¹ Nihuku nimotja, Yonathani mwana a Sawuli ahun'himerya nrumeyi awe atanaweno anwanelale iyuma tja ekhotto: Nwe nilapuwele ekhopela ekina emakalyaya aFilisti, niphoye omaxaxani waya. Vano khahimeryale etthu atithi awe. ² Sawuli ahukhala okherekhere w'oGibeya, nkhitte mwa mwiri wakhala oMigroni, wamotja n'uwo yahukhala anakhotto wattama miloko miloko mithanu namotja. ³ Ni Ahiya mwana Ahitubi, munnawe Ikabodi, mwana a Pineha, mwana a Eli, ari nlipa a nkuttho oSilo, awaralene efodi; atthu khiyatjuwelale wira Yonathani ahuvenya. ⁴ Ephiro yavirawe Yonathani wira aphiye waryaya aFilisti, tjahukhala miyala minli mphironi, ninno ninno; mwala mmotja wihaniya Bosesi nkina Seni: ⁵ Mmotja wahukhala ephantti enikela epheyo wattamelale n'oMikimasi, nkina wari ephantti y'okhutsini wattamelale n'oGibeya. ⁶ Numala, vano, Yonathani ahun'himerya nrumeyi awe ettanawe wira: Nirwee, niphiye vamqkalyaya amalapo ale ohineliya: yatthuna APWIYA onivaha wawerya awananihu; hata nikhalaka vakhanixa. ⁷ Nrumeyi awe ahumwakhula wira: Mwireke tjotene tjinonelinnyu orera: nipuro nintthun'ennyu orwaa, miyo kinamuttharani. ⁸ Ni Yonathani khwira: Varera, vano nirwee mpakha vakhiviru vaya, naitsoniherye wa yawo. ⁹ Yanirela wira: Mwemele vavo hiyo ninwa wonwo orinyu; nantso nemeleke vavale, nihirwaaka okumana n'awo. ¹⁰ Nto yanirela wira: nantso nweke wono orihu: hiyo ninarwaa wakumanana, tthiri eyo enukhala ethonyeryo wira APWIYA anrwaa onivahererya awananihu mmatatani mwihu: eyo entthuna okhala etthonyeryo'ihu. ¹¹ Vano, yahurwaatja khwitjoniherya, w'alipa olipelela aFilisti, ni aFilisti awo yahupuwela wira: Nwone aHeberi ale, anikhuma munikhukuni mwipithalyaya. ¹² Alipa olipelela yahunkhuwelela Yonathani ni nrumeyi awe, wira: Nwe wono nokhalana etthu yowohimeryani. Yonathani ahun'himerya nrumeyi awe wira: Nirwee nkitthareke, APWIYA ahavaha ekuru tjowawerya. ¹³ Yonathani ahuwela akhanyereryaka ni matata n'inawu, nrumeyi awe ahuntthara; Yonathani qahaqtuphela aFilisti khwaphwata, vano nrumeyi awe ahuwinvakatsa ottuli wawe. ¹⁴ Okathi uwo Yonathani ni nrumeyi awe, ahuwinvakatsa alopwana vakhuviru miloko minli nipuro namukhani. ¹⁵ Vano aFilisti yahututhuwatsa wova wahumwarela omaxaxani ni mmawani, atthu otene aFilisti alipa olipelela n'anakhotto otene; yahuthukumela ni wova, elapo yahuthukumela: vano, wari wova, w'awaniye ni Muluku. ¹⁶ Vano alipa olipelela a Sawuli yari oGibeya nlaponi mwa Beniyamini khuwona atthu entji yamwareya, etthyawelaka miphantti tjotene, yari omwaramwareya. ¹⁷ Sawuli ahuwirela atthu yarinawe: Nwihane atthu, nimone tani awihu ovenyale. Vaihaniwaya atthu, yahona wira Yonathani ni nrumeyi awe kharivo. ¹⁸ Vano Sawuli ahun'himerya Ahiya wira: Nwane