¹ AFilisti yahathukumanya anakhotto aya otene wAfeki; ni atthu a Israyeli yahumaka okherekhere wa ehime ya wIzireyeli. ² Makhulupale aFilisti yanetta yaholaka atthu aya ekawiyene makoto atthu ekonto emotja makoto makina atthu miloko muloko, Davidi n'atthu awe ahalale ottuli wamotja n'Akixi. ³ Ni makhulupale aFilisti yahunkoha Akixi wira: Aheberi awo anwelani ni hiyo? Ni Akixi ahuwakhula makhulupale aFilisti wira: Nnari ola khahi Davidi, nrumeyi a Sawuli mene a wIsrayeli? Owo ori ni miyo okhuma iyakha pinli okhu ma nihuku natanalyawe ni myo, khivo etthu yotakhala emonalyakana mpakha olelo va. ⁴ Nave makhulupale awo aFilisti yahunviruwela Akixi, ni khun'himerya: Mmomole nlopwana owo, ahokolele nipuro ninvahalinyu, ni ahirwee okhottoni ni hiyo, atthuna onanirukunuwela okathi w'owana; khantthuna ophwanye okathi worerexa w'onkurunusa nrima pwiy'awe, awinvaka atthu'ihu ala? ⁵ Ohiya vo Davidi owo khahiyo yole ipeliye ni ineliye, attottopeliyaka wira: Ekonto emotja tawinvalyawe Sawuli, ni ikonto muloko tawinvalyawe Davidi? ⁶ Ni Akixi ahumwihana Davidi, ni khun'himerya: Mwaha w'APWIYA, nyuwo mwa nlopwana oloka, vakitjivela wira nkhaleke ni miyo okhottoni ni vapuwani vaka, tthiri miyo nkophwanyanneni nlattu okhuma nihuku niwalinyu okhala ni miyo mpakha olelo va; nto khamwintthuniya ni makhulupale anakhotto.