¹ Numala tjitthu n'ya, Abasalomi ahuphavela ikari n'ikhavalo, khwathanla alopwana miloko mithanu yettanawe. ² Khula nihuku witjisu, Abasalomi anemela vankhora va nttetthe; vavale vaviraya atthu yaphavela on'himerya milattu mwene n'uphukiya vorera, Abasalomi anuwihaniha mwanene awe khula ntthu a yawo, anankoha wira: Nyuwo mwinkhuma nttetthe xeni? Ni owo anakhula wira: Nrumey'inyu onkhuma nttetthe mmotja w'atthu a Israyeli. ³ Nave-tho Abasalomi anun'himerya wira: Vekhweli nlatthu'inyu ti waxariya: nto khuvo ntthu onrwaa otohotserya wa mwene. ⁴ Ni Abasalomi anira wira: Miyo kakhalihiya mphuki a elapo ela, otene ale ari ni nlattu yanwerya okiphwanya, wira miyo kaphukele n'ixariya! ⁵ Tjitjammo, akhala ntthu amwattamela awaka okokhora oholo wawe, owo khantthunela okokhora aninvarela ntata, ni khunvenyiha, ni khunvaha ebetjo. ⁶ Abasalomi anuwiriha tjitjammo atthu otene a Israyeli yarwaa wa mwene wira yaphukeliye milattu tjaya n'ixariya: ni Abasalomi anavara nrima atthu otene a Israyeli. ⁷ Nuvira iyakha miloko mitjese Abasalomi ahun'himerya mwene wira: Miyo kinnulapelani wira nkitthuniherye orwaa oHebroni, kammaliherye natiri amanelalyaka APWIYA: ⁸ Okhala wia miyo nrumeyinyu kahummana natiri waryaka oGexuri nlaponi mw'aSiriya, kiraka: APWIYA yakihokoloxerya oYerusalemu, miyo kinamwahelela nkuttho oHebroni. ⁹ Ni mwene ahumwakhula wira: Nrweeke ni nrettele. Ni owo ahuvenya, ni khurwaa oHebrani. ¹⁰ Vano wonwo Abasalomi aharuma anamitthaka orwaa wahimerya atthu amahimo otene a Israyeli, wira: Mwinwakaru oruma wa malope, nkhuweleke wira: Abasalomi ottikhiya omwene oHebroni. ¹¹ Okathi wakhumalyawe oYerusalemu Abasalomi ahuwihana alopwana miloko miloko minli, awo yahuntthara nto khiyatjuwela etthu. ¹² Okathi wahelawe nkuttho Abasalomi aharuma-tho orwaa nttetthe w'oGilo, wira yamwihane Ahitofoli, humu a Davidi, akhala oGilo nttetthe awe. Tjitjammo onrukunuwela wawe Davidi wanuvira otepaka, vano atthu yantthara Abasalomi yanutepa watta. ¹³ Okathi owo nlopwana mmotja ahurwaa on'himerya Davidi wira: Mirima tj'atthu otene a Israyeli tjinuntthara Abasalomi. ¹⁴ Nave-tho Davidi ahahimerya arumeyi awe otene yarinawe oYerusalemu wira: Nvenye, nitthyawe, okhala wiea khanikhalale okhwela mmatatani mw'Abasalomi; Haya mwakuveke okhuma, owo khampitja ophiya wira anituphele, ni anirihe yotakhala, ni wira awinvakatje atthu otene a mwinttettheni mu. ¹⁵ Ni arumeyi a mwene yahumwakhula wira: Tjotene apwiya mwen'ihu, anarumaya arumeyi aya, hiyo nolikanana. ¹⁶ Mwene ahuvenya, wamotja n'atthu otene a vapuwani vawe. Ni ahahiya axihawala awe muloko wira elipeleleke enupa awe. ¹⁷ Vano mwene ahuvenya wamotja n'atthu otene, khwemela wattamela enupa yokhitjerya. ¹⁸ Ni makhulupale awe otene yari ni yowo ni anakhotto yanuvira oholo wa mwene, ni aKereti otene ni aPeleti; ni aGithi otene, ala yari atthu miloko miloko mithanu namotja yawalemwentto okhuma oGathi, enttharaka mwene. ¹⁹ Ni Davidi ahun'himerya Itayi nkhulupale aGiti wira: Nyuwo muninttharelani hiyo? N'hokolele ottuli, ni n'haleke ni mwene nkina; okhala wira nyuwo mwa mmalapo, hata