¹ Numala tjitthu n'ya, Abasalomi mwana a Davidi ahukhalana nrokorawe orera tjana in'haniya Tamari, Aminoni mwana a Davidi ahuwereiya nrima mwaha a yowo. ² Ni Aminoni ahuwereiya nrima ventji mpakha ahunawerya onvilela, nrokorawe owo Tamari: okhala wira Tamari owo ari numwri, Aminoni khona yomwiriha. ³ Ni Aminoni ahukhalana mpatthani awe ihaniya ntjina nawe Yonadabi, mwana a Ximeya, munnawe Davidi: ni Yonadabi owo ari ntthu a miruku. ⁴ Owo ahun'himerya Aminoni wira: Mwana a mwene, exeni mummakel'inyu

wotta khula nihuku? Mwihinkihimereryani? Aminoni ahumwakhula wira: Miyo kunitthuna nunfenta Tamari nrokorawe munnaka Abasalomi.

⁵ Ni Yonadabi ahun'himerya wira: Nrwee mwarupathi volilini vinyu, mothereryeke owereiya; ni atithinyu yawa owotolani, mwahimerye wira: Kinnulapelani wira mwin'hiye nrokoraka Tamari , wira akiwaneleke yolya, ni apeye mwanene vamethoni vaka, miyo kimonaka, kilyeke mmatatani mwawe. ⁶ Vano, Aminoni, ahirupathi, iraka kinuweren'ya, ni mwene ahuwa: omotola: ni Aminoni ahun'himerya mwene wira: Miyo kinnulapelani wira awe nrokoraka Tamari, ni akipankele va mikatthe minli, wira miyo kilye mmatatani mwawe. ⁷ Davidi ahuruma ohimeriya Tamari owannyawe wira: Nrwee owannyawe nrokorinyu Aminoni, ni mwamwapele yolya. ⁸ Ni Tamari ahurwaa owannyawe nrokorawe Aminoni, yowo arupathale; ni ahikusa ephepa, ehetheya vamethoni vawe, khwapeya mikatthe minli. ⁹ Numala ahapula ekarikho, khurwaana opaphula oholo wawe: nto owo khatthunale olya. Ni Aminoni khwira: Nwomole atthu otene ari mu ekhumele vate. Ni atthu otene yahikhumela ota. ¹⁰ Nave Aminoni ahun'himerya Tamari wira: Nkiwanele yolya mumpani mwaka mu, wira miyo kilye mmatatani mwinyu. Ni Tamari ahikusa yolya yapeyalyawe, khunrwaanela nrokorawe mumpani mwawe. ¹¹ Okathi wamvahawe yolya ele wira alye, owo ahhunvara ntata Tamari, an'himeryaka wira: Nwe, nrokoraka nrupathiki ni miyo. ¹² Tamari ahumwakhula wira: hoye, nrokoraka, n'hikirupane; ojhala wira khinpankiya etthu tjitjammo eriyari y'atthu a Israyeli. N'hipanke-tho etthu tjitjammo yowuliha muru ¹³ Miyo kinrwaa okhala vayi n'ehay'aka? Ni nyuwo nnuthanyiya ntoko ntthu otakhala n'atthu a Israyeli. Vano, kinnulapelani, nannano vava, wira mwin'himerye mwene, owo khannrwaa wukhottihani okithela. ¹⁴ Nto Aminoni khatthunale omwinwa; nto ahunkhanyereriha n'uwali, ni khunrupana. ¹⁵ Nannanoru Aminoni ahupacera omphwela ni nrimawe woteni nrokorawe owo, ophwela iwo wahuvikana onfenta wawe warinawe wupacerani. Ni Aminoni ahun'himerya wira: Nvenye va nrweeke. ¹⁶ Ni Tamari ahumwakhula wira: Nrokoraka hoye; etthu enkirih'innyu va ti yotakhala ovikana ele ekirihalinyu . Nto owo khatthunale onwiriyana: ¹⁷ Vahinatthi, ahumwihaniha nrumeyi awe arinawe, khun'himerya wira: Nkomolele nthiyana ola mmomolelaka ota, ni ntthuke nkhora ottuli wawe. ¹⁸ Ni Tamari ahuwara ekuwo tjorakama, ntoko tjalamalelalyaya owara asana axithiyana a mwene enari imwali. Vano, nrumeyi ole Aminoni, ahumomolela ota, khutthuka nkhora. ¹⁹ Nave Tamari ahukusa etturwa, khwixitthela mmuru, ni ahukhera ekuwo tjawe tjorakama awaralyawe, ni