¹ AFilisti yahathukumanya anakhotto aya wira arwee okhottoni, ni yahithukumana oSoko, nlaponi mwa Yuda, khumaka eriyari ya nttetthe owo w'oSoko ni w'zeka, nipuro wihaniya w'Efesi-Damimi. ² Nave Sawuli ahathukumanya atthu awe a Israyeli khumaka omuro Terebinto, wonwo wathatanalyaya wira ewaneke n'aFilisti. ³ AFilisti awo yamakale watjulu wa mwako ephantti ekina, vano atthu a Israyeli yamakale wa mwako ephantti ekina, nkano wari muro Terebinto: ⁴ OMaxaxani w'aFilisti ahikhuma nakhotto otupa amakale wariyari wa mittetthe n'ya minli, ntjina nawe ihaniya Goliyathi, elapo awe oGathi, erakamelo awe yari ya miyono mithanu na motja ni nusu. ⁵ Aniwara mmuruni ekapaseti ya yuma, ni mwerutthuni mwawe ehempe ya yuma: olemela waya wari wa ikilo mithanu tja eyuma: ⁶ Arina imeya tja yuma, akusalene nivaka norakama na yuma mmakhatani mwawe. ⁷ Mwiri wa nivaka nawe wanalikana nnipotto, ni olemela wa yuma na nivaka nawe wari wa ikilo tthanu namotja: oholo wawe anetta mmiravo akusalene iyuma tja ekhotto. ⁸ Vano owo ahemela awehawehaka anakhotto a Israyeli, anyakulihaka iraka: Nnirani vo ethataneliyene owana ekhotto? Nkihiyo miyo nFilisti, ni nyuwo arumeyi a Sawuli? Mwinthanleke nlopwana awinyu ontthuna owana ni miyo: ⁹ Owo awana ni miyo, ni khukiwerya, hiyo ninukhala ipottha tjinyu: nto owo ahikiwerye, kamwinva, nyuwo munukhala ipottha tjihu munanrumelaka. ¹⁰ Ni nFilisti ule ahihimya-tho: Miyo va olelo kihapatja anakhotto a Israyeli; nkithanlele nlopwana a ekuru kiwananeke. ¹¹ Sawuli n'atthu awe inwakaru maruwano ala a nFilisti ole, ahivalavela, ni wova wulupale. ¹² Davidi ari mwana a nlopwana mmotja a nloko na Efrata akhala oBethelehemu nlaponi mwa Yuda, nlopwano owo ihaniya Yese, yowo arina asan'awe athanu nararu; mahuku a Sawuli Yese owo ari ottittimiheya, ari owuluvala, tari mulupale wavikana alopwana akina. ¹³ Asanawe alupale araru yahuntthara Sawuli okhottoni. Ni asan'awo yanttharale okhottoni, matjin'aya tala,

opacera Eliyabi, nkina Abinadabi, ni okhittjerya Xamma.

¹⁴ Davidi ira anari mmiravo. Vano, okathi ala araru warwalyaya okhottoni, ni Sawuli. ¹⁵ Mahuku makuna Davidi uwo anuntthara Sawuli, mahuku makina anihokolela oBethelehemu wira alyiheke inama tj'atithi awe. ¹⁶ Vano, nFilisti ule, anikhuma vatsitsu ni makaripi mpakha mahuku miloko mitjese apatjaka atthu a Israyeli. ¹⁷ Yese ahun'himerya mwanawe Davidi wira: Haya nkuse etirigu ela yowarikiya, n'iphau n'ya muloko, ntthamakele omaxaxani mwavahe axunninyu. ¹⁸ Nave-tho ikejo n'ya muloko mwanvahe mulupale anakhotto, mwakohe axunninyu ihali tjaya, nkiwanele etthu pitthu entthuna okitjuweliha wira akumi. ¹⁹ Sawuli ari ni yawo wamotja n'atthu otene a Israyeli, emakalene muro Terebnto, ewanaka n'aFilisti. ²⁰ Vano, Davidi ahuvenya vatsitsu, ahun'hiyerya inama makamputsi nkina, ahikusa nritti awe, khurwaa tjitjammo tjarummyawe tithi awe; waphiyalyawe omaxaxani w'anakhotto, anakhotto yira ethatanaka okhottoni, yipaka itjipo tja ekhotto. ²¹ Atthu a Israyeli n'aFilisti yahuthatana