¹ Davidi vamalalyawe olavula ni Sawuli, Yonathani ahutjiveliya ventji ni Davidi, khupacera onfenta ntoko aifentawe mmantjawe. ² Nihuku nenno Sawuli khanlevale Davidi, khan'hiyale ohokolela watithi awe. ³ Vano Yonathani ahupatthana ni Davidi, tthiri annunfenta ntoko tjaifentawe. ⁴ Ahirula nlaya nawe awarawe, khunwariha Davidi, ahunvaha-tho tjowara tjawe tjawarawe tj'ekhotto, n'ikatanawe, ni mur'awe ni ntsako awe w'ekhotto ⁵ Davidi anireriya ekhotto yotene yanrumawe Sawuli, tivo Sawuli ahunkhaliha mulupale anakhotto awe.Atthu otene, yantjiveliya ni yowo, makhulupale a mwene, yantjiveliya-tho ni yowo. ⁶ Okathi Davidi wahokolowawe vamwinvalyawe Goliyathi, anakhottho otene ehokolowaka elapo aya, athiyana yahikhuma mwinttettheni motene mwa Israyeli yipaka, ni yinaka, yopaka ekoma tjaya, atteliyene nrima ventji yopaka ilulu, arwaaka omwakhelela Sawuli. ⁷ Ekoma yahukelela winiya n'athiyana awo, yiraka: Ekonto emotja t'awinvalyawe Sawuli, ikonto muloko t'awinvalyawe Davidi. ⁸ Swuli ahuviruwa ventji, mulumo awo khiyantjivelale vamethoni vawe, ni khwira: Anvahale Davidi ikonto muloko, miyo kovahiya ekonto emotja pahi; onin'halela omwene. ⁹ Okhuma nihuku nne Sawuli anunkhalela nrima Davidi. ¹⁰ Mmeloni mwaya eroho yotakhala erumiye n'APWIYA yahunvara Sawuli, avahuwale ntoko mulohi vapuwani vawe: Davidi animopa xittattha ntoko tjirawe mahuku mentji; vano Sawuli ira avaralene nivaka nawe. ¹¹ Nannanoru ahutexa nivaka nno khuttikha anluluwanyaka Davidi, iraka: Kinkhomeleke vaxirini. Ahuvonya-tho vonapinli nto Davidi ahurapela imara tjopinli. ¹² Sawuli ahukelela omova Davidi onaka wira APWIYA ari ni yowo, en'hiyaka Sawuli. ¹³ Tivo, ahunthamiha Davidi, ankhalihaka mulupale, anakhotto ekonto emotja; vano Davidi anuwettiherya anakhotto awe okhottoni. ¹⁴ Owo anireriya okhottoni wotene, okhala wira APWIYA yari ni yowo. ¹⁵ Sawuli onaka wira Davidi anitepa oreriya, anatepa omova. ¹⁶ Vano atthu otene a Israyeli n'aYuda yaninfenta Davidi, okhala wira ti yowo aholelaatthu yawo okhattoni. ¹⁷ Sawuli ahun'himerya Davidi wira: Ola va mwanaka mulupale Merabi kinamuthelihani: mwakirumelakaru ni wilipiha, n'uroromeleya mwawanakaru ikhotto tj'APWIYA. Nto Sawuli anupuwela wira: Nkimphavela omwinva yomi ene, nto aFilisti t'anrwaa omwinva. ¹⁸ Vano Davidi ahumwakhula Sawuli wira: Miyo ki pani, wala atthu a etthoko y'atithi t'apani wIsrayeli, wira kiphwanele okhala ntthepa etthoko ela ya mwene? ¹⁹ Nto waphiyalyaya okathi watthunawe ontthela Merabi, mwanawe Sawuli, yowo avahiyawe Davidi, Merabi uwo ahuthelihiya Adriyeli oMehola khukala mwarawe. ²⁰ Vano Mikali mwana nkina a Sawuli ahutjiveliya ni Davidi; Sawuli watjuwelalyawe, ahutteliya nrima. ²¹ Vano Sawuli khwira: Miyo kinuntheliha, wira kimotothe, owo onamwinviya n'aFilisti. Tjitjammo, Sawuli ahun'himerya Davidi emara yonapinli wira: Olelo mwinrwaa okhala ntthep'aka. ²² Vano aharuma arumeyi awe wira: Mwin'himerye Davidi ni mwitiho, wira: Mwene n'atthu awe otene annitjiveliya ni nyuwo; mwinthele mwqana a mwene. ²³ Arumeyi awe Sawuli yahun'himerya Davidi. Ni Davidi owo ahuwakhula wira: Nnupuwela wira etthu yokhweya okhala ntthepa a mwene, miyano ki mashikhini kihinoneliya vatthu? ²⁴ Ni arumeyi a Sawui yahumwakhula ehimyaka: Mulumo ahimeralyawe Davidi. ²⁵ Ni Sawuli ahahimerya wira: Mwan'himerye Davidi wira: Mwene khamphavela ovahiya ntjurukhu mwaha w'onthela mwanawe, omphavela nwinve anakhotto aFilisti miloko muloko pahi, nwunlelaka ekuhu anakhotto a mwene. Nto mwene aniroromela wira Davidi arwaa winviya n'aFilisti. ²⁶ Ni arumeyi a Sawuli yahun'himerya Davidi mulumo ala a mwene, Davidi ahona orera mwaha ola, w'okhala ntthepa a mwene. Ni ohinatthi ophiya okathi wothelana, ²⁷ Davidi ahuvenya n'anakhotto awe, arwaaka watuphela aFilisti, khuwinva awanani awe miloko miloko minli; Davidi ahithikila minupi tjaya, khurwana wa mwene khwalakelela oholo wawe, wira akhale ntthepa a mwene. Ni Sawuli ahintheliha Davidi mwanawe owo Mikali wira akhale mwarawe. ²⁸ Vano Sawuli, ahitjuwela orattene wira APWIYA yari ni Davidi, ni wira Mikali mwanawe aninfenta Davidi, ²⁹ Tivo anatepa omova Davidi; ni Sawuli ari nwananai awe Davidi mahuku otene. ³⁰ Okathi wotene aFilisti: wakhumelaya watuphela atthu a Israyeli Davidi anawerya, areriyaka wavikana makhulupale otene a Sawuli: ni ntjina nawe nahivuwa.