¹ Nihuku naneraru Davidi aphiyalene wamotja n'atthu awe oZikilagi, ahuphwanya nttetthe owo ohononiyene nupahiya, atthi Amaleki tiyatuphelale oNegebi, ni oZikilaki. ² Awo yahavara athiyana n'atthu otene, alupale ni akhani; nto khiyamwivale ntthu, yahakusa otene aya, khwarwaana. ³ Vano, Davidi n'atthu awe waphiyalyawe oZikilagi wonwo, yahuphwanya nttetthe opahiyene, axaraya n'asanaya axithiyana ni axilopwana ekuxiyene. ⁴ Nave Davidi n'atthu awe yahikhuwela yunlaka, mpakha walala vammilo. ⁵ Nave-tho axara eli a Davidi yahukusiya, Ahinowami a wIzereyeli ni Abigayili, ari mwarawe Nabali oKarmeli. ⁶ Ni Davidi anivelavela ventji nuxanka, okhala wira atthu awe yanumwapa etthokelelaka omwinva; atthu otene nrima waharipa ventji yikhupanyeryaka, mwaha w'asanaya axilopwana ni axithiyana: Nto Davidi ahulipiha nrima ni ekuru tj'APWIYA Miluku awe. ⁷ Ni ahun'himerya nlopa a nkuttho Abiyatari mwana Ahimeleki: Miyo kinnulapelani wira nkiwanele efodi. Ni Abiyatari khunwanela Davidi. ⁸ Ni Davidi ahakoha APWIYA, iraka: Katthamakeleke anakhotto ale? Kinamwaphwanya? Ni APWIYA yahun'himerya: Nvenye mwatthamakeleke munamwaphwanya, ni. munawopola atthu'inyu otene vohipitja. ⁹ Vano, Davidi ahuvenya, wamotja n'anakhotto awe miloko miloko mithanu na motja, khuphiya omuro Besori, wonwo anakhotto akina yahalalyaya vavale. ¹⁰ Ni Davidi ahurwaa n'atthu awe miloko miloko mitjese; okhala wira akina yahuhala ottuli wonwo miloko miloko minli, okhala wira yahotjeya khiyawerya olapuwatsa muro Besori. ¹¹ Ni yahumphwanya nlopwana a wEjitu omathalani, yahunvara enwanelaka Davidi, ni khunvaha yolya, ni matji owurya; Yhunvaha-tho mihokhorokho tja efigu, ni mavuru meli a ewuva. ¹² Numala olya, nlopwana owo ahulipa mmakhuvani; okhala wira ahuviriha mahuku mararau othana n'uhiyu ahilyaka etthu. ¹³ Davidi ahunkoha wira: Mwa pani nyuwo? Ni mwinkhuma vayi? Ni mmiravo owo a wEjitu khwakhula wira: Miyo ki mmiravo a wEjitu kipankiye epottha ya ntthu Amaleki, ni pwiy'aka okinyanyala avira mahuku mararu, okhala wira kanawereiya; ¹⁴ Vano ti hiyo natuphelale oNegebi w'aKeret, oNegebi wa Yuda, oNegebi wa Kalebi; hiyo nahupaha oZikilagi. ¹⁵ Davidi ahunkoha wira: Nyuwo mwinnitthuna onihola mpakha oryaya anakhotto ale? Ni owo khwakhula wira: Mwakilaphela wa Muluku wira khamunkinva ni khamunkivahererya wa pwiy'aka, miyo kinamoholani. ¹⁶ Nave ahun'hola Davidi; ni atthu Amaleki yahumwaramwareya mapuro ale otene, elyaka ni ewuryaka ni etthapelaka, mwaha wa tjitthu tjintji tjakusalyaya nlaponi mw'aFilisti, ni nlaponi mw'aYuda. ¹⁷ Ni Davidi ahatuphela okhuma vatsitsu mpakha nihuku nikina makaripi: khuvo opowale, wahiya amiravo miloko miloko mitjese, yawelale ikamelo tjaya khutthyawa. ¹⁸ Davidi ahuwakha atthu Amaleki tjitthu tjotene tjakusalyaya: ni khuwopola axarawe eli. ¹⁹ Ni khapweteyale ntthu nnakhala alupale nnakhala akhani, nnakhala asan'aya axilopwana wala axithiyana, khiyapweteyale etthu, tjitthu tjotene atthu Amaleki yakusalyaya: tjahuphwanyiya ni Davidi. ²⁰ Davidi ahuphwanya-tho mihuwo tja inama tjikhani ni tjulupale; ale yetta oholo wa makoto yanuhimya wira: Moneke tjakusalyawe Davdi. ²¹ Davidi waphiyalyawe wemelalyaya alopwana ale miloko miloko minli, yahalale omuro Besori mwaha wokhulummwa ventji; awo yahuntthamakela Davidi, n'atthu yettanalyawe. Davidi ahuwattama, khwakhomatja. ²² Nave mw'atthu ale yanttharale Davidi, yahikhuma akina otakhala nrima n'ahintekela etthu khwira: Vano ala khiyawale ni hiyo, nihavahe etthu tja n'ye ninkus'ihu, yakuseke axaraya n'asanaya pahi; arweeke tjitjammo pahi. ²³ Ni Davidi khwira: Hoye qpatthani aka, n'hirihe tjitjammo tjitthu nivahiyehu n'APWIYA; yaqwo tanitsunkale, ni tanivahale mmatatani m,wihu alavilavi ale yaninyerale. ²⁴ Ontthuna okupali mulumo'inyu ti pani? Hoye atthu otene ekaweliyeke volikana ale yarwaale okhottoni, n'ale yahalale etsunkaka miritti; ekaweliyeke wamotja. ²⁵ Okhuma nihuku nenno Davidi ahulipiha ekano ela wIsrayeli tivo wahulamaleliya wiriya tjitjammo mpakha olelo. ²⁶ Davidi vahokolelalyawe oZikilagi, ahakawela makhulupale a yuda, apatthani awe tjitthu tjaphwanyale awe, ahimeryaka wira: Mwakhele tjovaha n'ya, tjiwakhalyaka awanani APWIYA. ²⁷ Davidi ahaveleliha tjovaha n'ye atthu yari oBetheli, ni oRama w'oNegebi, ni atthu yari oYatiri; ²⁸ Ni yari Waroweri, ni Osifemothi, ni yari wExitemowa; ²⁹ Ni yari oRakali, ni yari mittetthe tja Yerahimeli, ni yari mittetthe tja Kayini; ³⁰ Ni yari oHorman ni yari Obori-Axani, ni yari w'Ataki; ³¹ Ni yari Ohebroni, ni mapuro otene Davidi ettalyawe n'atthu awe