¹ Ni Yowabi, mwana a Zerwiya, watjuwelalyawe wira nrima wa mwene wahinukheliya ni Abasalomi, ² Yowabi ahuruma wihaniya oTekowa, nthiyana a miruku, ni khun'himerya wira: miyo kinnulapelani wira mwikhalihe ntoko nthiyana namukhweli, nware milala, nhotte makhura onukhela, mwikhalihe ntoko nthiyana okhweliye okhuma khalayi; ³ Numala nrweemwakumane ni mwene, mwan'himerye tjammo. Ni Yowabi ahimupucera mulumo atthunawe on'himerya mwene. ⁴ Vano, nthiyana owo oTekowa, ahurwaa okumana ni mwene, ni ahukokhora oholo wawe uramaka mpakha vathi iyevihaka, khwira: Nyuwo mwene nkakhihe! ⁵ Ni mwene ahumwakhula wira: Yokhumelelaleni exeni? Ni owo ahumwakhula wira: Vekhweli miyo ki nthiyana namukhweli ni in'yaka ohokhwa. ⁶ Ni nrumey'inyu ola ahukhalana aana eeli awo enari omatta yahukelela owana; ni kharivo ntthu owakiha, vano mmotja ahinvulaliha munnawe, mpakha omwinva. ⁷ Ni atthu a nloko ninyu khukihimerya miyo nrumey'inyu, wira: Nnivahe namwinve ole omwinvale munnawe, nintthuna ompwetexa alivele ekumi ya munnawe ompwetexalyawe, ahakhele tjohiyeriya tj'atithi awe. tjitjammo onarwaa omaliha ororomela waka wokhitjerya, tjitjammo-tho ntjina nin'yaka ninnrwaa okhwela khwela nihihalane nloko naya vathi va. ⁸ Nave-tho mwene ahun'himerya nthiyana owo: Nrweeke owannyinyu, miyo kinuhalana mwah'inyu ola. ⁹ Ni nthiyana owo oTekowa ahun'himerya mwene wira: Pwiy'aka mwene, miyo ni etthoko y'atithi aka nokhalana nlattu owo; nto nyuwo mwene n'itthoko'inyu khamwinkela n'hina mmo. ¹⁰ Ni mwene khwira: Akhala ntthu onuvelelihani, nkiwanele, wira ahunyonyiheni-tho. ¹¹ Nthiyana owo khwira: Kinnulapelani, mwene aka, wira mwupuwele APWIYA Muluku'inyu, nrume wira nlipa owunlela ekuhu ahuntjererye-tho yotakhala amwinvaka mwanaka. Ni mwene khwakhula wira: Kinulapha ni ntjina n'APWIYA anene ekumi, wira khinrwaa omora ekharari nnakhala emotja ya mmuru mwa mwaninyu ole. ¹² Ni nthiyana owo ahira: Kinnulapelani wira mwin'hiye nrumey'inyu wuntjererya nulumo nimotja pahi pwiy'aka mwene. Ni mwene owo khwira: Nlavuleke. ¹³ Nave-tho nthiyana owo khwira: Vano exeni nnupuwelinyu owirela tjitjammo atthu a Muluku tjen'yo? Ti nyuwo munikhotta wira mwaninyu ahokolowe, vamonalinyu nyuwo n'hitthunaka mmantjinyu, ni mulumo ahimal'inyu. ¹⁴ Ayo vekhweli hiyo oten'ihu ninukhwatja, niri ntoko matji ammwarexeliya vathi, ehinawerya okhupeliya: Nnakhala Muluku khanwerya on'hokoloxerya ekumi ntthu okhwale, nto mwene onowerya on'hokoloxa ntthu omomolalyawe. ¹⁵ Vava vanwaka on'himerya pwiy'aka mwene mulumo an'himeralyaka, takhalale ookopopiha. Nto miyo nrumey'inyu kahihimya wira: Kirwee kalavule ni mwene: atthuna owo onukiwiriyana apankaka tjinlapelawe nrumeyi awe. ¹⁶ Vano mweni anukiwiriyana onukakiherya mmatatani mwawe ole omphavela omwinva mwanaka, n'ukinva miyo-tho, wira nihikhale-tho eriyari y'atthu a Muluku. ¹⁷ Vano, miyo nrumey'inyu, kahihimya mmantjaka wira: Mulumo apwiy'aka mwene