¹ Atthu oZifi yahurwaa okumana ni Sawuli oGibeya, khun'himerya wira: Khantjuwelale wira Davidi aipithale omwako Hakila ephantti ya wothakoni? ² Sawuli ahathanla anakhotto ikonto ttharu, yari otupexa a nloko na Israyeli, khuvenya arwaaka wuthakoniw'oZifi, wira anlupatthe Davidi. ³ Sawuli ahumaka vamwako Hakila, ephantti ya wothakoni wattamale ephuro. Ni Davidi ari mothakoni, khwinwa wahimiyaka wira Sawuli ahuphiya mothakoni mmwe amphavelaka. ⁴ Tivo, Davidi, aharuma anan'hupi akina orwqaa ohottela khutjuwela wira Sawuli ahuphiya tthiri. ⁵ Ni Davidi ahuvenya, khurwaa okherekhere wa nipuro namakalyawe Sawuli; ni ahuwehexexa nipuro narupathyawe Sawuli, ni Abineri mwana a Neri, nkhulupale anakhotto a Sawuli. Ahona wira Sawuli alamalelale orupathi omaxaxani, ni arukureriyene n'anakhotto awe. ⁶ Nave Davidi ahira, ni ahakoha Ahimeleki muhiti, ni Abixayi mwana a Zerwiya, munnawe Yowabi, iraka: Ti pani ontthuna orwaa ni miyo omakalyawe Sawuli: Abixayi khwira: Miyo kinarwaa ni nyuwo. ⁷ Davidi ni Abixayi ohiyu yahuwattama anakhootto ale: ni khumphwanya Sawuli arupaka omaxaxani, ni nivaka nawe ahomeryale vathi wamuru wawe; Abineri n'atthu awe yanirupa anrukureryalene. ⁸ Abixayi ahun'himerya Davidi wira: Olelo Muluku ahuvahereryani nwananinyu mmatatani mwinyu: vanonto, nkihiye kan'home vathi vavale nnivaka nawe nenne, kinuttikha omotja pahi, vohihokolela-tho. ⁹ Davidi ahumwakhula Abixayi wira: Hoye muhimwinve: okhala wira olelo onimwinva ntthu orerihiya n'APWIYA khamphwanya nlattu? ¹⁰ Davidi ahira: Mwaha w'APWIYA anene ekumi, mwahiye APWIYA yawo omunlela ekuhu, nihuku ninrwaawe okhwa pahi, wala okathi onrwaawe winviya okhottoni, ¹¹ APWIYA ekitakhalihe katthuna omwirela yotakhala nlipa orerihiya n'APWIYA; nkuse nivaka nne niri wamuru, ni nrinki wa matji nirweeke. ¹² Vano Davidi ahikusa nivaka ni nrinki wa matji tjari wamuru wa Sawuli, ni khurwaatja; khuvo amonale, khuvo atjuwelale, khuvo avenyale, atthu otene yanarupa: okhala wira APWIYA yahawaanela ekhove tjintji. ¹³ Davivi ahulapuwela okhopela, khwemela omwako ottayi, vorakamela ni Sawuli; ¹⁴ Ni ahikhuwela voluluwana n'anakhotto, n'Abineri mwana a Neri, iraka: Abineri nyu, khannakhula? Abineri ahakhula wira: Mwa pani nyu muninnyakula mwene? ¹⁵ Davidi ahunkhuwelela Abineri: Khamuhiyo nyuwo nakhotto ororomeleya? Ni ti pani onlikana ni nyuwo wIsrayeli? Vano, exeni mwihintsunkaka mwene, pwiy'inyu? Aakhala arwaale omwinva mwene, pwiy'inyu. ¹⁶ Ela mpankalinyu yutepa otakhala. Mwaha w'APWIYA anene ekumi, nyuwo muniphwanela winviya, mwaha wohinkhapelela mwene pwiy'inyu, owo ottikittheliye n'APWIYA. Mone, vano, nrwee mwaphavele nivaka na mwene, ni nrinki wa matji tjari wamuru wa mwene. ¹⁷ Sawuli ahitjuwela ntju na Davidi, ni khwira: Nna khahi ntju ninyu, Davavidi mwanaka? Ni davidi ahumwakhula wira: Ayo mwene pwiy'aka, nna ti ntju naka mwene pwiy'aka. ¹⁸ Ni khwira: Vano nyuwo pwiy'aka munikilupatthelani miyo nrumey'inyu? Kipankaleni yotakhala? Kitthekaleni? ¹⁹ Vano-nto, kinnulapelani , nkiwiriyane orattene miyo nrumeyinyu nyuwo pwiy'aka. Yari APWIYA yurumaleni okituphela, nrim'aya okurunuxiye n'ukhwa waka: nto yari atthu, awo etakhalihiye n'APWIYA, okhala wira awo akomola olelo va nlaponi m'APWIYA, ekihimeryaka wira: Nrwee, mwakokhoreleke amuluku akina. ²⁰ Ephome aka, khimwarexeliye ottayi n'APWIYA: okhala wira mwene a Israyeli okhuma arwaka owana ekhotto alupatthaka etothomwa, wala alupatthaka ekhwali omwako. ²¹ Sawuli ahira: Kottheka: N'hokolele owannyaka, mwanaka Davidi, nkiniwirelani-tho yotakhala, okhala wira n'hinanela ekumi aka olelo vamethoni vinyu. Ayo kettale ntoko nanepa, ni kahivonya ventji. ²² Davidi ahumwakhula, wira: Nivaka na mwene nna; mwinrume mmotja aatthu'inyu, awele. ²³ APWIYA entthuve khula ntthu mwaha wa miteko tjawe tjorera i tjororomeleya: APWIYA olelo yahukivahererya nyuwo mmatatani mwaka, nto miyo nkitthunale ovenyiha ntata naka wira kimwirihe yotakhala nlipa orerihiya n'APWIYA. ²⁴ Nto miyo, kitsunkalyaka olelo ekum'inyu, tjitjammo-tho APWIYA etsunkeke ekumi aka, ni ekakiherye tjotakhala tjotene. ²⁵ Ni Sawuli khun'himerya Davidi wira: Mureriye nyuwo, Davidi mwanaka; nyuwo munareriya, tthiri mwa miteko tjinyu tjotene. Nave Davidi ahurwaa ekwah'awe, ni Sawuli ahuhokolela owannyawe.