¹ Davidi ahuvenya oGathi khutthyawela munikhukuni ninkhala okherekhere wa nttetthe wa wAdulami; axunnawe n'amutji awe otene watjuwelalyaya, yahirwaa okumanana n'uwo. ² Ni atthu otene yahaxiya, otene ale yakophale, otene ale yaitsinla, yahitakaneleya ni Davidi, ni khukhala nkhulupale aya: atthu miloko miloko mitjese yahukhala wamotja ni yowo. ³ Davidi ahurwaa oMsipa nlaponi mo Mowabi, khunlapela mwene oMowabi wira: Miyo kinnulapelani nkitthuniherye wira atithi n'amayaka etthyawele wono, mpakha miyo otjuwela Muluku entthunawe okiriha. ⁴ Vano, aharwaana, atithi awe n'amayaye wa mwene oMowabi, awo yahukhala wonwo okathi wotene Davidi wamakalyawe vavale. ⁵ Nihuku nimotja profeta Gadi ahun'himerya Davidi: N'hikhale vava, nkhume, n'hokoleleke elapo'inyu y'oYuda. Davidi ahuvenya, arwaka wothakoni w'oHerethi. ⁶ Nihuku nimotja Sawuli ari oGibeya, okomalene nkhitte mwa mwiri wakhala vamattumuxani akusalene nvaka nawe mmatatani, arukureriyene n'arumeyi awe yemelale vavale. Okathi owo, watjuwelalyawe wira Davidi n'arumeyi awe ahuwehiya. ⁷ Ni Sawuli ahahimerya atthu awe wira: Nkiwiriyane orattene, nyuwo atthu a Beniyamini: Mwana a Yese onrwaa wuvahani imatta nyuwo otene ni mihokhorokho, wala wokhalihani nyuwo otene makhulupale atthu ekonto emotja nnakhala makhulupale atthu miloko muloko, ⁸ Nyuwo otene nkotothaka mwaroromelale tjitjammo, khuvo akihimeryale okathi mwanaka apatthanalyawe ni mwana a Yese, khuvo onvalanela mwaha wa miyo, khuvo ahihimeryale wira mwanaka okiwopela mmotja arumeyi aka wira arwaane miyo aphavelaka okinva, ntoko tjinirawe mpakha olelo va? ⁹ Dowigi a wEdomi, ari vavo eriyari y'arumeyi a Sawuli, owo ahakhula ni iraka: Miyo komona mwana a Yese okathi waphiyalyawe oNobi, owannyawe Ahimeleki mwana Ahutubi; ¹⁰ Ahimeleki owo ahakoha APWIYA mwaha wa yowo, ahunvaha yolya awe ya nkwaha, ahunvaha-tho xowa o Goliyathi nFilisti. ¹¹ Mwene ahiruma wihaniya nankuttho Ahimeleki mwana Ahitubi, wamotja ni amutji awe, yari anankuttho oNobi: ni otene aya yahuwa wa mwene. ¹² Sawuli khwira: Nkiwiriyane orattene, mwana Ahitubi. Ni owo ahumwakhula wira: Miyo va, pwiy'aka. ¹³ Sawuli khwira: Nyuwo ni mwana a Yese, nkirukunuwelelaleni, nyuwo monvaha yolya ni xowa, ni n'hakoha APWIYA mwaha wa yowo, wira akirukunuwele aphavelaka okinva, ntoko tjinirawe mpakha olelo va? ¹⁴ Ahimeleki ahumwakhula mwene, wira: Mw'arumeyinyu okhala mmotja ororomeleya onvikana Davidi, ntthepa a mwene, nkhulupale atthu'inyu ororomeleyaxa, ottittimiheyaxa mw'atthu'inyu otene? ¹⁵ Kipacerale olelo wakoha APWIYA mwaha wa Davidi yowo? Kipacerale khalayi miyo kinurukunuwelani: amwene ehimotheryeke nrumeyi aya nnakhala amutji awe; okhala wira nrumey'inyu ola khatjuwelale etthu, nnakhala yulupale nnakhala yamukhani. ¹⁶ Mwene khwira: Nyuwo Ahimeleki, mjunakhwa vohanyiherya-tho, nyuwo ni amutj'innyu. ¹⁷ Numala ahuwirela arumeyi awe yemelale vale wira: Haya nwinvakatse anankuttho APWIYA; tthiri yawo-tho yahunkhaliherya Davidi, etjuwelaka wira Davidi owo anutthyawa, khuhikihimerya miyo. Nto arumeyi a mwene yahukhottatsa owinva anankuttho APWIYA. ¹⁸ Tivo Sawuli ahun'himerya Dowegi: Haya yenyu, nwinvakatse anankuttho. Dowegi ntthu a wEdomi, ahuwinvakatsa otene aya, nihuku nenno owo ahuwinva alopwana miloko mithanu na miraru n'alopwana athanu yawarale efodi y'APWIYA. ¹⁹ Sawuli ahuwinvakatsa atthu otene oNobi, nttetthe w'anankuttho, ahapwetexa alopwana n'athiyana, amiravo n'ana akhani, imompe n'ipwittipwitthi, tjotene ni ikatana. ²⁰ Nto opowale ti mwana mmotja pahi, Ahimeleki mwana Ahitubi, ntjina nawe Abiyatari, owo ahutthyawela waryawe Davidi. ²¹ Ni Abiyatari ahun'himerya Davidi wira Sawuli owinvakatsa anankuttho otene APWIYA. ²² Ni Davidi ahun'himerya Abiyatari: Nihuku nne kamonalyaka Dowegi a wEdomi, miyo kahitjuwela wira anrwaa onlela Sawuli. Winvakatsiyaya amutjinnyu otene ti nlattu aka. ²³ Tivo n'hove, nkhaleke ni miyo: wamotja ni miyo nnamwakihiya, tthiri onurukunuwelani nyuwo: onikirukunuwela miyo.