¹ Mahiyu aya, okathi mamwene wamamlelalyaya orwaa okhattoni, Davidi ahunruma Yowabi, n'anakhotto awe otene, ni makhulupale awe otene a Israyeli; orwaa owana ekhotto awo yahuhonona elapo y'Amoni, khurukurerya nttetthe w'oRaba: nto Davidi ahuhala oYerusalemu. ² Nihuku nimotjka makaripi Davidi ahuvenya vamumulawe, khurwaa wettakatja vataratoni va enupa awe, anari vavale ahunweha nthiyana mmotja arapa, ari orera tjana. ³ Davidi ahavya wira antjuwele ari nthiyana xeni, ni khuhimeriya wira ari Bathi-Xeba mwana a Eliyami, mwarawe Uriya muHiti. ⁴ Davidi aharuma atthu, onrweela: ni owo khuwa, owo khurupana numala khuhokolela owani. Nihuku nenno, nthiyana owo wahummalela mwikho wa mahuku awe. ⁵ Ni nthiyana owo ahirupala, ni khuruma orwaa ohimeriya Davidi, wira: Miyo korupala. ⁶ Nave Davidi ahunruma namitthaka orwaa on'himerya Yowabi wira: Nkivelelihe Uriya muHiti. Ni Yowabi ahunveleliha Davidi. ⁷ Waphiyalyawe Uriya, Davidi ahunkoha ihali tja Yowabi, ni tjatthu, ni tja ekhotto. ⁸ Numala Davidi ahun'himerua Uriya wira: Nrweeke owannytinyu mwakhalw n'amwarinyu, ni mwarapihe inawu tjinyu. Ni Uriya ahikhuma mmapni nmwa mwene, ottuli wawe ahuwaneliya etthuvo yorera. ⁹ Nto Uriya kharwaale owani arupathale vankhora va enupa ya mwene, ni arumeyi otene a pwiy'awe. ¹⁰ Ni atthu yahun'himerya Davidi, wira: Uriya kharwaale owannyawe. Ni Davi9di ahun'himerya Uriya wira: Khan'hokolowale nkwaha worakama? ¹¹ Vano, exeni, n'hirwaaka owannyinyu? Uriya ahumwakhula Davidi wira: Nivuku nowatana, n'atthu a Israyeli ni atthu a Yuda, ari omaxaxani; ni pwiy'aka Yowabi, ni arimeyi otene a pwiy'aka ari okhottoni, ni miyo kinwerya tjayi orwaa owani n'ulya ni owurya, ni orupa ni anwaraka? Mwaha wa ekum'inyu nkintthuna opanka etthu tjitja ¹² Ni Davidi ahun'himerya Uriya wira: Nhaleke vava olelo-tho, ni omalo nvenyeke. Ni Uriya ahuhala oYerusalemu nihuku nenno nnihuku nottharelana. ¹³ Ni Davidi ahunlattulela, olya n'uwurya wamotjaru, mpakha on'hapaliha. Ni owo ahikhuma ohiyu yole khurwaa orupa nipuro nawe wamotja ni arumeyi a pwiy'awe; nto kharwaale owannyawe. ¹⁴ Oxa melo aya, Davidi ahunlepela epaphelo Yowabi, khunvaha Uriya wira anvahererye Yowabi owo. ¹⁵ Mpapheloni mwalepiye-mo, wira: Mwin'holihe Uriya ola okhottoni nipuro ninvihexaya,ninumala mwin'hiyeke vekha, wira inviye. ¹⁶ Tjitjammo Yowabi arukureryale nttetth, ahumwemexa Uriya nipuro natjuwel'awe yarivi awanani otupexa. ¹⁷ Atthu a mwinttettheni yahikhuma votutuxa, khwatuphela atthu a Yowabi, anakhotto akina ni arumeyi akina a Davdi yahinviya; ni Uriya muHiti ahukhwela wonwo ¹⁸ Yowabi ahunruma namutthaka, orwaa wa Davidi on'himera tjotene tjakhumelelale okhottoni. ¹⁹ Ni an'himeryaka namutthaka owo wira: Mwamaliha omwlakelela mwene tjotene tjikhumelelale tja ekhotto, ²⁰ Mwne owo oviruwelani, ohimeryakani wira: Mwattamelelani nttetthe nwanaka ekhotto? Khamwitjuwelale wira awananinyu yari vakakoni yanivonya matthere? ²¹ Khannupuwela okathi inviyawe Abimeleki mwana a Gedeyoni? Khahiyo nthiyana ari vakakoni ammorihelale nxilo, khukhwela vavo oTebesi? Exeni mwattamel'inyu vakakoni? Nave-tho nyuwo mwakhule wira: Nave-tho nrumey'inyu Uriya muHiti ohokhwa. ²² Namutthaka ole ahuvenya khurwaa on'himerya Davidi tjitthu tjotene tjarumiyawe ni Yowabi. ²³ An'himeryaka Davidi iraka: Awananihu yari otupexa onivikana hiyo, awo yahintuphela votutuxa khumaka mmittettheni mpakha omathalani, nto hiyo nahuwomola mpakha v'ankhora va nttetthe; ²⁴ Okathi yowo alipa a matthere yari okakoni yahinilupanyerya ni matthere aya, arumeyi akina a mwene yahinviya; ni nrumey'inyu Uriya muHiti ahukhwela vavale. ²⁵ Davidi ahun'himerya namutthaka ole wira: Mwanlipihe nrima Yowabi: wan'himerye wira ahotjeye, mwaha wa tjitthu tjikhumelelale tthiri ekatana khinunthanla ntthu: atepeke-tho otuphela nttetthe, mpakha ohonona. Miyo kinnunlipiha. ²⁶ Mwarawe Uriya ahitjuweliya wira in'yawe Uriya ahukhwa, owo ahimunlela in'yawe. ²⁷ Wamalalyawe omunlela, Davidi ahiruma orweeliya owannyawe: Owo ahukhala mwarawe Davidi, ni khun'yarela mwana. APWIYA yahuviruwa ventji, ni etthu yapankalyawe Davidi.