¹ Mmiravo Samuweli anarumela APWIYA ettihiyaka ni Eli: ni mulumo APWIYA khiyaiwanyeya mahuku awo; APWIYA khiyaitjoniherya w'atthu aya ntoko khalayi. ² Vano ohiyu omotja, Eli ira arupathiki, metho awe yahunripeliha, khuhiyonexexa-tho, ³ Samuweli anurupathi mumpani mw'APWIYA, mwemmo mwaryayamo nivuku nowatana na Muluku: nthuko wa Muluku nanlelo khuwattipale, ⁴ APWIYA yahumwihana Samuweli; owo ahakhula wira: Miyo kiri va. ⁵ Nananoru ahutthimakela w'Eli, khun'himerya wra: Miyo kiri va; nkihanenleni? Eli ahun'himerya wira: Miyo nkiwihanneni; n'hokoloweke mwarupathiki. Ni owo ahuhokolowa, khurwaa orupathi. ⁶ Vano APWIYA yahumwihana-tho nkwaha wonapili Samuweli. Owo ahunenya khumwakuvela Eli, iraka: Miyo va; nkihanenleni? Eli ahumwakhula wira: Mwanaka, miyo nkiwihanneni; n'hokoloweke mwarupathiki. ⁷ Samuweli nanlelo khatjuwela APWIYA, khatjuwelihiye mulumo aya. ⁸ Emara yonattharu, APWIYA, yahumwihana Samuweli. Owo ahuvenya khumwakuvela Eli, iraka: nkihanenleni? Vano Eli tatjuwelalyawe wira ti yamwihana mmiravo owo. ⁹ Eli ahun'himerya Samuweli wira: Orwee, warupathiki: mwaihaniya-tho, mwakhule wira: Nlavuleke, APWIYA, nrumey'innyu onawinwani. Tjitjammo Samuweli ahirwaa, khurupathi nipuro nawe. ¹⁰ APWIYA yahunrwela-tho, emwattama vavale, khumwihana ntoko tjamwihanaya imara tjikina yiraka: Samuweli, Samuweli! Vano Samuweli ahakhula iraka: Nlavuleke nrumey'innyu onawinwani. ¹¹ APWIYA yahun'himerya Samuweli wira: Miyo kinrwaa oponka etthu yowopiha w'atthu a Israyeli, otene ale anrwaa winwa, anuthikileya nthana. ¹² Nihuku nenno kinumwiriha Eli tjotakhala tjotene tjahimalyaka mwaha w'etthoko awe. tjopacera, ni tjikhitserya. ¹³ Kahunlopola wira karwaa ohukhumu etthoko awe vohimala-tho, mwaha wa tjotakhala tjawe owo ontjuwelawe; okhala wira asanawe yanveiha Muluku, ni owo khuhattarusa. ¹⁴ Tivo vanlaphelaka etthoko y'Eli, wira khivo etthu enwerya wakiherya etthoko y'Eli ehukhumu emphwanelaya nnakhala nkuttho wala tjovaha. ¹⁵ Samuweli ahirupathi mpakha oxa, vaxakaru ahuvenya khutthukula mikhora tja enupa y'APWIYA, vano Samuweli anova on'himerya Eli mulumo inwalyawe. ¹⁶ Eli ahumwihana, Samuweli, khun'himerya, wira: Mwanaka,Samuweli. Ni owo ahakhula: Miyo va kiri va. ¹⁷ Eli ahunkoha iraka: APWIYA yohimeryaleni axeni? Kinnulapelani wira n'hikikhuwe etthu miyo; Muluku otakhaliheni, mwakikhuwa hata nulumo nimotja nohimeralyaweni. ¹⁸ Vano Samuweli ahun'h9merya mulumo otene, ahinkhuwaka etthu. Nave-tho Eli khwira: Yawo t'APWIYA; yireke tjinonaya tjophwanela. ¹⁹ Samuweli ahunuwa, ni APWIYA yari ni yowo, khumaleliha mulumo otene yahimalyaya. ²⁰ Atthu otene a Israyeli okhuma oDani mpakha oBerixeba, yahitjuwela wira Samuweli ari porofeta okupaliya n'APWIYA. ²¹ Tjitjammo APWIYA yahutjoneiha oSilo imara tjikina: okhala wira yahitjuweliha wa Samuweli oSilo ni mulumo aya APWIYA.