¹ Hanna ahilompa iraka: APWIYA atsaliha nrimaka nutteliya nrima, eroho aka ennatthapela APWIYA; eyano tjaka tjinnatheya awanani aka, kotjiveliya ni muluku aka okopolale. ² Khuvo ottittimiheya onlikana n'APWIYA: Khuvo nkinaku ohikhalale yawo; khuvo orina ekuru ntoko Muluku'ehu. ³ N'hattiheke wittottopa winyu; mmalihe olavula tjowintsona; Okhala wira APWIYA ti Muluku antjuwela tjotene, awo annalamula atthu ni exariya. ⁴ Mavaka a'lipa a ekuru ahunteya, alipa olotsowa aphwanya ekuru. ⁵ Ale yalamalelale orupala Vano annihawela yolya: Vano ale yavoliya khanihawela-tho yolya: Nthiyana ari ohiyara ohayara anawe athanu n'eli, vano namwana okhitsale oyara. ⁶ APWIYA tanvaha okhwa, ni tanvaha ekumi: Awo annarwana mmahiye, ni annakumiha. ⁷ APWIYA annivaha, ni annakha: Anniyeviha, ni anninnuwiha. ⁸ Awo annimwemexa masikhini, amorelale vantthupini, anninkumiha nlipa othowiya ori osalani; Awo annakilathiha eriyari ya mamwene annavaha ehitje yovuwa: Okala wira APWIYA tanikhaliha elapo, Awo tanlipiha olumwenku. ⁹ APWIYA annaholela anaxariya ephiro yorera, Nto atakhali anurimela mwepiphini; Okhala wira khuvo ntthu onilipiha ni ekuru tjawe. ¹⁰ APWIYA anamwapwetesa awanani aya, wirimu onkhalaya anamwaverunyela atakhali: APWIYA annalamula atthu mpakha wokhitseryani w'elapo, Ni anunvaha owerya mwene ontthapelalyaya, Ni anulipiha ekuru tja mwene onthanlalyaya. ¹¹ Ni Elikana ahuhokolela nlaponi mwawe oRama; vano mwan'owo ahuhala oSilo arumelaka APWIYA ettiheriyaka ni nlipa a nkuttho Eli. ¹² Ana Eli yari otakhala nrima, khiyathokorerya APWIYA. ¹³ Nnakhala enamuna yowarumela atthu, okathi atthu yahelaya nkuttho, enama epaceralene wapeiya, nrumeyi a nlipa a nkuttho aniwa akusalene ekhope ya meno mararu; ¹⁴ Ni anihoma mmwapuni, wala nkhalakoni, wala munikapuni, vano enama yakumihiya ni ekhope, yakhala ya nlipa a nkuttho. Awo yanuwirela tjitjo atthu otene a Israyeli yarwaa oSilo. ¹⁵ Vano, yahukhalavo otepa otakhala ehinatthi ovya makhura a inama, nrumeyi a nlipa a nkuttho aniwa, on'himerya ole ahela nkuttho wira: N'kivahe enama kamoxerye nlipa a nkuttho; Owo khantthuna enama yowapeiya, nto ontthuna ekithi pahi. ¹⁶ Nlipa owapeya anun'himerya wira, mwalitteke ovya makhura toko, numala nnuhavula enama yotene entthunennyu; vano nrumeyi ole ahumwakhula wira: Hoye, nkivaheke nannano va: mwahikivaheke kinukusa n'uwali. ¹⁷ Tjito, vano, aximiravo awo eli yanatthekela APWIYA ventji; okhala wira yanuveiha tjitthu tjavahiy'aya APWIYA. ¹⁸ Vano Samuweli anari mmiravo anirumela onankuttho oholo w'APWIYA, awaraka nlaya n'elinyu. ¹⁹ Amayawe yanunttotthela nlaya nikhani, enanwanela khula eyakha, okathi warwaaya ohela nkuttho wamotja ni an'yaya. ²⁰ Eli nlipa a nkuttho anunxottela Elikana mwarawe, iraka: Mwaha wa mwana avahalinnyu APWIYA APWIYA yawo ewuntjereryeni ana entji n'amwarinyu ala. Tjitjammo awo yahuhokolela owani. ²¹ Ni APWIYA yahunreriha-tho Hanna, owo ahukhala