¹ Sawuli okathi wahokolowalyawe w'aFilisti, ahuhimeriya wira: Davidi ori mothakoni mwa wEngedi. ² Ni Sawuli ahakusa anakhotto awe othanliya ikonto ttharu a wIsrayeli, khuvenya arwaaka omphavela Dvidi n'atthu awe, mapuro orika omiyakoni yaihaniya miyala tja ipuri. ³ Ahuphiya nipuro naryaya akako a ipwittipwitthi nattamelale mphironi, vavale vakhalalyaya nikhuku, Sawuli ahuhapuwa akelaka munikhukuni mmo wira aitthyuwe; ni Davidi ni atthu awe yari munikhukuni mwemmo yokomalene oneri. ⁴ Anakhotto a Davidi yahun'himerya wira: Olelo nophiya nihuku APWIYA yohimeralyayani wira: Tthiri miyo kinamuvahani nwananinnyu mmatatani mwinyu, nyuwo mmwiriheke ntoko tjintthunennyu. Davidi ahemela attamaka vakhani vakhani, khwikittha niveru nlaya na Sawuli. ⁵ Numala vaholo waya Davidi nrima wahunripa, wikitthalyawe nlaya na Sawuli. ⁶ Khwahimerya atthu awe wira: APWIYA ehikihiye kimwirihaka tjotakhala mwene aka, yowo APWIYA yanttikitthelalyaya, nkinimwiriha yotakhala nnakhala vakhani; okhala wira mwene othanliye n'APWIYA. ⁷ Tjitjammo ni mulumo ala Davidi ahakhottiha anakhotto awe ontuphela Sawuli. Ni Sawuli, ahikhuma munikhukuni, khurwaa. ⁸ Nave Davidi ahemela-tho, ahikhuma munikhukuni mmo khunkhuwelela Sawuli, iraka: Pwiy'aka mwene! Sawuli ahurukunuwa awehaka ottuli, Davidi ahukokhora, uramelaka mpakha vathi. ⁹ Ni Davidi ahun'himera Sawuli wira: Nnawiriyanelani atthu ala anuhimeryani wira: Mwinweheke Davidi omphavela owinvani? ¹⁰ Nyuwo ene ni metho'inyu moweha olelo wira APWIYA olelo va yahukivahererya nyuwo mmatatani mwaka munikhukuni mu: Anakhotto aka yahukihimerya wira kiwinveni, nto miyo nkitthunale komorelani ekhiriri, kiraka: Nkinimwiriha etthu yotakhala pwiya aka, owo ottikittheliye n'APWIYA. ¹¹ Ni tithi, mone, mone va niveru na nlaya ninyu mmatatani mwaka: kothikila niveru na nlaya ninyu ni kihiwinvani. Ntjuwele, vano, mone wira nkinupuwela worukunuwelani wala owirihani etthu yotakhala, miyo nkotthekelaleni, ti nyuwo mwinkilupattha wira mukinve. ¹² APWIYA ekhale mphuk'ihu, APWIYA awo ewunleleni ekuhu: Vano miyo nkiniwirihani etthu yotakhala. ¹³ Nyuwo motjuwela ehantitsi ela yokhalayi wira: Yotakhala eniriya n'atthu otakhala pahi: ti tjitjammo miyo nkinrwaa owirihani etthu yotakhala. ¹⁴ Vano nto nyuwo mwene a Israyeli muniwana n'apani? Muninlupattha pani? Munimomola mwalapwa okhwa? munlupattha etothomwa? ¹⁵ APWIYA, vano, t'anrwaa onilamula, awo ephukeke nlatthu'ihu. Awo awehe tjotene, ekakihe, ekithonyerye exariya ekopolaka mmatatani mwinyu. ¹⁶ Davidi wamalalyawe olavula, mulumo ala, Sawuli khwira: Tthiri nna ntju ninyu, Davidi mwanaka? Ni Sawuli, ahimyakaru tjitjammo, ahupacera wunla. ¹⁷ Ni ahun'himerya Davidi wira: Nyuwo morera nrima okivikana miyo, vawirelalyakani tjotakhala, nyuwo mokilivela nkirelaka tjorera. ¹⁸ Olelo nyuwo mwihoniherya okirerela winyu nrima; tthiri APWIYA yahukivahererya mmatatani mwinyu, nyuwo khuhikinva. ¹⁹ Ti pani onira anvaralene nwanani awe, ni khun'hiyaka orwa ni nrettele? APWIYA yutthuveni mwaha wa tjorera tjikirelalinyu olelo. ²⁰ Vekhweli kotjuwela wira nyuwo nnukhala mwene a Israyeli, ni wira omwen'inyu onulipa, ²¹ Vano, nkilaphele olelo va, ni ntjina n'APWIYA, wira khamwinrwaa owinva asanaka ni otjulu aka, khamwinrwaa ottipiha ntjina naka vapuwani v'atithi aka. ²² Nave Davidi ahunlaphela Sawuli. Ni Sawuli ahuhokolela owani, ni Davidi ni atthu awe yahuttyawela-tho mapuro orika.