¹ Ni Davidi ahuphiya oNobi, wakhalawe Ahimeleki nlipa a nkuttho: ni Ahimeleki owo ahutikinihiya nukumana wawe, ni khunkoha: Owelaleni vekha, ohiveleliyaka n'atthu awo? ² Ni Davidi ahumwakhula Ahimeleki nlipa a nkuttho wira: Mwene okiruma etthu emotja, iraka: ahikhale ontthuna otjuwela enorumelakani, nnakhala tjoruma tjaka; ni atthu akina kowirela nakumane nipuro nikina. ³ Nto, vano, mokhalana yolya? Nkivahe iphau thanu, wala eyolya ekina erininnyu. ⁴ Ni nlipa a nkuttho ahun'himerya Davidi wira: Nkirina iphau tjikina; tjihikhalale n'ye tjireriheliye APWIYA: nto kinniwerya wuvahani arumeyinyu yahikhalaneru mwikho n'athiyana. ⁵ Davidi ahumwakhula nlipa a nkuttho, iraka: Ekhweli hiyo khanikumanale n'athiyana okhuma ntsuri nikhumalihu, ni tjitthu tjotene tj'arumeyi ala ti tjorerihiya, ntoko tjilamalelalihu narwaaka okhottoni; ohiya ekwahahu ela olelo khannetta mwaha wa Muluku. ⁶ Tjitjammo nlipa a nkuttho ahunvaha iphau tjirerihiye okhala wira kharina-tho tjikina, arina iphau n'yo pahi tjireriheliye APWIYA, ikusiye wametja w'APWIYA wonwo waranttelihiyaya n'iphau tjolelo. ⁷ Nihuku nenno ahukhala vavo nrumeyi mmotja a Sawuli athanliye vamethoni v'APWIYA, ntjina nawe Dowegi, akhumale elapo ya wEdomi, ari nkhulupale amakamputsi a Sawuli. ⁸ Ni Davidi ahun'himerya Ahimeleki wira: Mokhalana va nivaka wala xowa? Okhala wira miyo nkikusale nivaka wala xowa okhala wira kirumiye ni wakuva. ⁹ Ni nankuttho ole khwira: Okhala xowa a Goliyathi nFilisti, yole omwinvalinyu omuro Terebinto, ori vale otthukiye mmalayani ottuli w'efodi: nyuwo mwatthuna onkusa, mwinkuseke: va khavo-tho nkina. Ni Davidi khwira: Nkivaheke: khavo-tho xowa onlikananawe. ¹⁰ Davidi ahikhuma nihuku nenno, khutthyawa mwaha wa Sawuli, khuphiya wa nwene Akixi oGathi. ¹¹ Arumeyi a Kixi yahunkoha mwanene aya wira: Ola khahi Davidi, mwene elapo ela? Khahiyo yola athiyana yamwipelaya yinaka, yiraka: Ekonto emotja t'awinvalyawe Sawuli, ikonto muloko t'awinvalyawe Davidi? ¹² Davidi inwakaru mulumo ala ahivelela khupacera omova Akixi mwene oGathi. ¹³ Ni mulumo awe yayahuvirikanyeya wariyari w'atthu ale, ni khukhalihiya nankhwanepa, ni anurepa marepa vamikhora tja mittetthe, anikumiha nipheru mwano. ¹⁴ Akixi ahahimerya arumeyi awe wira: Khannona wira nanvahuwa; mwinwanelaleni? ¹⁵ Miyo nkikhalanale ananvahuwa entji nlaponi mwaka, nyuwo nkiwnelale nlopwqna ola ohimakeleleya wira apankeke tjohiloka oholo waka? ola ahikhala ophiya vapuwani vaka?