¹ Nuvira mweri mmotja Nahaxi mwene Amini, ahuvenya watuphela atthu oYabexi w'oGalaadi khurukurerya nttetthe owo. Atthu oYabexi yahun'himerya Nahaxi uwo wira: Nataneke ni nyuwo, nikhaleke awinyu. ² Nahaxi ahuwakhula wira: Ayo kinamwatana ni nyuwo, nto kuphelekeni nitho nolopwana oten'inyu, opahuwa winyu nno okhale wuliya muru w'atthu otene a Israyeli. ³ Makhulupale oYabexi yahunlapela-tho wira: Nalitteke nanlelo mahuku mathanu na meli, ninrwaa waruma anamitthaka elapo yotene ya Israyeli; ahiukhale onrwaa onikhaliherya, ninrwaa wivahererya wa nyuwo. ⁴ Anamitthak'awo yahuphiya oGibeya waryawe Sawuli, khwalalerya atthu otene muhupi uwo; atthu awo yahikhuwela ekuttho. ⁵ Okathi ene yowo Sawuli ira akhumaka omatta wawe, omolelaka imompe tjawe; khukoha wira: Ekuttho xen'iyo, y'atthu ala? Atthu yahumwalikelela n'hupi w'atthu oYabexi. ⁶ Inwakaru mulumo ala Sawuli ahuvariya n'iroho ya Muluku, khuviruwa ventji. ⁷ Vano ahuvara imompe pinli, khuthikilatsa, khwaruma anamitthaka awo orwaa elapo yotene ya Israyeli, yalaleye wira: Ti tjitjammo tjinrwaaya othikilatsiya imompe tj'atthu otene ale ankhotta orwaa okhottoni ni Sawuli ni Samuweli. APWIYA yahawanela wova atthu otene nloko notene nahuvenya ni nrima mmotja, ⁸ Sawuli ahathukumanya oBezeki khuwalikelela; atthu a Israyeli yari ikonto miloko miloko miraru, ni atthu oYuda yari ikonto miloko miraru. ⁹ Vano anamitthaka oYabexi yahuhimeriya wira: Mwahimerye atthu oYabexi oGalaadi wira: Malo ntjuwa nitepaka oviha, nnamwakihiya. Anamitthak'awo, yahurwaa khwahimerya atthu oYabexi ehapar'iyo, atthu awo yahutteliya nrima ventji. ¹⁰ Khun'himerya Nahaxi wira: Malo ninkhumela watana ni nyuwo, nnirihe ntoko tjintthunennyu. ¹¹ Vaxalyaya Sawuli ahakawanya anakhotto awe makoto mararu, awo yahatuphela awanani aya vatsitsw'ene, omaxaxani waya khuwinvakatsa ewomolaka mpakha othana eriyari; atthu yahalale yahumwaramwareya, khuhiyaphwanyaneya eli eli. ¹² Atthu a Israyeli yahun'himerua Samuweli wira: Ari vai atthu ale yahatthuna wira Sawuli anettiheryeke hiyo? Nnivahererye atthu awo, hiyo niwinvakatse. ¹³ Nto Sawuli khwira: Hoye olelo nihuku notthapa ahinviye ntthu nnakhala mmotja, tthiri olelo APWIYA awakiha atthu a Israyeli. ¹⁴ Samuweli ahahimerya atthu wira: N'we, nirwee oGiligali wonwo nintthapele-tho Sawuli mwen'ihu. ¹⁵ Atthu otene yahurwaa oGiligali, wonwo vamethoni v'APWIYA yahuntthapela Sawulib okhala mwene aya; oGiligali wonwo yahahelela mikuttho APWIYA tj'opatthani vano Sawuli n';atthu otene yahutthapa nutteliya nrima.