wira ewane ekhotto, evirikanyanaka. ²² Davidi ahirula nritti awe ahumwinnyererya nlipa olipelela, numala ahatthamakela axunnawe yathatanale n'anakhotto; ni ahuphiya waryeaya, kwakoha ihali tjaya. ²³ Okathi wahimeryanaya isalamu, nakhotto ole otupexa ntjina nawe Goloyathi, elapo y'oGathi ahikhuma mw'aFilisti, khupacera-tho waruwana atthu a Israyeli, Davidi amwinwaka. ²⁴ Anakhotto a Israyeli yonaka otupa wa ntthu ole, yahumova ventji, khutthyawa. ²⁵ Atthu a Israyeli yanihimya yaworu wira: Momona ntthu ole onniwela? Owo onwa wapatja atthu a Israyeli. Akala ntthu ontthuna omwinva, mwene onanvaha mihakhu tjintji, onuntheliha mwanawe, onuttikittha mposito etthoko awe ya Israyeli. ²⁶ Davidi ahakoha ale yamwattamelale wira: Ontthuna wireliya exeni ntthu ontthuna omwinva nFilisti ula, numaliha wuliya muru wa Israyeli? Ti pani nFilisti ule ohinnuwihiya, ohinova wapatja anakhotto a Muluku nkumi? ²⁷ Atthu yahumwakhula enamuna emotjaru, yiraka: Khatjithowale tjinrwaawe ovahiya ntthu ontthuna omwinva owo. ²⁸ Eliyabi mulipale awe Davidi ahumwinwa n'himawe avanelaka n'anakhotto ale, Eliyabi khunviruwela Davidi, an'himeryaka wira: Nwelaleni nyuwo? Mwin'hiyerale pani inama tjinyu mmathalani? Miyo kinnitjuwela wintstona winyu nutakhala wa nrim'innyu, nyuwo nwelale wona ekhotto. ²⁹ Davidi ahumwakhula wira: Nto kira-leni? Kinkhottihiya okoha? ³⁰ Davidi ahun'hiya mulupale awe khumaphwnya nakhotto nkina, khunkoha-tho etthu yeyo. ³¹ Yinwalyaya okohakoha wa Davidi, atthu akina yahun'himerya Sawuli, Sawuli uwo ahiruma orweeliya. ³² Davidi uwo ahn'himerya Sawuli wira: Ahikhale onopopihiya ni nFilisti uwo; mmiro vo'inyu ola onrwaa owanana. ³³ Vano Sawuli ahun'himerya Davidi wira: Nyuwo n'hiwanane nFilist'uwo, nyuwo nnamotjela owo; okhala wira mwa mmiravo, vano owo nakhotto otupa owanale okhuma onamwane awe. ³⁴ Davoidi ahumwakhula Sawuli wira: Nrumey'inyu ola anilipelela inama tj'atithi awe, okathi wakhumelelawe kharamu, wala havara, anavara epwittipwitthi ya munikotoni mwaka, ³⁵ Miyo kanimonola, mpakha onvara, khiyammana khiyamwakha epwittipwitth'iyo mwano mwawe: Vano kharam'uwo akituphelaka, miyo kaninvara mpitthi awe, khiyammana, mpakha omwinva. ³⁶ Vano nrumey'inyu, ola amwinvale kharamu, ni havara; nFilist'ule ohineliya onalikana n'inama n'ye, okhala wira oharuwana anakhotto a Muluku nkumi. ³⁷ Vano Davidi ahora: APWIYA akopolale mmakwarikhwani mw'akharamu ni mwa havara, tin'yawo anrwaa okopola mmatatani mwa nFilist'uwo. Vano Sawuli ahun'himerya Davidi wira: Nrwee pahi APWIYA ekhale ni nyuwo. ³⁸ Sawuli ahunwariha Davidi tjowara tjawe tj'ekhotto, ahunwariha mmuruni ekapaseti ya yuma, ni mwerutthuni mwawe ehempe ya yuma. ³⁹ Ni ahun'hererya davidi ekatan'awe n'yununi watjulu wa ehempe ya yuma, awaralene tjitjammo ahuphavela wetta khuhiwerya, mwaha wa tjitthu n'ye tjahatonkwawe owara. Ni khurula tjitthu n'ye tjotene, ⁴⁰ Vano ahikusa ekopo awe mmatatani mwawe, ahuthanla omuro maluku mathanu ovilikeya, ahela mwintjakoni mwa makamputji