¹ Samuweli ahahimerya atthu otene a Israyeli. Mahuku awo atthu a Israyeli yahikumana n'aFilisti owana ekhotto, ni yahumaka okherekhere wa Ebeni - Ezeri, vano aFilisti yamakale w'Afeki. ² Ni aFilisti yawo yahatuphela atthu a Israyeli; ewanaka n'uwali khwaxintta, okhottoni wonwo atthu a Israyeli yahuweriya n'aFilisti, khwinvakatsiya anakhotto ikonto miloko mitjese a Israyeli. ³ Ale yahalale yahihokolela omaxaxani waya, vano makhulupale a Israyeli yahukohanatsa yaworu yiraka: APWIYA annyanyalenleni khunihiya niweriyaka n'aFilisti olelo? Nirweele nivuku nowatana w'APWIYA Osilo, wira nikhaleke eriyarihu ninakiherye mmatatani mw'awananihu. ⁴ Nananoru yaharuma atthu orwaa Osilo, okusa nivuku nowatana w'APWIYA ninthonyerya ehitje yovuwa w'APWIYA owerya tjotene, ni asana aili a Eli, Hofini ni Pineha, yahuwa wamotja ni nivuku nowatana na Muluku. ⁵ Viraneyale tjammo, nivuku nowatana w'APWIYA niphiyakaru omaxaxani, atthu otene a Israyeli yahikhuwela n'uwali, mpakha othukumeliha elapo. ⁶ Vano aFilisti yahumwinwa namalwe, khwira: Mwinwe okhuwela nwo wowali omaxaxani w'aHeberi exen'iyo? Khutjuwela wira nivuku nowatana w'APWIYA nahiphiya omaxaxani nwe. ⁷ AFilisti yahituthuwa ventji, khwira: Muluku ophiya mmaxaxani mwaya. Ni yahira: Hai notakhaliya! Vano khunanikhumelele tjitjammo okathi ovirale. ⁸ Nopweteya! Ti pani ontthuna onakiherya mmatatani mwa Muluk'uwo a ekuru? Ti Muluku yole ahaxale atthu a wEgitu n'ohatsara tjintji mothakoni. ⁹ Nto nlipihe nrima, kho aFilisti, nkhale alopwana ominyala, wira nihikhalihiye ipottha tj'aHeberi, ntoko awo tjakhalalyaya ipottha tjihu: nwaneke ntoko alopwana a ekuru. ¹⁰ Vano, aFilisti, yahatuphela atthu a Israyeli, khwawerya, atthu a Israyeli yahuttyhawela ilapo tjaya; nto anakhotto entji yahupwetexiya okhottoni, yahinvakatsiya atthu ikonto miloko miraru. ¹¹ Nivuku nowatana nahikuxiya, ni asanawe Eli yahukhwatsa oweli, Hofini ni Pineha. ¹² Ntthu mmotja a nihiumo na Beniyamini, ahuttyhwa okhottoni khuphiya nibuku nenno Osilo, ekuwo tjawe tjothala muru awe wotjareya mihava: ¹³ Vaphiyalyawe, Eli ira okomalene vamunyukhuni vawe vankhora awehexaxaka ephiro; okhala wira nrimawe wira othukumelaka mwaha wa nivuku nowatanan na Muluku. Vano nakhott'ole ahuphiya ahuhimya muhupi wa ekhotto, atthu otene yahupacera wunla ekuttho. ¹⁴ Eli ahinwa ekuttho eyo khupuwela, iraka: Ekuttho xen'iyo? Ni nakhott'ole yahinkhuvela Eli khun'himerya tjakhumelelale. ¹⁵ Eli ahuluvala ventji arina iyakha miloko mithanu na mitjese n'iyakha thanu na ttharu, metho awe yahukota khuyotjela wona. ¹⁶ Vano, nakhott'owo, ahun'himerya Eli wira: Ti miyo kikhumale okhottoni, olelo va kotthyawa kihopowa. Eli ahunkoha iraka: Mwan'aka, ekhumelelale exeni? ¹⁷ Nan'hupi ule ahumwakhula, wira: Asana a Israyeli atthyawihiya n'aFilisti, atthu entji avinvakatsiya; asan'inyu eli Hofini ni Pineha, t'akhwale, ni nivuku nowatana na Muluku nokuxiya. ¹⁸ Winwalyawe wira nuvuku nowatana na Muluku nahikuxiya, Eli ahipinttuwa vakhukuluni wawe khupinttuwela vankhora, ahunyanyeya exiko, khukhwa: okhala wira ahuluvala amalavo ni ari oneneva. Owo ahalamula atthu a Israyeli mpakha iyakha miloko mitjese. ¹⁹ Vano mathi awe Eli, mwarawe pineha, ira anari ni ehamela ahalale on'yara mwana, winwalyawe wira nivuku nowatana na Muluku nahikuxiya, ni wira nlamu awe n'inyawe ahukhwa, ahupacera oweren'ya; khunyara mwanawe. ²⁰ Vano ahanlene okhwa, athiyana yanrukureryale yahun'himerya: Nlipihe nrima, mwana on'yaralinnyu nlopwana. Nto owo khwawiriyanale, khwakhulale etthu. ²¹ Vano ahunvaha mwanawe ntjina na Ikabodi, iraka: Ovuwa wahanyanyala atthu aIsrayeli! Mwaha wa nivuku nowatana na Muluku nikuxiye, ni mwaha w'okhwa Eli ni Pineha in'yawe. ²² Tivo, ahimalyawe wira: Ovuwa wahanyanyala atthu a Israyeli; mwaha wokuxiya nivuku nowatana na Muluku.