ni ehamela, imara tjikina khwayara anawe araru axilopwana, n'axithiyana eli. Vano mmiravo Samuweli ira annuwaka vamethoni v'APWIYA. ²² Vano, Eli, aharere wuluvala, aninwa ehimiyaka makhalelo otakhala asanaweyapuheryaka atthu a Israyeli, amiravo awo yaniraruwa n'athiyana yavara nteko vankhora vehema yokumana. ²³ Owo ahahimerya wira: Nnirelani tjotananara tjitjammo? Tjotakhala tjininwaka tjihimiyaka tja nyuwo tjinnapiya n'atthu otene a Israyeli. ²⁴ An'aka, n'hire-tho tjitjammo; tjitthu tjinihimyaniyennyu khatjihiyo tjorera: nyuwo mwinnatthekiha atthu APWIYA. ²⁵ Nlopwana antthekela nkhwawe, alipa ophuka annimphuka; nto nlopwana atthekela APWIYA, animwakiha ti pani? Aximiravo awo khiyathokoreryale mulumo atithyaya, tthiri APWIYA yahalamulela okhwa. ²⁶ Vano mmiravo Samuweli anunnuwa mwerutthuni nurera wawe vamethoni va Muluku ni v'atthu. ²⁷ Ntthu a Muluku ahuwa okumana ni Eli, khun'himerya wira: Tjinohimeryaya APWIYA tin'ya: Mwinwe orattene okathi axitith'inyu, yakhalaya wEgitu ekhalihiyaka ipottha tja mwene Farawu miyo kahitjuweliha mmantjaka wa yawo. ²⁸ Miyo kahathanla atithinyu awo eriyari ya mahimo otene a Israyeli, wira ekhale alipa a nkuttho vamethoni vaka; ewattameke altari aka, epaheke erupani, ewaralene Efodi oholo waka; tjovaha tjotene tjinwaniya n'atthu a Israyeli miyo kahuvaha okaweliya etthoko ya tithinyu. ²⁹ Vano mwinthanyeryani tjovaha ni mikuttho, tjirumalyaka oheliya mumpani mwaka; exeni mwattittimihaka asan'inyu okivikana miyo, nyuwo moneneva mwithanlelaka iphantti tjorerexa tja tjovaha tjinkiwanelaya atthu a Israyeli? ³⁰ Tivo, vanihimyaya APWIYA Muluku a Israyeli: Khalayi kahalaphela axitithinnyu n'atthu a etthoko'innyu wira yarwaa okhala alipa a nkuttho oholo waka mahuku otene nto vano onukhala opweteya; miyo k'APWIYA: Nkinotha, tthiri miyo kinnavuwiha ankittittimiha , kinnathanya ale ankiveiha. ³¹ Onuphiya okathi, onrwaaka wumalamalihani, numalamaliha etthoko ya tithinyu, khuvo mw'amutjinyu onrwaa wuluvala. ³² Nyuwo munaweha ni nrima, tjorera tjinrwaaka owirela atthu a Israyeli; vano vapuwani vinyu khuvo onrwaa wuluvala. ³³ Nto nlelo kinun'hiya ntthu mmotja a vapuwani vinyu wira akivarele nteko valtari vaka, tjitjammo nyuwo, mununkhalela nrima eroho'inyu enuttettheya; vano atthu otene e'tthoko'inyu anukhwatja nlelo enari akithi. ³⁴ Ethonyeryo enrwaa wotjuwelihani etthu'ila etthu enrwaa wakhumelela asaninnyu eli, Hofini ni Pineha: ow'eli anukhwatja nihuku nimotja. ³⁵ Numala kinrwaa withanlela nlipa a nkuttho ororomeleya, ontthuna okivara nrima omaliheryaka tjotene tjintthunaka; ni miyo kinunvaha etthoko ehinala, vano owo onrwaa okirumelaka mahuku otene vamethoni va mwene aka othanliya. ³⁶ Atthu otene antthuna ohala vatthokoni vinyu anrwaa wa yowo, wira envarele metto anlapelaka esimola ya ntjurukhu ni yolya, en'himeryaka wira: Xontte nkitthuniherye orumela onankuttho, wira kiphwanye yolya kihikhwe etala.