¹ APWIYA yahunveleliherya Davidiprofeta Natani, Natani owo ahurwaa okumana ni Davidi, khun'himerya wira: Mwinttettheni mmotja yahukhala alopwana eeli, mmotja thatjiri, nkinaku matsikhini. ² Thatjiri ole ahukhalana ipwittipwitthi tjintji n'imompe tjintji: ³ Nto matsikhini ole arina epwittipwitthi emotja yothiyana, owo anunthuma khiyan'huwa, ahunkhapelela mwapwittipwitthi ole khun'huwa wamotja nasanawe, anunlyiha eyolya awe, aninwureriha ekahi awe, ni anirupathi mumpani mwawe, anintjuka mumpani mwawe ntoko ari mwanawe. ⁴ Nihuku nimotja nletto ahuphiya vapuwani vawe thatjiri; thatjiri owo khatthunale winva epwittipwitthi awe wala emope awe, wira amvahe yolya nletto ole awale vapuwani vale, nto arumihale ovariya epwittipwitthi ya matsikhini ole, ni khumwinvela nletto ole. ⁵ Nave Davidi ahunviruwela ventji nlopwana ole, ni khun'himerya Natani wira:Ntoko ekhweli wira APWIYA akhala, nlopwana ole opankale tjitjammo onipwanela winviya. ⁶ Ni owo onun'hokoloxerya matsikhini ipwittipwitthi tjese, okhala wira otepa ottheka, ni khuhimmorela ekhiriri. ⁷ Nave Natani ahun'himerya Davidi wira: Nlopwana owo ti yenyu. Tjitjammo enihimyaya APWIYA, Muluku a Israyeli tin'ya: Miyo kiwottihaleni makhura wira nkhale mwene a Israyeli, ni kiwopolaleni mmatatani mwa Sawuli; ⁸ Miyo kihuvahani etthoko ya pwiy'inyu, ni kihapweha axarawe pwiy'inyu mmatatani mwinyu: ohiya vo kihuvahani omwene wa Israyeli ni wa Yuda; ni wakhala wira tjitthu n'ya tjotene tjihuyevelani, miyo kinuwatjereryani tjorera tjikinaku. ⁹ Vano, mwaha wa xeni, nthanyalinyu mulumo APWIYA, mpankaka tjitthu tjonanara vamethoni vaya? Nyuwo momwinviha Uriya muHiti ni ekatan'inyu, monkusa mwarawe khunkhaliha mwarinyu, ni momwinva nnivaka ni atthu Amoni. ¹⁰ Tivo nivaka khanimmala opwexa vapuwani vinyu; okhala wira mokithanya miyo, ni monkusa mwarawe Uriya muHiti khukhala mwarinyu. ¹¹ Tiva vanihimyaya APWIYA wira: mw'amutjinyu kinunkumiherya mmotja ontthuna wuhaxani, kinamwakusa axarinyu vamethoni vinyu kimvahe ntthu a etthoko'inyu, owo anarupa n'axarinyu wotjuwela atthu otene. ¹² Okhala wira nyuwo mpankale ni mwitiho; nto miyo kinwa owirihani oholo w'atthu otene a Israyeli, othana eiyari. ¹³ Nave Davidi ahun'himerya Natani wira: Kihatthekela APWIYA. Ni Natani ahumwakhula Davidi wira: Tjitjammo-tho APWIYA ahulevelelani yatthekelalinnyu: Khamwinkhwa-tho. ¹⁴ Nto mwana oyareliyennyu onakhwa, okhala wira n'haveiha APWIYA ventji. Ahimyakaru tjitjammo Natani ahuhokolela owannyawe. ¹⁵ Ni APWIYA yahunwereiha mwana a mwara a Uriya an'yarelalyawe Davidi, khukhala owereiya ventji. ¹⁶ Nave Davidi ahuxottela mwanamwane owo wa Muluku; ni Davidi ahukhotta olya etthu, ahukhuma, ni ahuviriha ohiyu wotene arupathalene vathi. ¹⁷ Ni makhulupale otene yahurwaa onthipelela wira avenye vathi, nto owo khatthunale, nnakhala khalyale yolya wamotja n'awo. ¹⁸ Ni nihuku na nethanu na pinli mwana ole ahukhwa; nto arumeyi awe Davidi khuvo alipihale nrima awe wira an'himerye mwene wira mwana ohokhwa, awo yahuhimeryana yaworu wira: Okathi mwanamwane a irawe anari nkumi, nahunthipelela mwene, owo khuhininwa mulumo'ihu: Vano numala mwana okhwa ninwerya tjayi on'himerya wira mwana ohokhwa? ¹⁹ Nto Davidi ahona wira arumeyi awe yanilavula vathi-vathi, khutjuwela wira mwana ohokhwa; tivo Davidi ahakoha arumeyi awe wira: Mwana ohokhwa? Ni awo yahumwakhula wira: Ayo ohokhwa. ²⁰ Nave Davidi ahuvenya vathi, ahurapa ahiireriha, ahuwara ekuwo tjorera, ni ahukela mumpani mw'APWIYA, khukokhorela mwemmo. Numala khuhokolela owannyawe, ni khuruma owaneliya yolya, ni khuwaneliya, khulyaka. ²¹ Ni arumeyi awe yahunkoha wira: Mwimpankelani tjitjammo? Mwana, anari nkumi, nyuwo mwanitthuka ni mwanunla; Vano vakhwalyawe nyuwo movenya khulyaka yolya. ²² Ni owo ahuwakhula wira: Mwana anari nkumi, miyo kahitthuka ni kahunla, kiraka wira: Muluku atthuna okonela othunku, wira mwana ahikhwe? ²³ Nto vano ohokhwa, kintthukelani-tho? Kinuwerya miyo on'humusa? Kihalale ti miya orwaa oryawe, nto owo khan'hokolela-tho wa miyo. ²⁴ Davidi ahummaliha Bathi-Xeba mwarawe, akhalaka ni yena, ahirupa-tho ni yena; ni khun'yara mwanawe mwanlopwana, ni khumvaha ntjina na Salomoni, APWIYA yahumfenta mwana owo: ²⁵ Khunruma porofeta Natani orwaa on'himerya Davidi, porofeta owo ahumvaha mwana owo ntjina na Yedidiya, mwaha w'PAIYA. ²⁶ Mahuku awo Yowabi ahutuphela oRaba nttetthe w'atthu Amoni, ni khukusa nttetthe owo. ²⁷ Nave Yowabi aharuma anamutthaka orwaa on'himerya Davidi, wira: miyo kotuphela oRaba, ni kokusa nttetthe wa matji. ²⁸ Vano, mwathukumanye anakhotto ahalale wonwo, nwe okusa nttetthe wolipihiya, okhala wira miyo kakusa nttetthe owo, n'hitthaneleke ntjina naka. ²⁹ Davidi ahathukumanya anakhotto otene ahuvenya arwaaka oRaba, ahutuphela, khukusa. ³⁰ Ni ahikumiha mmuruni mwawe ekhara yomwene, yarina ethonyerya ya wero, ni yarina maluku owarya; ekhara eyo yahuheliya mmuru mwa Davidi. Davi owo ahikusatho mihakhu tja mittetthe tjaharere watta.