¹ Nuvuku n'APWIYA nahukhala nlaponi mw'aFilisti mpakha miyeri mithanu na minli. ² AFilisti awo, yahuwihana alipa a nkuttho n'anahako, khwakoha wira: Nintthuna wiriha exeni nivuku nna n'APWIYA? Nnihimerye enamuna entthun'ehu ohokoloxeya waryaya. ³ Awo yahakhula wira: Mwatthuna ohokoloxerya nivuku na Muluku a Israyeliwaryaya, mwihinveleliherye matataru; n'holelihe nivuku nno ni tjovaha tjolivela tjoveiha tjinyu: ni mwira tjitjo nyuwo nnavona, ni nnatjuwela wira ti Muluk'uwo atepa wuhaxani. ⁴ AFilisti yahakoha-tho wira: Nintthuna onlivela ni tjovaha xeni? Awo khwira: Okhala wira makhulupale aFilisti ari mathanu, mwinrwaanele mathukuruku mathanu a wero, ni makhule mathanu a wero, tthiri nyuwo otene mohawa iretta tjimotjaru, ni makhulupal'innyu. ⁵ Tivo, mpanke, ilatarato tja mathukuruku ni tja makhule, yahonona elapo'inyu, wira mwinvuwihe Muluku a Israyeli: atthuna Muluk'uwo onimokhurunuwelani nrim'innyu, n'amuluku'innyu, n'ilapo'innyu. ⁶ Khivanurerelani okhalana nthiti, ntoko tjiralyaya atthu a wEjitu ni mwene aya? N'hiliyale wira Muluk'uwo ahahaxa ni maxakha mentji, khwakhanyereriha wahiya, okhuma? ⁷ Nanso, mpanke, ekaro esya, ntanleke imompe pinli tjothiyana nanlelo tjiniwamwiha asan'aya, tjihinatthi ovarihiya nteko, ntthukeleleke ekaro eyo, asan'aya mwakuseke mwahokoloxeryeke nnikholani. ⁸ Vano nkuseke nivuku n'APWIYA, nttukhulele nkaroni; nkuseke tjovaha tjinyu tja wero mwintthune'nnyu olivana tjoveiha tjinyu mpweheke munivukuni nikina vakhiviru va nivuku n'APWIYA: numala n'hiyeke imompe wira tjirwee. ⁹ Okathi uwo nnutjuwelexa : imompe n'yo tjakela ephiro enrwaa elapo ya oBethi - Xemexi, nanso ti Muluk'uwo onikumiheryale maxakh'ala malupale; vahikhale tjitjo, nnutjuwelexa wira khahiyo Muluk'uwo onihaxale, otakhaliya wihu pahi. ¹⁰ AFilisti yahutthara muruk'uwo; yahikusa imompe pinli tjothiyana tjawamwiha nlelo asn'aya, yahittukhulela vakaroni, khwatthukela asan'aya munikholani. ¹¹ Yahikusa nivuku n'APWIYA khuttukhulela nkaroni, wamotja n'nivuku nikina tjipwehiyemo ilatarato tja wero. ¹² Imompe tjahukela ephiro enrwaa oBethi - Xemixi, khuttharaka ephiro eyo tjunlaka, nto tjihilapuwelaka nnakhala mono wolopwana nnakala mono wothiyana: makhulupale aFilisti yahuttharatthara mpakha nkano w'elapo y'oBathi - Xemixi . ¹³ Atthu oBethi - Xemixi yira ehattaka etrigu nlaponi mwaya mowataleya; vano vawehalyaya nivuku ottayi, yahutteliya nrima ventji. ¹⁴ Imompe tjapurula ekaro vaphiyalyaya mmatta mwa Yoxuwa oBathi -Xemexi, tjahemela vavo wonwo wari mwala mulupale; atthu yahuhita imompe n'yo yahuparula ekaro yotene, ikhini tsene yahupattiha moro ehelaka imompe n'yo nkuttho wopahiya yahelelaka APWIYA. ¹⁵ Alevi yahikurusa nivuku n'APWIYA, nivuku nikina tjaheliyemo tjovaha tja wero, khwintjathiki vamwal'owo mulupale; nihuku nenno atthu oBethi - Xemexiyahahelela APWIYA mikuttho tjopahiya ni mikuttho tjikina. ¹⁶ Makhulupale mathanu aFilisti yahukhala okherekhere ewehatsaka, numala yahuhokolela wEkironi nihuku nenno. ¹⁷ AFilisti, yahavaha APWIYA, mathukuruku mathanu a wero wira elivele tjoveiha tjaya: nthukuruku nimotja wa khula nttetthe wAxidodi, nimotja oGaza, nimotja wAxikeloni, numotja oGathi, nimotja wEkironi; ¹⁸ Awo yahavaha-tho APWIYA makhule a wero nikhule nimotja wa khula nttetthe walamuliya ni makhulupale mathanu aFilisti, mittetthe tjotene n'ye tjilipihiye ni kako nin'ye tjihilipihiye tjahuvaha nikhule nimotja; vano mwala mulupale wa mmatta mwa Yoxuwa oBethi - Xemexiwonwo wintjathiyayawo nuvuku n'APWIYA, oniphwanyaneya nlelo mmatta mwemmo, mwal'owo onikhala namona wa tjitthu tjakhumelelale, mpakha olelo va. ¹⁹ Vano APWIYA yahahukhumu atthu oBethi - Xemexi, okhala wira yahuweha n'hina mwa nivuku n'APWIYA; atthu miloko mithanu na minli yahupweteya nihuku nenno. Atthu otene yahunla, okhala wira APWIYA yahamorihela ehukhumu eyo yulupale. ²⁰ Atthu awo oBethi - Xemexi khwira: Ti pani onilipiha vamethoni va PWIYA Muluk'ula ottittimiheya? nithamihe nivuku n'APWIYA nto nirwaane vayi? ²¹ Vano yaharuma anamitthaka orwaa oKiryathi - Yarimi, wira yahimerye atthu wira: AFilisti ahokoloxa nivuku n'APWIYA: vano, nwe, nkuseke nyuwo.