¹ Sawuli ahettiherya omwene awe eyakha emotja; apaceralyawe owettiherya atthu a Israyeli mpakha iyakha pinli, ² Sawuli ahathanla anakhotto ikonto ttharu a Israyeli: anakhotto ikonto pinli yahukhala ni yowo oMikimasi omiyakoni w'oBetheli, ni anakhotto ekonto emotja yahukhali ni Yonathani oGibeya nlaponi mwa Beniyamini; atthu akina otene ahamwarexa khuhokolowela owannyaya. ³ Yonathani ahumwinva nkhulupale aFilisti ari oGeba, aFilisti yahitjuwela nannanoru. Vano Sawuli ahiruma wopiya malope elapo yotene ya Israyeli, yiraka: Mwinwe atthu otene aHeberi. ⁴ Tjitjammo atthu otene a Israyeli yahitjuwelihiya wira Sawuli ahumwinva nkhulupale aFilisti; tivo aFilisti awo yaniwunlela ekuhu atthu a Israyeli. Atthu otene yahunthukumanela Sawuli oGiligali. ⁵ Nave aFilisti yahuttottelana wira yatuphele atthu a Israyeli, yarina ikaro ikonto miloko miraru, n'anakhavalo ikonto thanu na motja, yarina-tho anakhotto akina ohalakeleya owatta ntoko mihava tja mpahari; awo yahurwaa omaka oMikimasi, okherekhere n'oBethi-Aveni. ⁶ Atthu a Israyeli yahuvalavela ventji, (okhala wira yahitupheliya n'awanani aya miphantti tjotene), akina yahivithatja mmakhukuni mwa miyala, wala mulittini mowinxa, akina yahivithatja mphakani mwa miyala, wala mmiyakoni, wala mwehimeni mowumma. ⁷ AHeberi akina yahulapuwa muo Yordani etthjawelaka nlaponi m'oGadi ni m'oCalaadi: ni Sawuli ahalle oGiligali, ni atthu otene yanuntthara ottuli ethukumelaka. ⁸ Sawuli ahumaka wonwo nanlelo mahuku mathanu na meli, anwehereryaka Samuweli ntoko an'himeralyawe; nto Samuweli ahupitsa ophiya oGiligali, tivo atthu yahupacera onnyanyali Sawuli n'umwareya. ⁹ Vano Sawuli khwira: Nkiwanele inama kihite kihele nkuttho wopahiya. Ni vekhweli Sawuli ahuhela nkuttho wopahiya. ¹⁰ Amalihakaru ohelankutth'owo, Samuweli ahuphiya; Sawuli ahuvenya arwaaka omwakhelela. ¹¹ Samuweli ahunkoha wira: Mwiraleni? Sawuli ahumwakhula wira: Kawehakaru atthu aka okinyanyala n'umwareya, vano nyuwo mpitsaka owa, n'aFilisti ethukumanalene oMikimasi, ¹² Miyo kahuhimya yomiru wira: kovalavela aFilisti anrwaa okituphela oGiligali, miyo kihinatthi wakurunusa nrima APWIYA. Tjitjammo kihupuwela wira, kahana ohela nkuttho wopahiya. ¹³ Nave Samuweli ahun'himerya Sawuli wira: Mopanka tjitthu tj'ololo; mokhottha owinwelela APWIYA Muluku'inyu, ntoko tjorumalyayani; mwawiwelelale APWIYA awo yanalipiherya omwen'inyu nwettihaka atthu a Israyeli wa mahuku otene. ¹⁴ Nto vano omwen'inyu onamala: APWIYA ahithanlela nlopwana owinwelela, ahunkhaliha mwene aatthu aya, okhala wira nyuwo khamwaiwelelale tj'oruma tj'APWIYA tjorumalyayani. ¹⁵ Ahimyakari tjitjammo Samuweli, ahivenya oGiligali arwaaka oGibeya nlaponi mwa Beniyamini. Vano Sawuli ahuwalakelela anakhotto yahalale n'uwo, yari ntoko miloko miloko mithanu namotja. ¹⁶ Sawuli ni Yonathani mwan'awe, n'atthu yahalale n'awo, yahumaka oGibeya w'oBeniyamini: nto aFilisti yira emakalene oMikimasi. ¹⁷ AFilisti yahikhuma omaxaxani waya ekawiyene makoto mararau. Nikoto nopacera nahukela ephiro ya wOfra nlaponi mwa Xuwali. ¹⁸ Nikoto n'onapili nahukela ephiro y'oBethi- Horoni, ni nikoto n'onattharu nahukela ephiro ya muro y'akusupa ephantti ya wothakoni. ¹⁹ Mahuku awo elapo yotene ya Israyeli kharivo nlipa ohona nnakhala mmotja; okhala wira aFilisti yahuhimya wira: Atthu aHeberi ehihane ikatana tjaya ni mavak'aya. ²⁰ Tjitjammo atthu a Israyeli yanukhanyererihiya orwaa w'aFilisti wira yanoneke iyuma tjaya, ihipa tjaya, amaxatto aya, n'ikatana n'iheko, ²¹ Onona ihipa n'ikatana waliviya ntjurukhu miraru, vano othokola mwalo, waliviya ntjurukhu minli. ²² Tjitjammo nihuku natupheliy'aya oMokimasi anakhotto a Sawuli ni Yonathani khiyarina xowa nnakhala mavaka, tjahuphwanyiya pahi tja Sawuli ni Yonathani, mwan'awe. ²³ AFilisti yahiruma nikoto nimotja n'anakhotto orwaa othatana mphironi m'oMikimasi.