nivuku nowatana na Muluku. Okhala wira nivuku nowatana na Muluku nari n'atthu a Israyeli. ¹⁹ Vano Sawuli valavulalyawe ni nlipa a nkuttho, omaxaxani w'aFilisti wahutepa onyakuleleya, ni wanutepa wuntjerereyaka. Vano Sawuli ahun'himerya nlipa a nkuttho wira: N'hiyeke pahi tjitjammo. ²⁰ Sawulu ahathukumanya atthu awe otene, khutthamakela okhottoni: Nto yahona wira aFilisti waripalyaya owitho yanuwana yaworu, ni yanitepa winvanana ventji. ²¹ AHeberi akina yarwaale omaxaxani w'aFilisti okathi w'ottuli enarumela, yaharukunuwela aFilisti awo omaxaxani wenwe, ni awo-tho yaharukunuwela-tho atthu a Israyeli khutakaneleya n'alopwana a Sawuli ni a Yonathani. ²² Atthu otene a Israyeli yaipithale omiyakoni wa Efrayimi, watjuwelalyaya wira aFilisti yanutthyawa, yahukela-tho nkhottoni khupacera owomola. ²³ Tjitjammo nihuku nenno APWIYA yahavaha atthu a Israyeli wawerya awanani aya. Vano ekhotto yahupwaha oBethi-Aveni. ²⁴ Atthu a Israyeli nihuku nenno yahiluttuwa; okhala wira Sawuli ahalaphiha atthu, wira: Otakhaliya ntth'ule ontthuna olya wahinlale, kihinatthi wapwetesa awanani aka, ntthu owo atakhaliye. Tivo nihuku nenno khuvo alyale etthu. ²⁵ Vano atthu otene yahukela ntakhwani mapuro awo khuyarere mahepepe oravo. ²⁶ Tivo, vano, atthu vakelalyaya ntakhwani mmo, yahuweha mahepepe yattonyerya vathi; nto khuvo alyale etthu: okhala wira atthu yamova valaphihiyaya. ²⁷ Vano Yonathani khamwinwale Sawuli alaphihaka atthu, owo ahuntexa ttotto awe, ahuntsamiha moravoni, khulyaka orav'owo; makhuva yahunlipa nannanoru. ²⁸ Vano nlopwana mmotja ahun'himerya, wira: Atithinyu ahalaphiha atthu, wira: Otakhaliya ntth'ule ontthuna olya olelo. Tivo vannivolaya etala yintji. ^{29 30} Yonathani khwira: Atithi ahahonona atthu. Mone miyo kolipa mmakhuvani, okhala wira kiholya oravo vakhani: Vano atthu yalyale olelo tjitthu tjiwakhalyaya awanani aya yupuwelani? owerya wihu khuwatepa wunnuwa nawinvakatsa bawananihu entji? ³¹ Nihiku nenno atthu a Israyeli yahuwinvakatsa aFilisti ewomolaka okhuma oMikimasi mpakha wAiyaloni: vano atthu yahukhulummwa ventji. ³² Tivo, yahuthomola, tjitthu tjiwakhalyaya aFilisti, yahuvarakatsa imompe ipwittipwitthi n'axinyompe, yahinvakatsa, enakhura ehihitale. ³³ Vano Sawuli ahuhimeriya, wira: Atthu annatthekela APWIYA ekhuraka enama ehihitale n'iphome aya. ³⁴ Ni Sawuli khwira: Nyuwo mottheka tthiri, nkipirikixerye nannano nluku nulupale. Numala Sawuli khwira: Nrwee mwahimerye atthu otene wira, khula ntthu awane va emompe awe, n'ipwittipwitthi awe, ahitele vava, akhureke vava; wira ahatthekele APWIYA akhuraka enama ekithi n'iphomene. Ohiyu yowo atthu otene yahuwana inama tjarinaya, khuhitela vavale. ³⁵ Nihuku nenno Sawuli ahupacera