¹ Ahukhala nlopwana a nihimo na Beniyamini, nlopwana a ekuru ni owerya, ihaniya Kixi mwana Abiyeli, n'otjulu wa Serori, etthoko ya Bekorathi, a nloko n'Afiya. ² Ahukhalana mwana ihaniya Sawuli, mmiravo orakama ni orera, kharivo mwammiravo a Israyeli alattan'awe orera; orakama wawe wanivikana orakama w'atthu akina makhata ni muru. ³ Nihuku nimotja aburu othiyana a Kixi, tithi awe Sawuli; yahunrimela vano ahun'himerya Sawuli: Mwinkuse nrumey'inyu mmotja, nrwee mwaphavele, aburu awo. ⁴ Sawuli ahettetta omiyakoni w'Efrayimi, n'ilapo y'oXalixa, khuhaphwanya aburu awo. Yahettetta elapo y'oXalimi, khuhaphwanya. Yahettetta elapo y'oBeniyamini, khuhiphwanya etthu. ⁵ Vaphiyalyaya elapo y'oSufi, Sawuli ahun'himerya nrumeyi awe an'holale wira: Nirwee, nihokolele owani, kinnova wira atithi, yaliyalaka aburu, anuvelavela mwaha wa hiyo. ⁶ Vano nrumeyi awe owo ahun'himerya wira: Nto okhala nttetthe ola nlopwana a Muluku, owo onniroromeleya ventji: tjotene tjinihimyawe, tjinniraneya. Atthuna, ononihimerya ontthun'ehu waphwanya aburu. ⁷ Sawuli ahumwakhula wira: Nirweeke nannano va: nto ninkela onvaha exeni nlopwana owo? Yolya yonimalela, khanirina-tho etthu ekina y'onvaha nlopwana a Muluku: nireke tjayi? ⁸ Nrumeyi awe ahun'himerya, wira: Kokhalana va ntjurukhu vakhani wa paratha: kanvahe nlopwana a Muluku, owo ononihimerya ontthun'ehu waphwanya aburu. ⁹ (Khalayi wIsrayeli khula ntthu arwwa olavula ni Muluku, ahimya tjammo: Nirwee nakumane ni namona: Tthiri ntth'ule onihaniya olelo va porofeta, khalayi ihaniya namona). ¹⁰ Sawuli ahumwakhula nrumeyi awe wira: n'hupuwela orattene; vano, nto, nirwee. Ni yahirwaa onttettheni akhalawemo nlopwana a Muluku. ¹¹ Ettharaka tjitjale ephiro yarwaa onttettheni, yahikumana n'axarusi akina yarwaa orika matji, khwakoha wira: Namona ori nttettheni? ¹² Vano ax'arusi awo yahakhulatsa, wira: Ayo ori mumu; ovira nannano va: mwakuva vale, nnamphwanya, nkelakaru mwinttettheni nnamphwanya ophiya olelo nttetthe ola okhala wira atthu anrwaa ohela nkuttho nipuro nihu nottukhuwa. ¹³ Atthu alattuliye nira nna, khampacera olya ahinatthi ophiya namona, okhala wira owo ompacera oreriha tjovaha, numala atthu t'anilyaya. Mwakuveke, nnamphwanya, ohinatthi owela nipuro nottukhuwa. ¹⁴ Sawuli ni nrumeyi awe yahurwaatsa onttettheni; vaphiyalyaya vankhora vanttetthe, yahikumana n Samuweli awaka ephiro yele arwaaka nipuro nottukhuwa. ¹⁵ Vano ntjana naya Sawuli, awalyawe, APWIYA yahun'himerya Samuweli, yiraka: ¹⁶ Malo okathi ene yola kinamuvelelihani nlopwana a nihimo na Beniyamini, mwinttikhe omwene w'atthu aka a Israyeli, owo onrwaa owakiha atthu aka mmatatani mw'aFilisti: tthiri miyo kihona phawa w'atthu aka, okikhuwelela waya wokiphwanya. ¹⁷ Vano Samuweli wamonalyawe Sawuli, APWIYA yahun'himerya wira: Ti yowo nlopwana ohimeralyakani; ti yowo onrwaa owettiha atthu aka. ¹⁸ Sawuli ahikumana ni Samuweli eriyari ya nkhora, khun'himerya wira: Xontte kinnulapelani wira mwinthonyerye enupa ya namona. ¹⁹ Samuweli ahumwakhula Sawuli, wira: Namon'owo ti miyo: nkihole nipuro nottukhuwa, olelo owel'inyu munalya wamotja ni miyo, malo vatsitsu kinamohimeryani tjitthu tjinkoh'inyu, numala kulaxeryeni. ²⁰ Mwaha w'aburu yarimelale matsuri, n'hivalavele, aphwanyiya. Vano tjorera tjotene tja Israyeli, tjinrwaa olipihiya n'apani khan'hiyo nyuwo n'itthoko ya tithinyu? ²¹ Sawuli ahun'himerya, wira: Nto miyo nkihiyo a nihimo na Beniyamini, niri nokhitserya oyeva mwa mahimo otene a Israyeli? Etthoko aka khahiyo yoyevaxa ovikana mahimo otene a Beniyamini? Vano exeni nkihimeryaka tjitthu n'ya? ²² Nto Samuweli ahunrwaana Sawuli ni nrumeyi awe, ahakeliha mpani, khwakilathiha mapuro ottittimiheya eriyari y'ale otene yalattuliye, yari ntoko alopwana miloko miraru. ²³ Samuweli ahun'himerya nlipa owapeya wira: Nwane yolya kuvahalyakani, wira mwintjathi vawayaru. ²⁴ Namwapeya, ahuwana mwetto ni mwila, khwintjathi oholo wa Sawuli. Ni Samuweli ahira: Tila mphantti otjukeriy'ennyu: Nlyeke; okhala wira karimwintjathi mwayini wutsukeryani, okathi kahimalyaka wira: Miyo kihalattula atthu. Ni Sawuli ahilya wamotja ni Samuweli nihuku nno. ²⁵ Vamalalyaya olya yahikhuruwela mwinttettheni, vano wahilokiheriya olili wa Sawuli vataratoni. ²⁶ Mmeloni mwaya vaxakaru: Samuweli ahumwihana Sawuli, ira arupaka nanlelo; khun'himerya wira: Nvenye, kintthuna wulaxeryani. Sawuli ahuvenya, khupacera wetta ekwahawe, wamotja ni Samuweli. ²⁷ Okathi wakhuruwaya mwinttettheni, Samuweli ahin'himerya Sawuli wira: Mwin'himerye nrumey'inyu wira aniholele, (nrumeyi ole ahuhola); nto nyuwo mwemele vava kintthuna wuhimeryani tjinihimyawe Muluku,