nrimomoliya elapo'inyu. ²⁰ Nyuwo mphiyale nannano, kinuwerya wukhanyererihani ontthari hiyo? Miyo kinrwaa ntoko kinrwaako: nyuwo n'hokolele ottuli, mwarowane atthu'inyu APWIYA yumoreni ekhiriri ni yurereleni nrima. ²¹ Vano Itayi ahumwakhula mwene, wira: Mwaha wa Muluku, mwanene ekumi mwaha wa ekum'inyu pwiy'aka mwene mapuro otene anrwaawe okhala mwene, ni miyo-tho nrumey'inyu kinukhala wonwo mpakha okhwa ni nyuwo. ²² Nave Davidi ahun'himerya Itayi wira: Vano, nkitthareke, ni nrweeke. Ni Itayi oGathi, n'anakhotto awe otene, n'atthu otene yahuntthara Davidi. ²³ Ni atthu otene yanunla erunyaka; okathi waviraya makhulupale a Davidi, mwene ahulapuwa muro Keduroni; atthu awe otene yahuvira oholo wawe, ettharaka ephiro ya wuthakoni. ²⁴ Nave-tho Zadoki, nlipa a nkuttho, anukhala wonwo wamotja n'alevi otene yathatale nivuku nowatana na Muluku; ni alevi awo yahuntjathi vavo nivuku nno nowatana na Muluku. emwattamihaka nlipa a nkuttho Abiyatari khuhitexa-tho ehinatthi ovira atthu otene yakhumale mwinttettheni. ²⁵ Vano-nto mwene ahun'himerya Zadoki wira: N'hokoloxerye nivuku na Muluku onttettheni; APWIYA yakitjaliyaru anukihokoloxerya mwinttettheni, kaweheke-tho nivuku nna ni enupa ya Muluku: ²⁶ Ni APWIYA yawo yahimya wira: kophweliya ni Davidi: miyo kulikanana, ekireleke tjintthunaya. ²⁷ Davidi ahun'himerya-tho Zadoki wira: Nyuwo khamuhiyo mmalapo? N'hokoleleke onttettheni winyu ni nrettele; mwakuseke asan'inyu eeli, ni mwaninyu Ahimaasi, ni Yonathani mwana Abiyatari. ²⁸ Mahuku ala miyo kinrwaa olipelelaka mothakoni, mpakha nyuwo okakhula okiveleliha ihali. ²⁹ Nave-tho Zadoki ni Abiyatari yahuhokoloxerya nivuku na Muluku oYerusalemu; ni khukhalamwinttettheni mwemmo. ³⁰ Ni Davidi ahuhokolela ephiro awe awelaka mwako olivera; awelaka tjitjale anunla, ettaka mwentto akhunelalene muru voripiya nrima, atthu otene yantthara yahikhunela muru, otene aya yahuwela va mwako yunlaka. ³¹ Ni Davidi ahuhimeriya, wira: Ahitofeli ori wamotja ni Abaslomi n'ale yorukunuwelaleni. Nave-tho Davidi ahira-tho: Xontte APWIYA, miruku tjAhitofeli, nrukunuxe tjikhale ololo. ³² Davidi waphiyalyawe watjulu wa mwako nipuro ninkokhoreliya Muluku, mpatthani awe ihaniya Huxayi a wAriki ahuwa okumana, awaralene ekuwo tjothala, muru awe ottwelelihiyeni ni ntthupi. ³³ Davidi ahunhimerya wira: Mwakittharaka miyo, nyuwo nnukivalaveliha; ³⁴ Nto mwatthuna okikhaliherya n'hokolele onttettheni, mwan'himerye Abasalomi wira: Mwene, miyo kintthuna wurumelani, ntoko tjanrumelalyaka tithiinyu mpakha vano, okhuma elelo kinukhala nrumey'inyu ororomeleya, vano nyuwo Huxayi mphaveleke ohonona miruku tja Ahitofeli. ³⁵ Vano khakhalale wonwo alipa a nkuttho Zadoki ni Abiyatari? Tivo , tjotene tjinrwinyu winwa wuthakoni wa mwene, nwalakelele Zadoki ni Abiyatari alipa a nkuttho. ³⁶ Asan'aya eeli alipa a nkuttho awo ari wonwo, Ahimaasi mwana a Zadoki, ni Yonathani mwana Abiyatari, mwarume aximiravo awo owa okitjuweliha ihali tjotene tjininwanyu. ³⁷ Tjitjammo Huxayi mpatthani awe Davidi ahuhokolele onttettheni; okathi ene yowo Abasalomi wakelalyawe oYerusalemu wonwo.