¹ Nihuku nimotja Davidi ahuhimeriya, wira: AFilisti atuphela oKeila, ni anamwin'yatsa tjolya tja mothakoni motene. ² Ni Davidi ahakoha APWIYA, wira: Kirweeke kathuphele aFilisti ale kinamwaxintta? Ni APWIYA yahuwakhula Davidi wira: Ayo orwee, mwatuphele aFilisti, munawopola atthu oKeila. ³ Nto anakhotto a Davidi yahun'himerya Davidi wira: Nikhalaka oYuda wono hiyo ninnova ventji; khivantepa-tho wopiha narwaa oKeila watuphela aFilisti? ⁴ Nave-tho Davidi ahakoha-tho APWIYA. Ni APWIYA yahumwakhula, wira: Nvenye, nrwee oKeila, miyo kinamuvahani aFilisti mmatatani mwinyu. ⁵ Davidi ahuvenua wamotja n'anakhotto awe, arwaaka oKeila, ahatuphela aFilisti, ahuwinvakatsa entji, khukusa mihuwo tjaya: ni ahuwopola atthu oKeila. ⁶ Ni tjitjammo, Abiyatari mwana, Ahimeleki okathi watthyawalyawe wa Davidi oKeila, ahikusea efodi awe yo wakoha APWIYA. ⁷ Ni Sawuli ahuhimeriya wira Davidi atthyawelale oKeila. Vano Sawuli owo khwira: Muluku okivahererya Davidi owo mmatatani mwaka; owo ohitthuka mwanene, akelaka nttetthe ori ni mikhora tjolipihiya. ⁸ Sawuli ahathukumanya anakhotto awe otene, wira arwee oKeila, yanrukurerye Davidi n'atthu awe. ⁹ Nto Davidi watjuwelalyawe wira Sawuli ahulikanana ontuphela, ahun'himerya nlipa a nkuttho Abiyatari wira: Nwane efidi. ¹⁰ Vakusalawe efodi Davidi khwira: APWIYA Muluku a Israyeli, miyo ki nrumeyinyu kotjuwela wira Sawuli onawa otuphela nttetthe ola w'oKeila, apwexakatse mwaha wa miyo. ¹¹ Vekhweli Sawuli onawa, ntoko nrumeyinyu ola tjiwalyawe? Vano atthu oKeila anrwaa okivahererya mmatatani mwawe? APWIYA Muluku a Israyeli, xontte mwintjuweliheni nrumeyinyu ola. Ni APWIYA yahumwakhula wira: Ayo, onawa tthiri. ¹² Davidi ahakoha-tho Apwiya wira: Atthu oKeila anukivahererya miyo n'atthu aka mmatatani mwa Sawuli? Ni APWIYA yahumwakhula wira: Awo anamuvahereryani tthiri. ¹³ Vano Davidi ahuvenya oKeila, n'anakhotto awe , yari ntoko alopwana miloko miloko mithanu namotja, khwettetta omathalani.Sawuli ahuhimeriya wira Davidi ahutthyawa oKeila; ni khuhirwaa ontuphela. ¹⁴ Ni Davidi ahurwaa wothakoni atthyawelaka mapuro orikarika, ahukhala omiyakoni m'o Zifi; Sawuli anivira anlupatthaka mahuku otene, nto Muluku khanvahereryale mmatatani mwawe. ¹⁵ Vano, vonalyawe tjitjammo, Davidi anitjuwela wira Sawuli anivira anlupatthaka wira amwinve, okathi davidi waryawe oHorexa mothakoni m'oZifi. ¹⁶ Yonathani mwana a Sawuli, ahuvenya orwaa omotola Davidi oHorexa wonwo, vamphwanyalyawe ahunlipiherya nrima ni ntjina na Muluku. ¹⁷ Ni an'himeryaka wira: N'hove, okhala wira atithi aka Sawuli anamotjela wuvarani, ti nyuwo mwinrwaa okhala mwene a Israyeli, vano miyo kikhale oneili; ni tjitjammo atithi a SDawuli annitjuwela orattene tjotene n'ya. ¹⁸ Yonathani ni Davidi yahulipiheryana-tho opatthani aya oholo w'APWIYA: Numala Davidi ahuhala oHorexa, ni Yonathani ahuhokolela owani. ¹⁹ Ni atthu akina oZifi yahurwaa okumana ni Sawuli oGibeya khun'himerya wira: Ntjuwele Davidi khaipithale eriyarihu mapuro orika oHorexa, mwako wa Hakila okhutsini wuthakoni? ²⁰ Vekhweli, nyuo mwene, nkhume nannano va, notthuna winyu wotene ni nroromelo ninyu notene, hiyo ninanvaha mmatatani mwa mwene. ²¹ Sawuli ahakhula wira: APWIYA yutjaliyeni, okhala wira mokonela othunku: ²² Nrweeke, mwanlupatthe, orattene, mwireheryeke orattene, n'hottele nipuro nenno ntjuwelexe mapuro anvirawe, mwakohakohe atthu yamonale; kohimeriya wira owo kharere olavilavi. ²³ Mwahottele makhuku otene aniweryawe wipitha, mwatjuwelexa vale, nwe nkihimerye, miyo kinamuvelelani: owo akhala nlaponi mu, miyo kinamphwanya hata kimphavelatsaka mmittettheni motene m'oYuda. ²⁴ Awo yahuvenya ehokolelaka oZifi, en'holelaka Sawuli. Davidi n'atthu awe amakale mothakoni mo Mowabi, ephantti yokhutsini nlaponi mowataleya. ²⁵ Sawuli ahuvenya n'atthu awe orwaa omphavela; nto Davidi ahitjuwelihiya, khurwaa omwako onkhala mothakoni mo Mawomi. Sawuli watjuwelalyawe, ahuntthamakela mothakoni mo Mawomi. ²⁶ Ahirukurerya mwako ephantti ekina, Davidi n'arumeyi awe ephantti ekina: Davidi aniphavela otthyawa wowakuveya antthyawaka Sawuli; nto Sawuli n'atthu awe yahalale onrukurerya nunvara Davidi n'atthu awe. ²⁷ Okathi ene yowo ahuphiya namutthaka mmotja on'himerya Sawuli, iraka: Mwakuveke n'hokolowe nannano, okhala wira aFilisti atuphela nlaponi mwinyu. ²⁸ Sawuli ahuhiya omomola Davidi, khurwaa wavirikanya aFilisti. Mwaha w'etthu ela, nipuro nne nnihaniya nipuro nomwalana. ²⁹ Nave-tho Davidi ahemela vanttumusani, akhuwelelaka mapuro olipa a WEngedi.