¹ Nave aFilisti yahatuphela atthu a Israyeli, atthu a Israyeli yahatthyawa aFilisti, ni yahinvakatsiya atthu entji omwako Gilbowa. ² Ni vottharelana aFilisti yahunlupattha Sawuli n'asanawe, khupacera owinva aana araru a Sawuli, Yonathani, Abinadabi, ni Maliki-Xuwa. ³ Ni ekhotto yotene yahummorela Sawuli, ni khuvonyiya matthere; ni khuwova ventji alipa ovonya matthere. ⁴ Nave Sawuli ahun'himerya nrumeyi awe ettanawe wira: Mwinkumihe xow'inyu, ni nkiluheke, ehinatthi ophiya alukhu ale, nkintthuna winviya n'awo, ahikiveihe. Nto nrumeyi awe owo khatthunale, okhala wira animova ventji. Nave Sawuli ahunkusa xow'awe, khwimorihelaka watjulu wawe. ⁵ Nrumeyi awe ettanawe anwehakaru Sawuli okhweene nave ahimorihela vaxowani vawe, ni khukhwaka wamotja ni mwene awe. ⁶ Tjitjammo nihuku nimotjaru nenno, akhwale Sawuli n'asanawe araru, ni nrumeyi awe ni atthu otene yarinawe. ⁷ Atthu a Israyeli yakhala ekhopela ele ya muro, n'ale yakhala ekhopela ya muro Yordani, vawehalyaya wira anakhotto a Israyeli yahutthyawihiya, ni wira Sawuli ahukhwa wamotja n'asanawe, yahuhiya mittetthe tjaya ni khutthyawa; ni aFilisti yahukela mittetthe n'yo khukhalaka wonwo. ⁸ Mmeloni mwaya, aFilisti yahurwaa okusa tjitthu tj'anakhotto yakhwale, khumphwanya Sawuli n'asanawe araru vamwako Gilbowa; ⁹ Awo yahikittha muru wa Sawuli , yahunrula tjowara tjawe tja yuma; ni khurumiyaka orwaaniya tjitthu n'ye elapo y'aFilisti, wira yalaleryeke mumpani mw'amuluku aya, ni yalaleryeke atthu aya. ¹⁰ Ni yahintjathi mavaka a Sawuli mumpani mwa muluku aya Astarte, ni khuthomeya nrutthu awe vaxirini va nttetthe w'oBethi-Xeyani. ¹¹ Nto atthu oYabexi w'oGaladi winwalyaya tjotakhala tjotene aFilisti yamwirihalyaya Sawuli, ¹² Alopwana otene a ekuru yahuvenya, yahetta ohiyu wotene yahuthomola nrutthu wa Sawuli ni mirutthu tj'asanawe vaxirini w'oBethi- Xeyani; khukusa erwaanaka oYabexi, wonwo yahupaha mirutthu n'yo. ¹³ Yahuttotta makhuva aya, khuvitha vathi va mwiri w'oYabexi, numala yahitthuka mpakha mahuku mathani na meli