¹ Samuweli vuluvalalyawe amalavo, ahakhaliha asanawe eli alipa olamula. ² Mwanawe opacera oyariya ihaniya Yoweli, nkina, ihaniya Abiya: oweli aya yahalamula atthu oBerixeba. ³ Nto awo khiyattharale ephiro yorera yavirale atithyaya, yaniphavela othukumanya ntjurukhu pahi, yanakhelela tjitthu tjakatthliyaya, tjitjammo khiyalamulale atthu n'ixariya. ⁴ Makhulupale otene a Israyeli yahithukumana, erwaaka okumana ni Samuweli oRama, ⁵ Khun'himerya wira: Nyuwo n'huluvala, vano asan'inyu khantthara makhalelo'inyu: Tivo nnivahe mwen'ihu wira anettiheryeke, ntoko tjirinaya maloko makina. ⁶ Samuweli khatjiveliye ni mulumo atthu awe wira: Nnivahe mwen'ihu wira anettiheryeke. Ni Samuweli ahalompa APWIYA. ⁷ APWIYA yahumwakhula Samuweli wira: Nwinweleleke atthu nwireleke tjotene tjimphavelaya: tthiri awo khanukhottani nyuwo, nto ankikhotta miyo, khatthuna-tho wira miyo kikhale mwene aya. ⁸ Okhuma nihuku nakhumalyaka w'Ejitu mpakha olelo va, awo apaka tjutthu tjimotjaru yahukinyanyala erwaka wakokhorela amuluku akina, tjitjammo-tho nyuwo anniwirihani-tho tjammo. ⁹ Vano, nyuwo, mwinweleleke mulumo aya: nto n'hihiye walopola toko mwalakiherye tsana enamuna mwene aya onrwaawe owettiherya. ¹⁰ Samuweli ahahimerya mulumo otene A'PWIYA atthu awe yanlapela mwene. ¹¹ Ahimeryaka, wira: Ntjuwelexe enamuna mwen'inyu enrwaawe owettiheryani: Owo onamwakusa asan'inyu axilopwana, wira yettiheke ikaro tjawe, n'ikhavalo tjawe, wira etthyaweke oholo w'ekaro awe: ¹² Akina onamwathanla wira ekhale alupale anakhotto awe ekonto emotja, n'alupale anakhotto awe miloko mithanu: onamwathanla akina wira evareke nteko mmatatani mwawe, n'uhepha tjinruweryawe, n'uhana mavakawe a ekhotto, n'ikaro tjawe: ¹⁴ Mwene owo onamwakusa-tho asan'inyu axithiyana wira epankeke ixero tjawe, yapeyeke yoly'awe, yoxeke iphau tjawe. ¹³ Onokusa imatta tjinyu, ni miri tjinyu tj'evinyu ni makhura, ithanlelaka tjorerexa onuwakhani tjen'yo, onamwakawela arumeyi awe. ¹⁵ Onamokhanyererihani onvaha miyavulo tja ipyo tjinyu ni tja evinyu'inyu, wira avahe arumeyi awe n'ananteko awe. ¹⁶ Onamwakusa arume'yinyu alopwana, n'athiyana, amiravo'inyu otupexa, n'aburu wira yanvareleke ntako. ¹⁷ Onuhavula-tho inama tja mihuwo tjinyu, nyuwo mwa xinene nnukalihiya ipottha tjawe. ¹⁸ Nihuku nenno nyuwo nnukhuwela n'haxiyaka ni mwene onrww'inyu withanlela, nto nihuku nenno APWIYA khanrwaa owakhulani. ¹⁹ Atthu a Israyeli yahukhotta winwelela mulumo a Smuweli; khwira: Nnari, hiyo nnimphavela mwen'ihu pahi: ²⁰ Nintthuna olikanaka ni maloko makina otene, mwen'ihu onrwaa onilamulaka, onanihola okhottoni, ni onawana wamotja ni hiyo. ²¹ Samuweli ahinwa mulumo otene aatthu awe khwahimerya APWIYA. ²² Vano APWIYA yahun'himerya Samuweli wira: Nwireleke tjunulapelayani, mwavahe mwene aya. Nave Samuweli ahahimerya atthu a Israyeli wira: Nrweeke wa khula ntthu ahokoleleke nttetthe awe.