watekela altari APWIYA, altari awo yari opacera watekela APWIYA. ³⁶ Ni Sawuli ahira: Ohiy'ula nirwee natuphele aFilisti, mpakha malo vatsitsu, wira ahihale nkumi nnakhala mmotja. Atthu yahakhula wira: Mwireke tjinonelinnyu orera. Vano nlipa a nkuttho khwira: Ninkohe Muluku vava toko. ³⁷ Sawuli ahunkoha Muluku wira: Kirwee katuphele aFilisti? mwinrwaa wavaha mmatatani mw'atthu a Israyeli? Nto nihuku nno APWIYA khiyakhulale etthu ³⁸ Tivo Sawuli khwira: Nyuwo otene makhulupale atthu nthukhumane vava; nonexexe yottheka yireiye olelo; ³⁹ Kinnilapha ni ntjina n'APWIYA, mopoli a Israyeli, wira ari mwanaka Yonathani, tthiri onamokhwa. Ni khuvo ntthu amwakhulale etthu. ⁴⁰ Vano Sawuli ahahimerya atthu otene a Israyeli wira: Nyuwo nkhale mphanntt'inyu, miyo ni mwanaka Yonathani nikhale mphantti nkina. Atthu yahun'himerya Sawuli wira: Mwireke tjinonelinnyu orera. ⁴¹ Vano Sawuli ahahimerya APWIYA Muluku a Israyeli wira: Mwinoniherye ekhweli. Nlattu wammorelale Sawuli ni Yonathani, atthu khiyarina nlattu. ⁴² Sawuli khwira: Mwinavererye nlattu miyo ni mwanaka Yonathani. Ni nlattu wammorelale Yonathani. ⁴³ Sawuli ahun'himerya Yonathani wira: Nkihimerye etthu epankalinyu. Yonathani ahun'himerya tjotene, iraka: Ayo kiholya oravo vakhani, wanranthalyaka ni ttotto aka: Vano miyo va kolikanana okhwa? ⁴⁴ Sawuli khwira: Vano Muluku akipwetexe miyo, mwahikhweru nyuwo, Yonathani. ⁴⁵ Nto atthu yahun'himerya Sawuli wira: Vano, ontthuna, winveliya-ni Yonathani, yowo olelo va oniwanelale oxintta nno ulupale wa Israyeli? Vahiraneye tjitjammo. Mwaha w'APWIYA, Yonathani ahirihiye etthu yotakhala nnakhala vakhani, Muluku tanvahale olelo ekuru tjowira tjiralyawe. Tjitjammo atthu yahumopola Yonathani warwaawe winviya. ⁴⁶ Vano Sawuli ahunyonywela owomola aFilisti; ale yahalale yahuwerya ophiya nlaponi mwaya. ⁴⁷ Sawuli vakhalihiyawe mwene a Israyeli, ahuwana ekhottho n'awanani awe otene yanrukureryale: atthu oMowabi, atthu Amoni, atthu a wEdomi, mamwene oSaba, n'aFilisti: mapuro otene awanalyawe ahawerya awanani awe. ⁴⁸ Oxintta wawe wulupalexa, ti waxintta atthu Amaleki, awopolaka atthu a Israyeli mmatatani w'alavilavi. ⁴⁹ Ana a Sawuli yari Yonathani, ni Yixuwi, ni Maliki-Xuwa. Ni matjina asanawe-tho axithiyana eli yari, mulupale ntjina nawe, Merabi, ni nkina mukhani ntjina nawe Mikali. ⁵⁰ Ni ntjina nawe mwarawe Sawuli ihaniya Ahinowami, mwana Ahimaasi. Mulupale anakhotto awe anihaniya Abineri, mwana a Neri tat'awe Sawuli. ⁵¹ Kixi ari tithi awe Sawuli, Neri ari tithi awe Abineri,Kixi ni Neri yari ana ABiyeli. ⁵² Ni ekhotto n'aFilisti khiyarere orika okathi wotene wa Sawuli; ni okathi wotene Sawuli wamphwanyawe alopwana okhomala ni otupa, mwakusa enakhala awawe.