¹ Samuweli ahun'himerya Sawuli wira: APWIYA akiruma wottikhani omwene w'atthu aya a Israyeli: tivo nwiriyane vano mulumo APWIYA. ² Tjinihimyaya APWIYA owerya tjotene tin'ya: Kinamwakumiherya nlattu atthu Amaleki mwaha wa tjotakhala tjiwirelalyaya atthu a Israyeli; yatuphelaka okathi wakhumaya wEjitu. ³ Vano nto nrwee, mwapwetexe nloko n'Amaleki, mwahonone tjotene tjirinaya n'hihiye etthu: n'hamorele ekhiriri: nwinvakatse otene alopwana n'athiyana, amiravo n'asana akhani, imompe n'ipwittipwitthi, ikamela n'aburu. ⁴ Sawuli ahathukumanya anakhotto awe, khwawehawehaq oTalayimi, yari alopwana ikonto miloko miloko minli, wamotja n'anakhotto ikonto muloko a nihimo na ayuda. ⁵ Ahuvenya vale wamotja n'atthu awe arwaaka nttetthe w'Amaleki, khwimpitha nkhatoni wa muro mmotja. ⁶ Vano Sawuli ahahimerya atthu a kayini wira: Nvenye vo, ntthyawe, nvalane n'Amaleki, wira kihiwinvakatseni wamotja n'awo: Vano nyuwo nwirelale tjorera atthu a Israyeli, okathi wakhumaya wEjitu. Atthu a Kayini yahikhuma nlaponi mw'Amaleki. ⁷ Vano Sawuli ahawerya atthu Amaleki, okhuma oHavila mpakha ophiya okherekhere w'oXuri, wattamelale wEjitu. ⁸ Ahunvara nkumi ene Agagi mwene Amaleki, khuwinvakatsa atthu otene. ⁹ Vano Sawuli nnakhala khamwinvale Agagi, nnakhala khinvale inama tjorerexa, imompe n'ipwittipwitthi tjoneneva, ahuhiya tjotene tjarerale: mihuwo tjorerexa khinvale: invale pahi mihuwo tjikhanixa ni tjohiloka. ¹⁰ APWIYA yahilavula ni Samuweli en'himeryaka wira: ¹¹ Kottharuwa vankhalihalyaka mwene Sawuli, okala wira owo okinyanyala, khamaliheryale tjoruma tjaka. Samuweli ahiripiya nrima ventji, khuviriha ohiyu wotene akhuwelelaka w'APWIYA. ¹² Vaxakaru Samuweli ahuvenya arwaaka okumana ni Sawuli; vano atthu yahun'himerya Samuweli, wira: Sawuli orwaale okarmeli, atekale wonwo ethonyeryo yo wivuwiha wawe, numala ahuvenya vale, arwaaka oGilikali. ¹³ Vano, Samuweli, ahurwaa okumana ni Sawuli vano Sawuli ahun'himerya Samuweli wira: APWIYA yureriheni; komaliherya tjoruma tj'APWIYA. ¹⁴ Samuweli ahunkoha iraka: Vano exeni wunla ono n'ukhuwela ono wa ipwittipwitthi ni wa imompe oninwaka okinyakulaka? ¹⁵ Sawuli ahakhula: Mihuwo tjiwakhalihu atthu Amalekhi; atthu a Israyeli yahikusa inama n'ye tjoneneva, wira yahelele nkuttho APWIYA Muluku aya; tjikina tjotene tjahinvakatsiya. ¹⁶ Samuweli ahun'himerya Sawuli wira: Nkihiye kuhimeryani tjikihimeralyaya APWIYA ohiy'ula. Sawuli ahakhula: Nkihimerye. ¹⁷ Samuweli khwira: Ohiya oyeva winyu nyuwo mokhalihiya mwene atthu a Israyeli, APWIYA khiyuttikitthelani wira nwettiheke atthu awo? ¹⁸ Vano APWIYA yahurumani wira