anuwerya onihokoloxerya nrettele; vano pwiy'aka mwene onalikana ni nlaikha na Muluku atjuwelaka orhanlaq tjorera ni tjotakhala. Vano tjitjammo APWIYA Muluku'inyuekhale ni nyuwo. ¹⁸ Nave-tho mwene ahakhula, an'himeryaka nthiyana owo wira: Miyo kinnulapelani wira n'hikikhuwe etthu entthunaka wukohani. Nthiyana owo khwira: Nlavuleke pwiy'aka mwene. ¹⁹ Ni mwene khwira: Tjitthu n'ya tjotene khamupuxeriye ni Yowabi? Ni nthiyana owo ahakhula iraka: Pwiy'aka mwene, ekhweli ntoko nyuwokhala, khuvo onwerya ovanyiha ni ohapuxerya mono wothiyana wala mono wolopwana mulumo ahimalinyu: Okhala wira nrumey'inyu Yowabi, owo tukirumale, owo t'akittutjihale mulumo otene kohimeralyakani. ²⁰ Ni Yowabi, nrumey'inyu ahirabtjitjo, wira mwene akuvele omaliha maxakh'ihu; nto pwiy'aka mokhalana miruku, tjinlikana ni miruku na nlaikha na Muluku, nyuwo mwinnitjuwela tjotene tjinkhumelela vathi va. ²¹ Nave-tho mwene ahun'himerya Yowabi wira: Kotthuna kinumaliherya rjimpheelinyu: nrwee, mwanwane mmiravo Abasalomi. ²² Ni Yowabi ahukokhora uramaka mpakha vathi, khunxukhuru mwene, iraka: Pwiy'aka mwene olelo miyo nrumey'inyu kotjuwelexa mokikhurunuwela nrima, okhala wira mowiriyana olompa waka. ²³ Yowabi ahuvenya, arwaaka oGexuri, khunkuxa Abasalomi an'hokoloxeryaka oYerusalemu. ²⁴ Nto mwene ahira: Ahokoleleke vapuwani vawe, ahuwehe owithoni waka. Ni Abasalomi ahuhokolela owannyawe, ni khuhiweha owithoni wa mwene. ²⁵ M'atthu otene a Israyeli kharivo ntthu orera owithoni alikana ni Abasalomi; okhuma wamuru mpakhainawu tjawe ari orera. ²⁶ Ni ahulamalela omwetthiha ekharari tjawe, (emara emotja wa khula eyakha, okathi wannyonyihaya ventji, tivo w'ametthihawe,) wqniphimiya olemela wa ekharari tjawe ni tjanulemela ikilo pinli. ²⁷ Abasalomi ahayara asanawe araru axilopwana, ni mwanthiyana ihaniya Tamari, yowo ari orera tjana. ²⁸ Ni Abasalomi ahukhalaoYerusalemu iyakha pinli, khuhiweha owithoni wa mwene. ²⁹ Ni ahumwihaniha Yowabi wira wrwee olavula ni mwene; nto Yowabi khuhitthuna owa wa yowo; Abasalomi ahumwihaniha-tho emara yonapili, nto owo khuhitthuna owa. ³⁰ Nave-tho Abasalomi ahahimerya arumeyi awe eira: Nyuwo mwinniweha ematta ya Yowabi yattamelale vava, yeyo yaliye etiriku; nrwee, mwapahe; ni arumeyi awe Abasalomi yahupaha ematta eyo. ³¹ Ahuvenya, Yowabi, khurwaa okumana ni Abasalomi owannyawe, ni khunkoha wira: Arumey'inyu apaheryaleni ematt'aka? ³² Ni Abasalomi ahumwakhula Yowabi wira: N'hona wira, miyo kaharuma atthu owihanihani, wira nyuwo nwe ono, kaphavela worumani orwaa wamwene on'himerya wira: Exeni miyo ehokolowaly'aka oGexuri? Vanarerela miyo okhala oGexuri wonwo. Miyo kinnitthuna oweha ekhove ya mwene; ni kaphwanyaniya yottheka, akinviheke. ³³ Vano, Yowabi, ahurwaa wa mwene, ni khum walakelela tjotene. Nave-tho Davidi khumwihaniha Abasalomi, owo khuwa wa mwene, ahukokhora uramaka mpakha vathi oholo wa mwene: ni mwene ahunvaha ebetjo Abasalomi.