¹ Vakusalyaya nivuku na Muluku, aFilisti, yahuvenyiha w'Ebeni - Ezeri erwanaka w'Axidodi. ² AFilisti yahikusa nivuku nowatana na Muluku, khurwaana mumpani mwa muluku ayaDagoni, khupweha vakhuviru ni elatarato eyo Dagoni. ³ Mmeloni mwaya atthu a w'Axidodi, yahuphwanya elatarato ya muluku Dagoni emorelalene vathi oholo wa nivuku n'APWIYA: awo yahittukhula, khwemexa vanipuroni vaya. ⁴ Nihuku noneraneraru vatsitsu'ene, yahumphwnya-tho muluku aya amorelalene vathi oholo wa nivuku n'APWIYA; muru wa Dagoni ni matat'awe tjikakatthiy'ene n'ilatarato eyo tjahuphwanyiya vankhora va enupa eyo, erutthu pahi ya Dagoni ti yahalale. ⁵ Ti mana mpakha olelo va wAxidodi alipa a nkuttho a muluku Dagoni n'atthu otene ankela mumpani mwa muluk'uwo, khannyakela vankhora va enupa ya Dadoni'uwo. ⁶ APWIYA yahahukhumu atthu a wAxidodi, khuwinvakatsa entji, yawanelaka mapotthe yaravihiye nttetthe owo ni mmawani motene. ⁷ Vonalyaya tjotakhala tjakhumelelale atthu a wAxidodi, khwira: Nivuku nowatana na Muluku a Israyeli nihikhale nlaponi mwihu mu, Muluk'uwo otepa onihukhumi hiyo, ni muluku'ihu Dagoni. ⁸ Vano yahathukumanya makhulupale otene aFilisti, khwakoha wira: Nintthuna wiriha exeni nivuku na Muluku a Israyeli? Awo yahakhula wira: Nivuku nno nithamiheriye oGathi. Tjitjammo nivuku nowatana na Muluku nahithamiheriya nttetthe w'oGathi. ⁹ Vano nivuku niphiyakaru wonwo, APWIYA yahahukhumu atthu a nttetthe owo; yakumiheryaka atthu otene alupale n'akhani, eretta yowimpakatsa tivo atthu otene yahova ventji. ¹⁰ Nave yahiruma wira nivuku na Muluku nikuxiye nirwaaniye wEkironi, atthu a wEkironi yahupacera okhuwela iraka: Awo aniwqnela nivuku na Muluku a Israyeli wira eninvihe oten'ihu. ¹¹ Tivo yahathukumanya makhulupale otene aFilisti, khwahimerya wira: N'hokoloxerye nivuku na Muluku a Israyeli, elapo aya, nahokolele axinene wira nihininvakatse oten'ihu: Tthiri atthu otene a wEkironi yahopopihiya ventji n'ihatsara tjulupale, Muluku amorihelalyawe. ¹² Atthu yahakhwale, yahuwereiya mapotthe; okhuwela waya nuxanka ahuwela mpakha wirimu.