mwataphule awananinyu, yuhimeryakani wira: Nrwee, mwawinvakatse anatampi ale atthu Aalekhi, mwalupatthe mpakha wapwetexa otene. ¹⁹ Nto, nyuwo, exeni n'himaliheryaka tjoruma tj'APWIYA, nkuseraleni inama tjaya tjorerexa mwirelaleni tjotakhala vamethoni v'APWIYA? ²⁰ Sawuli ahumwakhula wira: Miyo komaliherya tjoruma tj'APWIYA, kahuvenya orwaa wakirumalyaya APWIYA, konvara Agagi mwene atthu Amaleki, kowinvakatsa atthu otene Amaleki: ²¹ Nto atthu aka t'athanlale mihuwo tjorerexa imompe n'ipwittipwitthi, tjen'yo tjarinaya winva, awo yahikusa inama n'yo wira yahelele nkuttho APWIYA Muluku'ninyu oGiligali. ²² Samuweli khwira: Enatjivelihin'nyu APWIYA exeni, mikuttho ni tjovaha wala winwelela? Vekhweli owinwelela APWIYA ti worera ovikana mikuttho; winwanana n'APWIYA ti wulupale ovikana inama tjoneneva: ²³ Vano wakhotta APWIYA onalikana n'okhwiri, okhalela nthiti onalikana ni warumela amuluku ethiru. Okhala wira nyuwo mothanya tjoruma tj'APWIYA, APWIYA yawo ahuthanyani nyuwo tjitjammo khamunkhala-tho mwene. ²⁴ Sawuli ahun'himerya Samuweli wira: Miyo kottheka; kokhotta tjoruma tj'APWIYA ni mulumo'innyu, miyo kanawova atthu, tivo kotthara tjahimyaya. Vano, nkilevelele, tjottheka tjaka, ²⁵ Ni n'hokolowe ni miyo nakokhorele APWIYA. ²⁶ Samuweli ahumwakhula Sawuli wira: Nkinwerya ohokolela ni nyuwo; okhala wira mokhotta tjoruma tj'APWIYA, ni APWIYA yawo ahukhottani nyuwo khamwinkhala-tho mwene a Israyeli. ²⁷ Samuweli ahurukunuwa wira arweeke, vano Sawuli ahunvarela nlaya nawe, nlaya nno nahukhereya. ²⁸ Samuweli ahun'himerya wira: APWIYA olelo akheratja omwen'innyu w'atthu a Israyeli anvaha nkina oloka ovikana nyuwo. ²⁹ Muluku oweryexa a Israyeli, khanotha wala khanttharuwa: okala wra awo khahi ntthu wira attharuweke. ³⁰ Sawuli ahun'himerya wira: Miyo kottheka tthiri: nto vano xontte nkittittimihe nanlelo vamethoni va makhulupale atthu aka, ni atthu a Israyeli; ni nrwee n miyonakokhorele APWIYA Muluku'inyu. ³¹ Samuweli ahuhokolela otthuli wa Sawuli, ni Sawuli ahakokhorela APWIYA. ³² Numala Sawuli khwira: Nkiwanela va Agagi mwene Amaleki. Ni Agagi ahuwa nrima onttelalene upuwelaka wira: Vekhweli otjikulela wokhwa womala. ³³ Ni Samuweli khwira: Ntoko ekatan'inyu yawinvalyaya asana akhani ewakhaka aximayeya, tjitjammo amayanyu anamwakhiya mwanaya. Tjitjammo Samuweli ahumwinva Agagi vamethoni v'APWIYA oGiligali. ³⁴ Samuweli ahuhokolela oRama, vano Sawuli ahuhokolela owannyawe oGibeya. ³⁵ Samuweli khonanatsale ni Sawuli mpakha okwa wawe: ni Samuweli anuntjikulela Sawuli: okhala wira APWIYA yahumwakha omwene Sawuli w'atthu a Israyeli.