¹ Vano Samuweli ahikumiha nrinki wa makhura, ahitthela makhur'awo vamuru va Sawuli, khunkhuparela ni ebetjo, ahimyaka wira: Kahiyo APWIYA ahuttikitthelani wira nkhale nlipa owettiha atthu aya? ² Olelo va, mwavenya vava nrwaaka elapo'inyu, nnamwaphwanya alopwana eli vamahiye va Rakheli, mwinkanoni mw'elapo ya Beniyamini, oZeliza, awo anamuhimeryani wira: Aburu yaphavelinyu aphwanyiya, vano atithinyu ahiya watthokelela aburu awo, enavelavela mwaha wa nyuwo, yiraka: Kimwirele exeni mwanaka? ³ Nvenyaka vale nrwaaka oholo, nnaphiya wamwirini wa Tabori, wonwo nnakumana n'alopwana araru erwaaka onkokhorela Muluku oBetheli, mmotja akusalene ipuri ttharu, nkina iphau ttharu, nkina-tho akusalene ekanatta y'evinyu: ⁴ Awo, anrwaa wukohani nrettele, anamuvahani iphau pinli, makhelele mmatatani mwinyu. ⁵ Vaholo vaya nnaphiya oGibeya wa Muluku oryayawo nipuro nottukhuwa n'aFilisti; nkelakaru mwinttettheni munakumana ni muloko wa maporofeta ankhuruwa nipuro nno nottukhuwa, yipaka, ni yinaka, eholeliyaka n'atthu anopa malapa ni jeje, n'iphivi ni malope, elaleyaka: ⁶ Okathi uwo eroho y'APWIYA enamukhuruwelani enamuvarani, nyuwo nnatthuka muloko ni maporofrt'awo, ni nthatuwaka nlopwana nkina. ⁷ Mona vale tjikhumelelaka ithonyeryo n'yo tjotene, mwireke tjotene tjinonelinyu orera, okhala wira Muluku ori ni nyuwo. ⁸ N'holeke nrwaaka oGilikali; vano miyo kinawa wonwo okumana ni nyuwo wira kahele mikuttho tjopahiya, ni mikuttho tj'opatthani. Mwalitteke mpakha mahuku mathanu na meli, mpakha miyo owa okumana ni nyuwo, okathi yowo kinamuhimerani tjitthu tjirin'inyu wira ⁹ Sawuli ahuvenya vale khurwaa vano amwalanakaru ni Samuweli, Muluku airukunusa nrimawe; nihuku nenno tjahikhumelela ithonyeryo tjotene tjahimeriyawe. ¹⁰ Vaphiyalyaya oGibeya, muloko wa maporofeta wahikumana n'uwo, nannanoru eroho ya Muluku yahinkhuruwela Sawuli khunvara, owo ahupacera wipa ni wina ni maporofet'awo. ¹¹ Atthu otene yantjuwela Sawuli okhuma khalai emonaka atakaniheiyene ni maporofeta nkhalelo mmotjaru, yanikohana yaworu yiraka: Enkhumelelale exeni mwana a Kixi? Khino Sawuli okhalihiya porofeta? ¹² Nlopwana mmotja e'lapo yeyo khwira: Nto axitithi aya t'apani? Vava vakhumelelalyaya ehantitsi enihimya wira : Khino Sawuli nave okhalihiya porofeta? ¹³ Vamalalyawe wipa ni wina, Sawuli ahirwaa owani. ¹⁴ Atat'awe yahunkoha Sawuli ni nrumeyi awe wira: Mwarwaale vai? Sawuli ahumwakhula wira: Narwaale waphavela aburu; wona khinaphwanyale, nahirwaa onthotola Samuweli. ¹⁵ Atat'awe Sawuli yahun'himerya wira: Miyo kinnulapelani wira nkalikelele tjuhimeralyaweni Samuweli uwo. ¹⁶ Sawuli ahumwakhula wira: Onihimeryale wira aburu aphwanyiya. Nto Sawuli khahimeryale atat'awe tjitthu tjahimeriyawe mwaha w'omwene awe, Samuweli tjan'himeralyawe yena khahimyale. ¹⁷ Samuweli ahathukumanya atthu otene a Israyeli vamethoni v'APWIYA oMisipa; ¹⁸ Khwahimerya wira: APWIYA Muluku a Israyeli tanihimya wira: Ti miyo kokumihaleni wEjitu, ti miyo kiwopolaleni mmatatani mw'atthu a wEjitu wonwo, ni mmatatani mwa mamwene otene yuhaxani: ¹⁹ Nto nyuwo olelo monkhotta Muluku'inyu, yowo owakihaleli ihatsara tjinyu tjotene movelavelani mwinyu motene, nyuwo mon'himerya Muluku wira: Hoye, nto nnivahe mwen'ihu. Tivo, nrweeke vano vamethoni v'APWIYA nloko t'inloko nihimo ti nihimo. ²⁰ Samuweli ahumwattamiherya atthu a Israyeli nihimo ti nihimo vano, vano ahavya eparakha khureriya nihimo na Beniyamini. ²¹ Numala ahumwattamiherya nihimo na Beniyamini etthoko ti etthoko, ahavya-tho eparakha khureriya etthoko ya Matiri; numala ahireriya Sawuli mwana a Kixi. Tivo yahumphavela Sawuli uwo, nto khuhimphwanya. ²² Vano yahakoha-tho APWIYA wira, ntth'uwo ohowa wala khawale. APWIYA yahakhula wira: Ohowa onuvitheya eriyari ya miritt;'iyo. ²³ Sawuli ahurweeliya, khuwaniya vale, khwemela variyari y'atthu otene, orakama wawe wanavikana atthu otene makhata ni muru. ²⁴ Samuweli ahahimerya atthu otene wira: Tthiri ula othanliya n'APWIYA, khuvo onlikanan'awe eriyari y'atthu otene? Atthu otene yahikhuwela entthapelaka, erunyaka wira: Akhale mwen'ihu! ²⁵ Samuweli ahalakiherya atthu ikano tj'omwene, ahulepa ikano n'yo mulivuruni, khwintjathiki elivuru eyo vamethoni v'APWIYA. ²⁶ Ni Samuweli ahalaxerya atthu otene khula ntthu arweeke owannyawe. Nave Sawuli ahihokolela owannyawe oGibeya, alopwana a ekuru, awo APWIYA yalipihalyaya nrima yahuntthara. ²⁷ Vano alavilavi akina yanihimya wira: Ola onwerya tjai onopola? Awo yahunthanya tjitjale, khukhotta onvaha etthu.