidi; vano tipani onwerya onkumiherya nlattu: Ahikhalale ole onrumale?

¹¹ Davidi ahun'himerya-tho Abixayi n'arumeyi awe otene wira: Nyuwo mwinnona, mwanaka yowo on'yaralyaka, onniphavela okinva: Vano onutepa-tho okitakhaliha ntthu ola a nloko na Beniyamini? Mwin'hiyeke akitakhaliheke, APWIYA t'atthunale tjitjammo. ¹² Yatthuna APWIYA anukhupanyerya otjikula waka ono, ni APWIYA anurukunusa otakhaliya waka ono okhale oreriya waka elelo va. ¹³ Davidi anivira ettaka mphironi n'atthu awe otene, Ximeyi owo anetta okhupi wawe ephantti ya mwako, anivira antakhalihaka, ni anvonyaka ni maluku, ni ammwarexelaka ntthupi. ¹⁴ Ni mwene n'atthu awe otene, yahuphiya omuro Yordani akhulummwalene ventji, khumumula wonwo. ¹⁵ Abasalomi n'atthu ale otene, n'atthu otene a Israyeli, yahuphiya oYerusalemu, ni Ahitofeli ari ni yena. ¹⁶ Ni Huxayi a wAriki mpatthani awe Davidi, ahurwaa okumana ni Abasalomi, khun'himerya wira: Akhale mwene, omwene awe olipe. ¹⁷ Ni Abasalomi ahunkoha Huxayi wira: Ti tjitjammo munintjukhurelinyu mpatthaninnyu Davidi? N'hirweelaleni ni mpatthaninnyu owo? ¹⁸ Huxayi ahumwakhula wira: Hoye; nto miyo kintthuna okhala n'ule APWIYA antthunaya onthanla, wamotja n'atthu otene a Israyeli, yowo kintthunaka, okhalanaka. ¹⁹ Ni kintthuna onrumelaka pani? khahiyo mwana a mwene? ntoko tjarumelalyaka atith'inyu, tjitjammo-tho kinamurumelakani nyu. ²⁰ Abasalomi ahin'himerya Ahitofeli wira: Nrowe mwankohe tjintthun'ehu wira. ²¹ Ni Ahitofeli ahimwakhula Abasalomi wira: Nrowe mwakhale n'axihawala atithinyu, yawo ahiyeralyawe olipelela enup'awe; ni atthu otene a Israyeli anatjuwela wira n'haveha atithinyu, tjitjammo atthu'inyu anatepa olipa nrima wira yotthareni. ²² Vano vataratoni va enupa ya Davidi ahemexiya hema, Abasalomi ahikhala n'axihawala atithi awe, va methoni v'atthu otene o'wIsrayeli. ²³ Mahuku awo, miruku tjawe Ahitofeli, tjanoneliya ntoko miruku tja Muluku. Tjitjammo Davidi ni Abasalomi yanitthara miruku tjawe.