¹ Sawuli ahun'himerya Yonathani mwane, ni arumeyi awe otene, wira aniphavela omwinva Davidi, nto Yonathani mwanawe Sawuli aninfenta Davidi ventji. ² Ni ahunlopola Davidi, iraka: Atithi a Sawuliamphavela owinvani; tivo mwikatjopeke okhuma va mpakha nihuku na melo, mwipithe nipuro nororomeleya, mwakhale vavo: ³ Ni miyo kinuvenya n'atithi nawo nakhale omathalani onrwaanyu wipitha: ni kinimwahimerya tjawinyu atithi, kitjuwele tjintthokelelaya kohimeryeni ⁴ Yonathani ahiwupusera atithi awe miteko tjorera tja Davidi, ni khun'himerya: Nyuwo pwiya n'hittheke mwaha wa nrumeyinyu Davidi, vano owo khutthekelaleni: ohiya vo miteko tjawe tjorera tjolipiha omwen'inyu; ⁵ Owo ahuleva ekumi awe okathi wamwinvgalyawe nFilisti ole, ni APWIYA ahavaha owerya wulupale atthu otene a Israyeli. Nyuwo mmantjinyu n'hona tjotene, khutteliya nrima: vano, exeni, mwintthuninyu ottheka mmwarexaka ephomw ya ntthu ohitthekale, mmwivaka Davidi ohirina nlattu? ⁶ Sawuli ahuwiriyana mulumo a Yonathani, khulapha wira: Wa ntjina n'APWIYA, nkinimwiviha Davidi. ⁷ Yonathani ahumwihana Davidi, khun'himerya mulumo ala otene; ni khunrwaana Davidi wa Sawuli, ni Davidi ahuhokolela onrumela Sawuli ntoko tjirawe khalayi. ⁸ Ekhotto yahuhokoleliya:ni ahuvenya Davidi arwaka owana n'aFilisti, ahawerya khwamarexa, ni otene aya yahutthyawatsa. ⁹ Ni eroho yotakhala yatumiye n'APWIYA yahunvara Sawuli: owo anuwokoma mpani akusalene nivaka mmatatani, Davidi ira amopaka xittattha awe. ¹⁰ Ni Sawuli ahiphavela onkhomela Davidi vaxirini nnivaka; nto Davidi ahurapela antthyawaka Sawuli, nivaka na Sawuli khuhomaka exiri; ni Davidi ahutthyawa khopowa ohiyu yole. ¹¹ Sawuli ohiyu yole aharuma atthu orwaa owannyawe Davidi wira yanvare, emwinve mmeloni mwaya. Nto Mikali mwarawe Davidi ahun'himera wira Davidi, wira: Mwahitthyawe ohiyu yola malo munamwinviya. ¹² Mikali ahunviriha in'yawe watjanelani; ni owo khurwaa, ni khutthyawa, ni khopowa. ¹³ Mikali ahikusa elatarato, ahatalela volilini, ni ahupweha wamuru eshapala y'epuri, khukhunela ni ekuwo. ¹⁴ Sawuli aharuma atthu awe orwaa onvara Davidi, Mikali ahahimerya: Onaweren'ya. ¹⁵ Sawuli aharuma atthu ene yawo orwaa onthotola Davidi, iraka: Mwanttukhule n'olili awe nkiwanele va wira kimwinve. ¹⁶ Ni vakelalyaya mpani mwa Davidi, atthu awo yahuphwanya elatarato eyo yataleliyene volilini, ni eshapala y'epuri epwehiyene wamuru waya. ¹⁷ Sawuli ahunkoha Mikali iraka: Nkotothelaleni tjitjammo, nyuwo montthyawiha nwanani aka? Mikali ahumwakhula Sawuli wira: Ti yowo okikhanyereryale akihimeryaka wira: Nkihiye kirwee; mwahikihiye, miyo kinawinvani. ¹⁸ Vano, Davidi, opowalyawe atthyawaka, ahurwaa oRama owannyawe Samuweli, khumwalakelela tjotene tjirihiyawe ni Sawuli. Ni ahurwaa Davidi ni Samuweli, khukhalaka oNayothi. ¹⁹ Ni ahukhala ntthu arwaale on'himerya Sawuli, wira: Ntjuwele orattene wira Davidi otthyawela oNayothi w'oRama. ²⁰ Ni Sawuli aharuma atthu awe orwaa onvara Davidi, yahuphwanya muloko wa maporofeta yira elaleyaka, yahunweha-tho Samuweli emelalene wariyari waya, khutikinihiya. Ni eroho ya Muluku yahavara alopwana awo yarumiye ni Sawuli, ni yawo-tho yahupacera olaleya. ²¹ Sawuli ahuhimeriya etthu ela, owo aharuma atthu awe akina, yawo-tho yahupacera olaleya. Ni Sawuli aharuma vonattharu alopwana akina, ni yawo-tho yahupacera olaleya. ²² Nave-tho Sawuli mwanene ahuvenya arwaaka oRama; vaphiyalyawe ehime yulupale yathipiye oSeku, ahakoha atthu wira: Ari vayi Samuweli ni Davidi? Ni ahakhuliya wira: Ari oNayothi w'oRama. ²³ Ni ahurwaa oNayothi w'oRama; nave-tho yahuwa eroho ya Muluku khunvara yowo-tho, Sawuli ahupacera olaleya-tho mphironi mwemmo, mpakha ophiya oNayothi w'oRama. ²⁴ Ni owo waphiyalyawe wonwo-tho owo ahirula ekuwo tjawe khulaleya oholo wa Samuweli, ni ahiwarale etthu tjitjammo ahimorela vathi khukhala tjitjammo othana wotene ni ohiyu ole wotene. Okhuma vavo wahihimiya: Khino Sawuli ori eriyari ya maporofeta?