¹ Ni Samuweli ahukhwa, ni atthu otene a Israyeli, yahuthukumanela omunlela, khunvitha mmatta mwawe oRama. Ni Davidi ahuhokolela, wuthakoni w'oMowoni. ² Ni oMawoni ahukhala nlopwana mmotja arina imatta tjawe oKarmeli, owo ari thatjiri mulupale, ahukhalana ipwittipwitthi ikonto ttharu n'ipuri ekonto emotja. Ni owo ari oKarmeli ametthaka ipwittipwitthi tjawe. ³ Nlopwana owo in'haniya ntjina nawe Nabali, ni amwarawe yihaniya ntjina naya, Abigayili. Ari nthiyana orera ni aakhili; nto Nabali owo ari nlopwana owali ni otakhala nrima; ni ari a nloko na Kalebi. ⁴ Ni Davidi ahinwa mothakoni wira Nabali amettha ipwittipwitthi tjawe. ⁵ Nave ahunveleliherya alopwana muloko, ahimeryaka wira: Nrwee oKarmeli, mwamphwanye Nabali, ni mwankhomatje ni nrettele aka. ⁶ Ni mun'himerye wira: Nrettele okhale ni nyuwo, ni amutj'inyu, ni tjitthu tjinyu tjotene. ⁷ Nihinwa wira munimettha ipwittipwitthi tjinyu. Vano, okathi amakamputj'inyu yakalaya ni hiyo, khinawirihale etthu yotakhala, nnakhala khinawiyeryale etthu okathi waryaya okarmeli. ⁸ Mwakohe ananteko'inyu, awo anamuhimeryani. Vekhweli ananteko'inyu yona orerela vamethoni vinyu, vano hiyo niphiye nihuku na nira; Davidi onnulapelani wira nitjaliye ni nyuwo kihuvarani mwetto mwavahe arumey'inyu ala, ni mwaninyu Davidi. ⁹ Anakhotto a Davidi waphiyalyaya wa Nabali, yahun'himerya mulumo ala otene wa ntjina na Davidi, ni khumala. ¹⁰ Ni Nabali ahuwakhula arumeyi a Davidi, wira: Davidi owo ti pani? ni mwana a Yese ti pani? Mahuku ala khatsinthowa ipottha tjinun'hiya mwanene khuyatthyawa. ¹¹ Vano miyo kikuse ephau aka, ni matji aka, n'inama tjaka ni mihuwo tjaka tjihiteliye nira nna, kavahe atthu kihintjuwelaka onkhum'aya? ¹² Atthu awo a Davidi, yahuhokolela wa pwiy'aya, waphiyalyaya yahun'himerya Davidi mulumo ala otene. ¹³ Davidi owo ahahimerya anakhotto awe wira: Nyuwo otene nkuse wa khula ntthu ekatana awe: Ni Davidi ahunkusa xow'awe; ni anakhotto miloko miloko mitjese yahuntthara Davidi, akina miloko miloko minli yahalale alipelelaka miritti. ¹⁴ Mmotja a'makamputsi a Nabali ahunlopola Abigayili mwarawe Nabali, iraka: Mwipatsope Davidi aharuma atthu awe ovenya mothakoni arwaaka onvaha nrettele pwiy'ihu, nto owo ahiwulumela vonanara. ¹⁵ Nto alopwana awo anirerela nrima ventji, khananihaxe, nnakhala khananinyerye etthu okathi wotene wettihu ni yena, nilyihaka inama tjihu mmathalani. ¹⁶ Awo yahunakiha othana n'uhiyu, okathi wotene warihu eriyari aya nilyihaka inama tjihu. ¹⁷ Vano-tho, ntthokelele orattene, mone erininyu wira, okhala wira yolikanana onkhumelela yotakhala pwiyy'ihu n'itthoko awe: vano mwene owo t'owali, khanimalelale onlelaka tjitjammo. ¹⁸ Nave Abigayili ahikusa iphau miloko miloko minli, n'ikanatta pinli tja evinyu, n'ipwittipwitthi thanu tjowapeiya, ni miphimo mithanu tja etiriku yowarikiya, ni mavuru emiya emotja ya ewuva, ni iphau miloko miloko minli tja efigu yowumma, ni tjotene n'ye areya aburu; ¹⁹ Ni khwahimerya arumeyi awe wira: N'holeke, miyo kinamuttharani ottuli. Ni khan'himeryale etthu n'yawe Nabali. ²⁰ Ni anokomale vaburuni akhuruwelaka vamwako, Davidi ni atthu awe ira awaka ephantti ekina, khukunatja. ²¹ Davidi ettaka anupuwela wira: Vekhweli kohawa mahala va kihalyaka mihakhu tja ntthu ole mothakoni, ehipweteyaka etthu; ni owo onnikilivela ni tjotakhala tjorera tjimpakelalyaka. ²² Tjitjammo Muluku akipwetexe, fatari yapwetexe awanani aka, naphiyakaru nihuku n'omalo miyo kihiwinvale alopwana awe otene. ²³ Abigayili amonakaru Davidi, ahikhuruwa vaburuni, khukokhora oholo wawe, uramaka mpakha vathi; ²⁴ Khumorela vamwettoni