¹ Mahuku awo aFilisti yahathukumanya anakhotto aya otene wira yatuphele atthu a Israyeli. Ni Akixi ahun'himerya Davidi wira: Nave-tho nyuwo n'atthu'inyu n'hana orwaa ni miyo, okhottoni. ² Davidi ahumwakhula Akixi wira: Miyo, ki nrumey'inyu, nnaweha mmantjinyu miteko tjaka. Ni Akixi ahun'himerya Davidi wira: Varera miyo kinamukhalihani mulupale aanakhotto kinettanaka mahuku otene. ³ Vakhwalyawe Sanuweli, atthu otene a Israyeli yahimunlela, ni yahunvitha oRama, nttetthe awe. Ni Sawuli ahuwomola anakhotto otene nlaponi mwawe khwakottiha okoha minepa. ⁴ Vano aFilisti yahuthukumana, khuwatsa omaka oXunemi: ni Sawuli ahathukumanya atthu otene a Israyeli, khurwaa omaka vamwako Gilbowa. ⁵ Sawuli awehakaru anakhotto aFilisti omaxaxani waya, ahuttettemela, ni wova wulipale vanrimani vawe. ⁶ Ni ahakoha APWIYA; nto APWIYA khiyamwakhulale etthu, nnakhala molohani, nnakhala n'ihako nnakhala ni maporofeta. ⁷ Tivo Sawuli ahahimerya arumeyi awe wira: Nkiphavelele nthiyana onaxerya ehako, wira miyo kirwee kaxerye. Ni arumeyi awe yahumwakhula wira: Okhala nthiyana mmotja wEdori onaxerya ehako. ⁸ Sawuli ahirula malay'awe omwene, ahuwara malaya makina wira ahitjuweliye, khuvenya n'atthu awe eli, ni ahuphiya wa nthiyana ole ohiyu; ni Sawuli ahun'himerya wira: Miyo kinnulapelani wira nkaxererye ehako aka, ni mmwihane ole ontthunaka wohimeryani. ⁹ Ni nthiyana ole ahun'himerya wira: Nyuwo motjuwela wira, Sawuli ahukottiha okoha minepa, nlaponi mwawe motene; Vano, mwaha wa xeni, mwinlupatth'inyu ekumi aka, wira nkivihe? ¹⁰ Nave Sawuli ahulapha ni ntjina n'APWIYA, iraka: Mwaha w'APWIYA anene ekumi, khivo etthu yotakhala eni yokhumeleleni. ¹¹ Nthiyana owo ahunkoha wira: Kiwihaneleni pani? Sawuli ahumwakhula wira: Mmwihane Samuweli. ¹² Ni nthiyana owo vamonalyawe Samuweli awaka, ahikhuwela ventji, ni nthiyana owo khun'himerya Sawuli, iraka: ¹³ Nkotothelaleni? nyuwo mwa Sawuli. Ni mwene ahun'himerya wira: Nhove etthu: mwinwehale pani? Ni nthiyana owo ahumwakhula Sawuli wira: Kiwehale minepa ikhumale vathi. ¹⁴ Ni owo khunkoha wira: Owitho wawe onlikana n'apani? Ni nthiyana owo ahakhula wira: Ti wa nlopwana nkhulupale owelaka, wikhunelalene ni nkhumi. Sawuli ahitjuwelexa wira ti Samuweli, ni ahukokhora uramakampakha vathi, upuwelelaka ventji. ¹⁵ Samuweli ahunkoha Sawuli iraka: Nkihanelaleni wamumulaka? Ni Sawuli ahumwakhula wira: Knuvelavela ventji ni winiya nrima; aFilisti t'ankilupattha miyo, ni Muluku okinyanyala, ni khatthunale okakhula, nnakhala molohani, wala ni maporofeta: tivo vawihanalyakani, wira nkihimerye entthunaka wira. ¹⁶ Nave Samuweli ahira: Ntjuwelaka wira APWIYA ahunyanyalani, ni wira ari n'awananinyu, mwinkikoheryani? ¹⁷ APWIYA t'animaleliherya tjahimalyaya ni mulumo aka; vano awo awakhani omene, ni khunvaha mpatthaninyu Davidi. ¹⁸ Nyuwo khantthunale owinwelela APWIYA, khamwapwetesale atthu otene Amaleki n'itthu tjaya tjotene, tivo APWIYA aniwirihayani tjitjammo. ¹⁹ Ni APWIYA anamuvahereryani nyuwo n'atthu otene a Israyeli mmatatqni mw'aFilisti: ni melo nyuwo ni nasaninyu, munawa okumana ni miyo; ni anakhotto a Israyeli anuvahereriya mmatatani mw'aFilisti. ²⁰ Okathi ene yole Sawuli inwakaru tjitjammo ahumorela vathi, ni ahututhuwa ventji mwaha wa mulumo a Samuweli; ohiya vo mmakhuvani mwahunttettheya, okhala wira othana yole n'uhiyu yole khalyale etthu. ²¹ Nthiyana ole ahumwattama Sawuli, amonaka vaharere awe otuthuwa, ni khun'himerya: Motjuwela miyo epotth'inyu kohinwelela mulumo'inyu, ni koleva ekumi aka, kiraka tjakirumalinyu. ²² Vano-nto, kinnulapelani, wira nkiwiriyane miyo epotth'inyu: nkihiye kuvaheni yolya vakhani nlyeke, mphjwanye ekuru vakhani tjohokolela ephiro'inyu. ²³ Ni Sawuli anikhotta, iraka: Nrari nkintthuna olya. Nto arumeyi awe yahunthipelela nthiyan'owo ahunkhanyereriha, ni owo khutthuna. Vano, owo ahuvenya, vathi, kh'okom a vamunyukhuni. ²⁴ Nthiyana owo ahukhalana mwanyompe oneneva, ahakuvela on'hita; ahikusa otthu ahetheya, ahoxa iphau tjihiheliye miropo. ²⁵ Ni ahunvaha yolya Sawuli n'arumeyi awe eli; ni awo khulyaka, numala yahuvenya, khurwaa ohiyu yole.