¹ Samuweli ahahimerya atthu otene a Israyeli wira: Ntjuwele wira miyo kihira tjotene tjakilapenlinyu, kihuvani mwene wira awettiheryekeni. ² Tthiri, vano, okhuma olelo mpakha oholo ti mwene ontthuna owettiheryakani. Miyo kihuluvala komela ipwi: nto asan'aka annikhala eriyar'inyu, ti miyo kiwettiheryaleni okhuma omiravo aka mpakha olelo va. ³ Vano miyo kiri va; vakhala wira miyo kirale etthu yotakhala nkihimyatse vava vamethoni v'APWIYA ni va mwene onthanlalyaya, okhala amwakhalyaka emompe awa, wala Buru awe, okhala ampuheralyaka, wala on'haxalyaka, okhala akikatthenle wira kihiphuke tsana akhumelele; miyo kinunliva tjotene. ^{4 5} Atthu yahumwakhula wira: Hoye nyuwo khamunipuheryale, wala khannihaxale, nnakhala khankattheliye n'intthu. Samuweli ahuwirela: APWIYA ni mwene onthanlalyaya, t'anamona olelo va vamethoni vinyu, wira khankiphwanyanale nlattu. Atthu yahumwakhula wira: Ayo t'anamona. ⁶ Nave Samuweli ahahimerya atthu wira: Ayo t'APWIYA yawo anthanlale Moise n'Aroni, khwakumiha axitith'inyu elapo ya wEjitu. ⁷ Vano, nto, mwemelatse orinyu, wira kohimy'eni vamethoni v'APWIYA mwaha wa tjorera tjotene APWIYA, tjiwirelalyayani nyuwo n'axitithinyu. ⁸ Okathi Yakobe n'itthoko awe waphiyalyawe wEjitu khuhaxiya wonwo axitithinyu awo yahikhuwelela w'APWIYA, vano APWIYA yahaveleliherya Moise n'Aroni, akhalale tiyakumihale axitithinyu awo wEjitu, khwarwaana elapo ela wira ekhaleke mumu. ⁹ Nto awo yahaliyala APWIYA Muluku aya, ti vo APWIYA yahavahererya mmatatani mwa Sisera mulupale anakhotto oHasori, ni mmatatani mw'aFilisti, ni mwa mwene oMowabi, khuhaxiya n'awo. ¹⁰ Okathi uwo yahikhuwelela-tho w'APWIYA, yiraka: Nottheka, okhala wira nomwalana n'APWIYA, nirwaaka warumela amuluku a bayali n'astarte: Nto, vano, nnakiherye mmatatani mw'awananihu, nintthuna worumelani nyuwo. ¹¹ APWIYA yahaveleliherya Gedeyoni, ni Bedani, ni Yefti, ni Samuweli, ni awakiheryani mmatatani mw'awananinyu otene, nyuwo mwahukhala ni nrettele. ¹² Vano vakhumalyawe Nahaxi mwene Amoni awaka wutuphelani, nyuwo mwahikihimerya wira: Hoye, mwene pahi t'ontthuna onettiherya; nto mwen'inyu t'APWIYA Muluku'inyu. ¹³ Vano, nto, ola va ti mwene onthanlalinyu, yowo onlapelalinyu; khuvahiya n'APWIYA. ¹⁴ Mwawovaka APWIYA ni mwarumelaka, ni mwawinwelelaka, mwahikhottekeru ekano tjaya APWIYA, wetso nyuwo ni mwen'inyu nnamwettiheriya nanlelo n'APWIYA Muluku'inyu. ¹⁵ Nto mahinweleleke ekano tj'APWIYA, mwakhottaka tjoruma tjaya APWIYA, APWIYA anamurukunuwelani ntoko tjahukhumalyaya axitith'inyu. ¹⁶ Nto n'haleke nanlelo vava, mone tjotikinisa APWIYA anrwaaya ohumiherya vamethoni vinyu. ¹⁷ Mahuku ala elimwe ehinrupa epula khahiyo? Vano miyo kinrwaa walapela APWIYA, awo anukumiherya etari n'epula; tivo ntjuwelexe ntthokelele etthu yotakhalexa epankalinyu vamethoni v'APWIYA, okathi walapelinnyu mwene. ¹⁸ Ni Samuweli ahalapela APWIYA; nihuku nenno APWIYA yahuveleliha itari n'ipula; vano atthu otene yahutsareya wova mwaha w'APWIYA ni mwaha wa Samuweli. ¹⁹ Atthu awo khun'himerya Samuweli wira: Nnixonttele hiyo w'APWIYA Muluku'inyu, wira nihikhwe: Tthiri tjotakhala tjihu tjotene nihuntjererya ekina nunlapelaka mwene. ²⁰ Vano Samuweli ahahimerya atthu wira: Vekhweli mopanka etthu yotepa otakhala; nto n'hoveke: N'himwalane-tho n'APWIYA, mwarumele APWIYA awo ni nrim'innyu wotene: ²¹ N'himwalane n'APWIYA n'hatthareke amiluku ethiru ahintekela etthu ahinwerya owopolani, tthiri awo khahi etthu. ²² APWIYA t'alaphelale mwaha wa ntjina naya: Okala wira awo khanrwaa wanyanyala atthu aya okhala wira antthuna wokhalihani atthu a nloko naya. ²³ Vano miyo, nkinihiya wulompelakani w'APWIYA nuwittutjihakani iphiro tjaya tjoloka; kahiya vale kamwira etthu yotepa onanara vamethoni v'APWIYA. ²⁴ Nwoveke APWIYA, mwarumeleke ni nrim'innyu woytene nuroromeleya, ntthokelele tjitthu tjotikinisa tjupankelalyayani. ²⁵ Nto mwiraka tjitthu tjotakhala, nnupweteya nyuwo ni mwen'inyu.