¹ APWIYA yahun'himerya Samuweli wira: Mpakha lini mmunlelaka Sawuli, miyo nkinkhottale wira ahikhale-tho mwene a Israyeli? Ntsalihe makhura mwinnyakani mwinyu, ni nvenye, nrwee wa Yese oBethelehemu: Konthanla mwanamwane mmotja wira kinkhalihe mwene. ² Samuweli ahakoha APWIYA iraka: Kirwee tjayi? Sawuli atjuwelakaru, onakinva. APWIYA yahumwakhula wira: Mwinkuseke mwanyompe othiyana, mwahimye wira: Kiwale wira kahelele nkuttho APWIYA. ³ Vanrw'inyu ohela nkuttho, mwinlattule Yese, miyo kinamuhimeryani tjintthuninyu wira; mwinrwaa onttikitthela owo onrwaaka wuthonyeryani. ⁴ Samuweli ahira tjitjammo tjahimalyaya APWIYA: Waphiyalyawe oBethelehemu, makhulupale a mwinttettheni yahitikinihiya ni wova khurwaa okumana enkohaka: Nwelale salama? ⁵ Owo ahakhula wira: Ayo, kiwale wahelela nkuttho APWIYA; mwireriheke, nithukumaneleke nkuttho owo. Tjitjammo ahunreriha Yese n'asanawe, khwalattulela nkuttho owo. ⁶ Vathukumanalyaya, Samuweli ahunweha Eliyabi, khwira: Vekhweli ti yola othanliye n'APWIYA. Vano ⁷ APWIYA yahun'himerya Samuweli wira: n'hinwehe orera witho, nnakhala oraakama wawe, miyo nkinthanlale ola; okhala wira APWIYA khantjala tjitthu tjinonaya atthu; atthu aniweha erutthu, nto APWIYA aniweha nrima. ⁸ Vano Yese ahumwihana Abinadabi, khumoniherya Samuweli, vano Samuweli khwira: Nnakhala ola khathanliye n'APWIYA. ⁹ Yese ahumwihana Xamma Khumoniherya Samuweli. Vano Samuweli khwira: Nnakhala vakhani ola khathanliye n'APWIYA. ¹⁰ Vano Yese ahunwanela Samuweli asanawe otene athanu neli; nto Samuweli ahun'himerya Yese wira: APWIYA khanthanlale mmotja asan'innyu ala. ¹¹ Samuweli ahunkoha Yese iraka: Amalela asan'innyu otene? Ni owo ahumwakhula wira: ohala okhitserya onlyiha ipuri. Samuweli ahun'himerya wira: Mwinrume ntthu anrweele, hiyo khaninlya owo ahiwale. ¹² Vano, Yese ahiruma, wihaniya, mwan'awe; Davidi ari owela, orera owitho ni metho awe. Vano APWIYA yahun'himerya Samuweli wira: Nvenye mwinttikittheleke, ti yowo. ¹³ Samuweli ahikusa makhura ale yari mwinnyakani, khunttikitthela Davidi oniyaka n'amutji awe: Okhuma nihuku nenno eroho y'APWIYA yahukhala ni Davidi. Vano Samuweli ahuvenya vale khuhokolela oRama. ¹⁴ Eroho y'APWIYA yahun'hiya Sawuli, vano eroho ekina yotakhala yarumiye n'APWIYA yahupacera on'haxa. ¹⁵ Arumeyi awe Sawuli yahun'himerya wira: Mwinnona wira, eroho yotakhala erumiye ni Muluku ennuhaxani. ¹⁶ Nnirume pahi, vano, hiyo nolikanana, wophavelelani ntthu ontjuwela omopa xittattha; vaniwaya eroho eyo yotakhala erumiye ni Muluku, owo onamopaka ni matat'awe, tjitjammo nyuwo nnakhurunuwaka nrima. ¹⁷ Sawuli ahuwakhula arumeyi awe wira: Ayo mwakiphaveleleke onimopa orattene, nkiwanele. ¹⁸ Mmotja a'rumeyi awe ahun'himerya, wira: Kinnintjuwela mwana mmotja a Yese oBethelehemu, ontjuwela omopa orattene, ti mmiravo a ekuru, nakhottho oratta, ntthu a miruku, ni torera owitho, APWIYA ari ni yowo. ¹⁹ Sawuli aharuma anamitthaka orwaa wa Yese, on'himerya wira: Nkivelelihe mwaninyu Davidi, yole onlyiha inama. ²⁰ Yese ahinkusa buru ahunreya iphau, n'ikanatta yotjareya evinyu ahinkusa-tho mwapuri, khumwinnya Davidi mwanawe wira amvahe Sawuli. ²¹ Davidi ahuphiya owannyawe Sawuli, khupacera onrumela: Sawuli ahitjiveliya ventji n'uwo, khunkhaliha nrumeyi awe ettanawe. ²² Sawuli ahunveleliha Yese mitthaka n'ya: Miyo kinnulapelani wira nkihiyerye Davidi ola akirumeleke; okhala wira okitjivela ventji. ²³ Ni okathi eroho yotakhala yarumiye ni Muluku yan'haxaya Sawuli, Davidi aninkusa xittattha khuyamopa ni matat'awe; vano Sawuli nrima waninkhurunuwa, khiyakhala orattene, okhala wira eroho ele yotakhala yaninkhuma.