aitthukwelanawe, ahunvara pharantjikul'awe khurwaa owana ni nFilist'uwo. ⁴¹ Goliyathi uwo ahuvenya khumwattama Davidi, nrumeyi awe akusa iyuma tjitjakihanawe anun'hola. ⁴² Goliyathi ahunwehaweha Davidi, vamonalyawe okhala mwammiravo, owela, ni orera owitho; ahunthanya. ⁴³ Vano nFilit'uwo ahun'himerya Davidi: Weyo okiwelaka owale n'ikopo ntoko miyo ki mwalapwa? NFilist'uwo ahunlaphela-tho Davidi tjotakhala wa ekuru tj'amuluku awe. ⁴⁴ NFilist'uwo ahun'himerya Davidi: Owe ono, kinuttikhela murutthu awo wira okuriye ni axinuni a ntjulu, n'inama tja ntakhwani. ⁴⁵ Vano Davidi ahumwakhula nFilist'uwo wira: Nyuwo mwinnikiwela ni ekuru tja ekatan'inyu ni nivaka ninyu tjamphulo'inyu; nto miyo kinuwelani ni ekuru tja ntjina n'APWIYA yawo anwerya tjotene, ni akhalale Muluku anakhotto a Israyeli, yawo yaruwanal'inyu. ⁴⁶ Olelo vava APWIYA anukivaha mmatatani mwaka, miyo kinamuphwatani, kinamuthikilani exiko: olelo vava kinuttikhela mirutthu tj'anakhotto aFilisti wira tjikhuriye n'axinuni a ntjuli n'inama tja ntakhwani: tjitjamo atthu elapo anutjuwela wira okhala Muluku w'Israyeli. ⁴⁷ Vano atthu ala otene ari vava anutjuwela wira APWIYA khamphavela ikatana wala mavaka wira ewopole atthu aya; tthiri APWIYA ti mwanene ekhotto, yawo anunivaha nyuwo otene mmatatani mwihu. ⁴⁸ NFilist'ule ahetta arwaaka oholo, amwattamaka Davidi, vano Davidi uwo ahutthamakela nipuro norerela, onttikhela nFilist'ule. ⁴⁹ Ahikukurya ni wakuva mwintjakoni mwawe, ahikumiha nluku nimotja, ahittikha ni pharantjikul'awe, khunthaka nFilist'ule vayutji: nluku nno nahun'homa vayutji , ni khumorela vathi ni owitho. ⁵⁰ Tjitjammo Davidi ahunwerya nFilist'ule ni pharantjikula ni nluku nimotja; ahimphwata ntth'ule hineliya khumwinva, hata ahikhalanale ekatana mmatatani mwawe. ⁵¹ Vano ahuntthamakela ahemela watjulu wawe, ahutholola ekatana ya Goliyathi ule n'yununi mwawe, khumwinva, anthikilaka muru. AFilisti otene vamonalyaya nakhotto aya akhwaka yowo yanroromelaya yahutthyawatsa. ⁵² Anakhotto a Israyeli ni a Yuda, yahatuphela aFilisti ekhuwelaka, ewomolaka mpakha oGathi, ni mpakha mikhora tja wEkironi. Mirutthu tj'aFilisti tjahataleleya mphironi okhuma oXarayimi, mpakha oGathi ni wEkironi. ⁵³ Vamalalyaya owomola wanani aya, atthu a Israyeli yahuhokolela okusa tjitthu tjotene yahiyalyaya aFilisti awo nipuro namakalyaya. ⁵⁴ Davidi ahikusa muru wa Goliyathi, khurwana oYerusalemu, vano ahitjuka mumpani mwawe mavaka yamwakhalyawe. ⁵⁵ Sawuli vamonalyawe Davidi antuphelaka nFilisti ule, ahunkoha Abineri nkhulupale anakhotto awe wira: Abineri nyu, mwammirav'ole mwana a wani? Abineri ahumwakhula wira: ⁵⁶ Pwiyaka, nkintjuwela khuluwi, nnep'inny'uwo okhale orattene. Ni mwene khwira: Vano, mwakohakohe, mwana a pani mwammirav'ole. ⁵⁷ Davidi wahokolowawe wamwinvalyawe nFilisti, Abineri ahunrweela khunrwaana waryawe Sawuli, Davidi akusalene mmatatani mwawe muru wa nFilisti ule. ⁵⁸ Sawuli ahunkoha wira: Mmiravo, mwa mwana a pani? Davidi ahakhula: Miyo ki mwana a nrumey'inyu Yese oBethelehemu.