vawe, an'himeryaka wira: Pwiy'aka, nlattu ola okhale wawaka; nto kinnulapelani miyo nrumeyinyu kohimeryeni owaruni winyu, ni mwinwe mulumo a nrumeyinyu ola. ²⁵ Mwihinxikhe Nabali ole, owo nlolo; hata ntjina nawe, ninnoneya okhala n'elolo. Tivo vanihaniyawe Nabali, ololo turinawe: nto miyo nrumeyinyu, nkawonale alopwana yarumalinyu nyuwo pwiyaka. ²⁶ Vano, pwiyaka, mwaha wa ntjina n'APWIYA ni wa ekum'inyu, APWIYA tukhottihaleni omwarexa ephome, ni wunla ekuhu ni matat'inyu. Vano, awananinyu n'ale yuphavelelani tjitakhala, yirihiyeke tjaphwanelawe Nabali owo. ²⁷ Vao in'ya ti tjovaha nrumeyinyu ola tjowanelalyaweni wovahani pwiy'aka, mwavahe atthu anettaninyu pwiy'aka. ²⁸ Miyo kinnulapelani wira nkilevelele tjotthekelalyakani; vano APWIYA anamuvahani omwene wolipa, okhala wira nyuwo pwiy'aka munniwana ikhotto tj'APWIYA, ni khivo yotakhala mmurimani mwinyu ekum'inyu yotene. ²⁹ Akhala atthu yorukunuwelaleni nyuwo, yolupatthakani wira ewinveni nyuwo pwiy'aka, nto ekum'inyu enutjukiya orattene ni APWIYA Muluku'inyu ntoko wa khula ntthu ontjukawe mihakhu tjawe, vano ekumi y'awananinyu enuttikheliya ottayi ntoko nluku ninttikhiya ni pharantjikula. ³⁰ APWIYA vanwaya wumaleliheryani tjorera tjotene tjihimalyaya, anamukhalihani mwene a Israyeli, ³¹ Nave okathi owo, mwanripiya nrima pwiy'aka nyuwo, mwanlemeliya n'akhil'inyu mwaha w'omwinva ntthu mahal'ene, mwaha womunlela ekuhu ni matat'inyu. Vano, mwikhapeleleke, nyuwo pwiy'aka, okathi APWIYA vanwaya onvuwiha pwiy'aka, nkupuweleke miyo nrujmey'inyu. ³² Davidi ahumwakhula Abigayili wira: Ettottopeliye APWIYA Muluku a Israyeli, orumaleni owa olelo okumana ni miyo; ³³ Ni ettottopeliye akhil'inyu, nttottopeliye nyuwo, okhala wira ollo khankitthuniheryale omwarexa ephome, ni wunlela ekuhu ni matat'aka: ³⁴ APWIYA khakihiyeryale wira kiwiriheni tjotakhala, nto nyuwo mwahakuvale owa okumana ni miyo, kinnilapha ni ntjina n'APWIYA Muluku a Israyeli wira malo khavo nlopwana atthuna ohala anari nkumi vapuwani va Nabali. ³⁵ Davidi ahakhelela mmatatani mw'Abigayili tjitthu tjanwanelalyawe, ni khun'himerya wira: N'hokoleleke owani ni nrettele, miyo kihowiriyanani, kiwonelakani othunku. ³⁶ Abigayili ahuhokolela owani, vano Nabali ira atthapelaka yolya yulupale ntoko ari mwene, ahutteliya nrima ventji okhala wira anuhapaliya; tivo Abigayili khan'himeryale etthu mpakha oxa melo aya. ³⁷ Vano mmeloni mwaya, enankaramuwale evinyu Nabali, mwarawe ahumwalakelela tjotene tjakhumelelale; inwakaru tjitthu n'ya Nabali nrimawe wahukhwa, ni erutthu awe yahumma ntoko nluku. ³⁸ Nuvira mahuku muloko APWIYA yahumpwetexaNabali, ni khukhwa. ³⁹ Davidi watjuwelalyawe wira Nabali ahukhwa, ahira: Ettottopeliye APWIYA amunlelale ekuhu Nabali, mwaha wa tjotakhala tjakirelalyawe; ni APWIYA an'hokoloxerya yotakhala Nabali owo amorihela vamuru vawe. Numala Davidi aharuma atthu awe orwaa onlapela Abigayili, wira akhale mwarawe. ⁴⁰ Atthu awo yahuphiya owannyawe Abigayili oKarmeli, khun'himerya wira: Davidi oniruma owuryani, wira mukhale mwarawe. ⁴¹ Abigayili ahemela, ni ahukokhora uramaka mpakha vathi, iraka: Miyo nrumeyi awe Davidi, kolikanana orapiha inawu tj'arumeyi awe. ⁴² Ni Abigayili ahilikanyiherya ahunwela buru, ahuvenya wamotja n'arumeyi awe athiyana athanu yanvelela, khwatthara anamitthaka a Davidi, ni ahukhala mwarawe. ⁴³ Davidi ahukhalana-tho mwarawe nkina ihaniya Ahinowami akhumale elapo ya wIzireyeli, oweli aya yari axara a Davidi. ⁴⁴ Okhala wira Sawuli ahunvaha mwanawe Mikali wira akhale mwarawe Davidi, khuthelihiya ni Palti mwana a Layixi, elapo y'oGalimi.