¹ Atthu oKiriyathi - Yarimi, yahuwa yahikusa nivuku n'APWIYA, khwintjathiki vapuwani vawe Abinadabi, vamattumusani; numala yahunthanla Eleyazari mwana Abinadabi uwo, otjuka nivuku n'APWIYA. ² Okhuma nihuku naitjathiwaya nivuku oKiryathi - Yarimi yahuvira mahuku owatta, ntoko iyakh miloko minli; vano atthu otene a Israyeli yahupacera wipulela, ni wakhuwelela APWIYA. ³ Samuweli ahahimerya atthu otene a nloko na Israyeli, wira: Mwatthuna ohokolela w'APWIYA ni nrim'innyu wotene, nttikhele ota ilatarato tj'amuluku amalapo ni s'Astate, ni mwarukunusele nrima APWIYA ni nrim'innyu wotene, yawo pahi mwarumeleke, ni yawo pahi anuwakihani mmatatani mw'aFilisti. ⁴ Nave atthu a Israyeli yahittikhela ota ilatarato tja Bayali ni tj'Astarte, enarumela APWIYA. ⁵ Samuweli aharuma atthu wira: Atthu otene a Israyeli ethukumane oMisipa, miyo kinrwaa wuxonttelani w'APWIYA. ⁶ Atthu yahithukumana oMisipa, yahurika matji, khwintthela oholo w'APWIYA, nihuku nenno yahitthuka, ehimyaka wira: Hiyo nihatthekela APWIYA. Nihiku nenno Samuweli ahupacera walamula atthu a Israyeli oMisipa. ⁷ AFilisti watjuwelalyaya wira atthu a Isryeli yahithukumana oMisipa, yahuvenya orwaa watuphela eholiyaka ni makhulupalyaya: atthu a Israyeli, watjuwelalyaya yahituthuwa enawova aFilisti. ⁸ Atthu a Israyeli yahun'himerya Samuweli wira: Mwihinnyanyale n'hihiye onixonttela w'APWIYA Muluku'ehu, wira enakiherye mmatatani mw'aFilisti. ⁹ Samuweli ahun'hita mwapwittipwitthi aamwa nanlelo, khwahelela nkuttho APWIYA axonttelaka atthu a Israyeli: Vano Samuweli ahikhuwelela w'APWIYA axonttelaka atthu a Israyeli, APWIYA yahakhelela nkutth'owo wopahiya. ¹⁰ Tthiri okathi Samuweli ahelawe nkuttho wopahiya, aFilisti yahuwa watuphela atthu a Israyeli. Nto okathi ene yowo APWIYA yahikukutteya yopaka etari vorumexa yavirikanyihaka aFilisti, ewopopihaka ventji, aFilisti awo yahutthyawa oholo w'atthu a Israyeli. ¹¹ Vano atthu a Israyeli yahikhuma oMisipa, khuwomola aFilisti, mpakha okherekhere w'oBethi - kari ewinvakatsaka awanani entji. ¹² Samuweli ahikusa nluku, khwemexerya eriyari y'oMisipani n'oYexana, ahihana nipuro nno w'eBeni - Ezeri, iraka: Mpakha va APWIYA akopola. ¹³ Vano, tjitjammo, aFilisti yahuttettheya mmakhuvani, khiyahokolenle-tho otuphela elapo ya Israyeli; mahuku otene Samuweli alamulelalyawe atthu a israyeli APWIYA yahayeviha aFilisti awo. ¹⁴ Mittetthe tjotene aFilisti tjakusalyaya okhuma wEkiromi mpakha oGathi tjahihokolela mmatatani mwa Israyeli, okhuma wEkiromi mpakha oGathi, ni mirerelo tjaya: ni atthu a Israyeli yahuwakha elapo aya yotene. Ohiya vo yahupatthana n'atthu Amori. ¹⁵ Samuweli ahalamula atthu a Israyeli mahuku otene ekumi awe. ¹⁶ Khula eyakha anuvenya wotola mittetthe tja oBetheli, n'oGiligali, n'oMisipa, aniphuka milattu mapuro awo otene. ¹⁷ Numala anihokolela oRama, waryaya enupawe, akhalaka oRama wonwo ahalamula atthu a Israyeli; ni khwateka altari APWIYA.