ahupweherya miyono tjawe vamuru, khuvenya akhuwelaka. ²⁰ Ni Abasalomi nrokorawe ahunkoha wira: Ekhweli wira nrokorinyu Aminoni ahurupanani? Nto vano nrokoraka, mmale: owo nrokorinyu; nrim'inyu ohikhaleke w'orjikula. Ni Tamari ahukhala owannyawe Abasalomi nrokorawe. ²¹ Ni mwene Davidi watjuwelalyawe tjitthu n'ya tjotene, ahuviruwa ventji. ²² Nto Abasalomi khalavulale ni Aminoni mwa tjitthu tjonanara nnakhala tjorera, nanlelo Abasaloni owo ahuphweliya ni Aminoni, okhala wira ahunkhanyereriha ni khunrupana nrokorawe Tamari. ²³ Ni, vaviralyaya iyakha pinli, okathi Abasalomi wametthiy'aya ipwittipwitthi tjawe oBayali-Hasori, wattamelale nttetthe w'Efrayimi; Abasalomi ahalattulela yolya aana otene a mwene. ²⁴ Ni Abasalomi ahuwa okumana ni mwene, khun'himerya wira: Mahuku ala tjinimetthiya ipwittipwitthi tjaka: miyo kinnulapelani nwe nyuwo mwene ni arumey'inyu wa nrumey'inyu. ²⁵ Mwene ahumwakhula Abasalomi wira: Mwan'aka, khaninrwaa oten'ihu, wira nihulemeliheni nyuwo. Nanlelo ahunthipeleliha wira arwee wamotja, nto mwene khatthunale orwaa, nto ahureriha. ²⁶ Nave Abasalomi khwira: Nyuwo mwahitthuneke orwaa ni hiyo, kinnulapelani mwin'hiye munnaka Aminoni orwaa wa hiyo. Ni mwene ahumwakhula wira: Munninyu onrweelani wa nyuwo? ²⁷ Abasalomi ahunkhanyereriha, mwene ahun'hiya Aminoni orwaa onirani ni aana otene a mwene. ²⁸ Ni Abasalomi aharuma arumeyi awe, wira: Vano, nwiriyane orattene, okathi Aminoni onrwaawe ohapaliya evinyu, miyo kinamuhimeryani wira: Mmwinve Aminoni, nyuwo mmwinveke tthiri, n'hove etthu; ti miyo kinorumani. Nlipihe nrima, nkhale atthu a ekuru. ²⁹ Ni arumeyi awe Abasalomi yahumwinva Aminoni ntjoko Abasalomi tjarumalyawe. Aana otene a mwene, yahuvenya khuwela vaburuni vaya, khutthyawa. ³⁰ Awo etthyawatjaka nanlelo, ehali eyo yahumphwanya Davidi wira: Abasalomi owinva aana otene a mwene, khuhihala nnakhalaq mmotja. ³¹ Nave Davidi ahuvenya, ahukhera ekuwo tjawe, ni khwirihela vathi, ni arumeyi awe otene yari vavo, yahukhera tjowara tjaya. ³² Ni Yonatani mwana a Ximeya munnawe Davidi, ahun'himerya mwene wira: Nyuwo pwiy'aka mwene n'hupuwele wira asanennyu ahinvakatjiya otene, Aminoni pahi t'inviye: okhala wira Abasalomi ahulaphela omwinva okhuma nihuku nenne Aminoni anrupanalyewe Tamari nrokorawe. ³³ Tivo, nyuwo pwiy'aka mwene n'hupuwele wira: Asanennyu otene ahinvakatjiya: Aminoni pahi t'inviye. ³⁴ Nannanoru Abasalomi ahutthyawa. Okathi yowo, nlipa olipelela ahaweha, atthu entji awaka ephiro y'oBahurimi ephantti ya mwako. ³⁵ Ni Yonatani ahun'himerya mwene wira: Awo asanennyu anwa: tjotene tjiraneyale ntoko tjohimeralyakani. ³⁶ Ni owo numala olavula, aana a mwene yahuphiyatja nannanoru, khupacera wunla n'ukhuwela. Nave-tho mwene n'arumeyi awe yahunla ni wikhupanyerya ventji. ³⁷ NtoAbasalomi ahutthyawa, ni khutthyawela waTalimayi mwana Amihuri, mwene oGexuri. Ni Davidi anunla mahuku otene amunlelaka mwanawe. ³⁸ Numala Abasalomi otthyawa ahurwaa oGexuri khukhala wonwo iyakha ttharu. ³⁹ Ni mwene Davidi anuphavela onweha Abasalomi: Okala wira ahumalihiya unlawe amunlelaka Aminoni akhwale.